Wilembewa na Maliko 1:1-45
-
Yohani M’batizi enzelalikila (1-8)
-
Kubatiziwa kwa Yesu (9-11)
-
Yesu eyesewa na Satana (12, 13)
-
Yesu eyamba kulalikila ku Galileya (14, 15)
-
Yesu esankha ophunzila oyambilila (16-20)
-
Efumya mzimu uipa (21-28)
-
Yesu epojeka ŵanthu anyinji ku Kapelenawo (29-34)
-
Epemphela kumalo kuliye ŵanthu (35-39)
-
Munthu wamankhutu epojekewa (40-45)
1 Chiyambi cha uthenga uweme wonena za Yesu Khilisitu mwana wa Mulungu:
2 Mokatijana na vilembewa m’buku ya mneneli Yesaya kuti: (Ona! Newo nutumija nthumi yangu kuti itangule* kuyakuwamyila njila.)*
3 Munthu muyakine oŵilikija m’chipululu kuti: ‘Konzani njila ya Yehova! Muwamye misewu yake.’”
4 Yohani M’batizi enze m’chipululu ndipo enzelalikila za ubatizo monga chizindikilo cha kulapa kuti machimo akhululukiliwe.
5 Tetyo ŵanthu onse amene enzenkhala mu dela ya Yudeya komasoti onse amene enzenkhala mu Yelusalemu enzeluta kuli yove. Yohani enzeŵabatiza* mu mmana wa Yolodano ndipo ŵanthu amene awo enzeulula machimo ŵawo patuŵa.
6 Yohani enzevwala chovwala cha usako wa ngamila na bande wachikumba muluunda mwake ndipo enzekulya mphanzi na uchi.
7 Yove enzelalikila kuti: “Kuvuli kwangu kukuza muyakine wamphamvu kupambana newo ndipo ninelini woyenelela kuŵelama nomasula nthambo za nsapato zake.
8 Newo nakubatizani na manzi, koma yove azakubatizeni na mzimu utuŵa.”
9 Mmasiku amene awo, Yesu ewela kufumila ku Nazaleti wa ku Galileya ndipo ebatiziwa na Yohani mu Yolodano.
10 Pechingovuuka mmanzi mwamene umo, yove ewona kululu kuseguka komasoti mzimu useluka monga ni nkhunda na kuzamunkhala.
11 Tetyo pemvwika mawu ofumila kululu akuti: “Wewo niwe Mwana wangu wanukonda, unikondwelesha ngako.”
12 Nthawe yamene iyo mzimu wamene uyo wemulimbikisa kuti alute ku chipululu.
13 Tetyo yove enkhala m’chipululu mwamene umo masiku 40, oyesewa na Satana. M’chipululu mwamene umo mwenzesoti vinyama vakusanga ndipo angelo enzemutumikila.
14 Yohani pechiikiwa mu djeli, Yesu eluta ku Galileya kuyalalikila uthenga uweme wa Mulungu.
15 Yove enzenena kuti: “Nthawe yoikiliwatu yakwana ndipo Ufumu wa Mulungu wavwendela. Lapani ndipo mukhulupilile uthenga uweme!”
16 Penzeyenda mmbali mwa nyanja ya Galileya,* Yesu ewona Simoni na Andileya nkwake wa Simoni wamene uyo, oponya akombe ŵawo mu nyanja mwamene umo chifukwa ntchito yawo yenze yokasha nsomba.
17 Tetyo Yesu eŵauja kuti: “Nikonkheni ndipo nikuchitisheni kunkhala okasha ŵanthu.”
18 Nthawe yamene iyo ove esiya akombe ŵawo nomukonkhelela.
19 Pechiluta pasogolo patontho, ewona Yakobo mwana wa Zebedayo na nkwake Yohani ali m’bote yawo ndipo enzesona akombe ŵawo.
20 Nthawe yamene iyo eŵaita. Tetyo ove esiya atata ŵawo a Zebedayo m’bote mwamene umo pamozi na ŵanthu aganyu ndipo emukonkhelela.
21 Onse amene awo efuma noluta ku Kapelenawo. Peiyamba nsiku ya Sondo, echiyaloŵa mmalo opemphelela noyamba kuphunzisa.
22 Ŵanthu mwamene umo edabwa ngako na kaphunzisidwe kake, chifukwa enzeŵaphunzisa monga ni munthu ali na ulamulilo, osati monga ni alembi.
23 Pa nthawe yamene iyo, mmalo ŵawo opemphelela mwamene umo mwenze munthu enze na mzimu uipa, ndipo munthu wamene uyo eŵilikija kuti:
24 “Kansi mufuna chinji kuli sewo, mwewo Yesu Mnazaleti? Kansi mwawela kuzatiwononga? Newo nukuziŵani luweme ngako, nimwe Ntuŵa wa Mulungu!”
