Wilembewa na Maliko 10:1-52
-
Ukwati komasoti kusila kwa banja (1-12)
-
Yesu edalisa ŵana (13-16)
-
Konsho ya munthu wolemela (17-25)
-
Vinthu vatufunikila kulitana chifukwa cha Ufumu (26-31)
-
Yesu elaŵililatusoti vokhuza imfwa yake (32-34)
-
Kusenga kwechichita Yakobo na Yohani (35-45)
-
Yesu epeleka dipo kuti awombole ŵanthu anyinji (45)
-
-
Batimeyu wamene enzelolalini epojekewa (46-52)
10 Pechifuma kwamene uko eluta kumalile a Yudeya kusilya iyakine ya Yolodano. Kwamene uko soti gulu ya ŵanthu iungana kuli yove. Monga mwa nthawe zonse Yesu eyambasoti kuŵaphunzisa.
2 Lomba Afalisi ewela kuli yove na cholinga chakuti amuyese. Ove emukonsha keno venze vololeka kuti mwanalume aleke mwanakazi wake.
3 Yove eŵakonsha kuti: “Kansi Mose ekulamulani chinji?”
4 Ove enena kuti: “Mose elola kuti mwanalume akolemba chikalata chosilijila ukwati nomuleka mwanakazi wamene uyo.”
5 Koma Yesu eŵauja kuti: “Chifukwa cha kuyuma mitima kwanu yove ekulembelani lamulo yamene iyi.
6 Koma kufumila pachiyambi pa chilengedwe, ‘Mulungu eŵalenga mwanalume na mwanakazi.
7 Chifukwa cha vamene ivi mwanalume azasiye atata ŵake na amayi ŵake,
8 ndipo aŵili amene awo azankhale muŵili umo,’ mwakuti onkhalalini soti aŵili koma muŵili umo.
9 Tetyo chawamanga Mulungu pamozi,* munthu osati achipatule.”
10 Pechiloŵasoti m’ng’anda, ophunzila ŵake eyamba kumukonsha za nkhani yamene iyi.
11 Yove eŵauja kuti: “Aliyense waleka mwanakazi wake nolungula muyakine, wachita chigololo ndipo wamuphoniyela mwanakazi wamene uyo.
12 Ndipo keno mwanakazi wakana mwanalume wake nolunguliwa na muyakine, wachita chigololo.”
13 Lomba ŵanthu eyamba kumuletela ŵana atontho-atontho kuti aŵakumye na manja ŵake, koma ophunzila amene awo eŵakalipila.
14 Yesu pechiwona vamene ivi ekalipa ndipo eŵauja kuti: “Alekeni ŵana amene awo awele kuli newo, osaŵalesha. Chifukwa Ufumu wa Mulungu ni wa ŵanthu monga namene aŵa.
15 Shuwa nukuujani, aliyense asalondela Ufumu wa Mulungu monga ni mwana ntontho azaloŵemolini mu Ufumu wamene uyo.”
16 Lomba etola ŵana amene awo mmanja mwake ndipo eika manja ŵake pali ove noyamba kuŵadalisa.
17 Penzefuma kwamene uko, mwanalume muyakine emuutukila nogwada pa menso pake. Pavuli pake emukonsha kuti: “Mphunzisi muweme, nichite tyani kuti nikafwane moyo wosasila?”
18 Yesu emuyankha kuti: “Ndaŵa yanji uniita kuti muweme? Paliye muweme, koma Mulungu yeka.
19 Wewo uziŵa malamulo a kuti: ‘Osapaya munthu,* osachita chigololo, osaiŵa, osapeleka umboni wawenye, osaiŵila munthu mwachinyengo komasoti yakuti mukolemekeza atata ŵanu na amayi ŵanu.’”
20 Munthu wamene uyo emuyankha kuti: “Mphunzisi, vonse vamene ivi nankhala nuvikonkheja kufumila nili ntontho.”
21 Yesu emulolesha ndipo emukonda. Pavuli pake emuuja kuti, “Chinthu chimozi chikalishota mphela muli wewo: Nkhoya ukagulise vinthu vauli navo ndipo ndalama zake ukapase osauka. Ukachita tetyo unkhale na chuma kululu, pavuli pake uwele uzankhale wophunzila wangu.”
22 Koma yove pechimvwa mawu amene awo ekhumudwa ndipo efumapo ali na chisoni, chifukwa enze na katundu unyinji.
23 Yesu pechilolesha uku na uku, euja ophunzila ŵake amene awo kuti: “Vizankhale vovuta ngako kuti ŵanthu a ndalama azaloŵe mu Ufumu wa Mulungu!”
24 Koma ophunzila amene awo edabwa na mawu ŵake amene awo. Lomba Yesu eŵauja kuti: “Mwewo ŵanamwe, kuloŵa mu Ufumu wa Mulungu ni kovuta ngako!
25 