25 Koma Yesu ezuzula mzimu wamene uyo kuti: “Nkhala chelele, ndipo fuma muli yove!”
26 Tetyo mzimu uipa wamene uyo wemuchitisha kuti apalapate ndipo eŵilikija ngako. Pavuli pake wifuma mwa munthu wamene uyo.
27 Pechiwona vamene ivi, ŵanthu onse edabwa ngako mwakuti eyamba kukambilana kuti: “Kansi chamene ichi n’chinji? Ni chiphunziso chanyowani! Olo mizimu iipa oilamula mwamphamvu ndipo yumumvwila.”
28 Tetyo mbili yake ifalikila mokulumija ngako mu dela yonse ya Galileya.
29 Pevichitika tetyo ove efumamo mmalo ŵawo opemphelela mwamene umo noluta ku ng’anda kwa Simoni na Andileya. Yakobo na Yohani eluta nawosoti pamozi.
30 Koma apongozi ŵake a Simoni enze yone, chifukwa cholwala maleliya.* Mokulumija ove emuuja za amayi amene awo.
31 Tetyo yove eluta kwenze amayi amene awo ndipo eŵakata kwanja noŵausha. Pechichita tetyo maleliya amene awo esililatu mwakuti amayi amene awo eyamba kuŵatumikila.
32 Chakunchingulo zuŵa yachoma, ŵanthu eyamba kumuletela ŵanthu onse amene enzelwala komasoti enze na viŵanda.
33 Ndipo ŵanthu onse a mutauni yamene iyo eungana pamuliyango pamene apo.
34 Tetyo Yesu epojeka ŵanthu anyinji amene enzelwala matenda osiyana-siyana ndipo efumya viŵanda vinyinji. Koma aliye lole kuti viŵanda vamene ivo vilaŵile chifukwa venzemuziŵa kuti ni Khilisitu.*
35 Mmawa ngako kukali mfinzi, Yesu euka nofuma panja ndipo eluta ku malo kuliye ŵanthu. Kwamene uko eyamba kupemphela.
36 Koma Simoni na ayakine ŵenze nawo emusakila-sakila.
37 Ndipo emufwana nomuuja kuti: “Ŵanthu onse okusakilani.”
38 Koma yove eŵayankha kuti: “Tiyeni tilute kuyakine. Tilute kuminzi ya pafupi kuti nikalalikilesoti kwamene uko, chifukwa niwela kuzachita vamene ivi.”
39 Yove eluta chendi ndipo enzelalikila mmalo ŵawo opemphelela mu Galileya monse komasoti enzefumya viŵanda.
40 Kwamene ukosoti munthu muyakine wamankhutu efwika kuli yove ndipo egwada pansi nomupapatila kuti: “Nuziŵa kuti keno mufuna, mungakwanishe kunipojeka.”
41 Yesu pechimvwa vamene ivo, echita chifundo mwakuti etambulula kwanja yake nomukumya ndipo emuuja kuti: “Eye nufuna. Pola.”
42 Nthawe yamene iyo mankhutu ŵake esila, ndipo epola.
43 Pavuli pake emupasa malangizo amphamvu ndipo nthawe yamene iyo emuuja kuti alute.
44 Emuuja kuti: “Samala, osati uuje aliyense vamene ivi, koma ulute ukawonekele kuli wansembe ndipo chifukwa chakuti wapola, ukapeleke vinthu vechilamula Mose, kuti unkhale umboni kuli ove.”
45 Koma pechifumapo, munthu wala eyamba kulengeza vamene ivo paliponse nofalisa nkhani yamene iyo mmadela ayakine. Vamene ivi vichitisha kuti Yesu osati akwanishesoti kuloŵa mu tauni iliyonse mowonekela mwakuti enzenkhala kunja kuliye ŵanthu. Koma ŵanthu enzewela mphela kuli yove kufumila kumbali zonse.
Malizu a m'nyansi
^ Mu Chigiliki, “pamenso pako.”
^ Mawu amene aŵa ali mu munkutilamawu Maliko eŵatola pa Malaki 3:1.
^ Olo kuti, “enzeŵavwivwika; enzeŵambija.”
^ M’Baibolo, “nyanja ya Galileya” yuitiwasoti na mazina akuti, nyanja ya Kineleti, nyanja ya Genesaleti komasoti nyanja ya Tibeliyo.
^ Mu Chigiliki, “enzeupye muŵili.”
^ Mabaibolo ayakine onena kuti, “venzemuziŵa kuti ni ŵani.”
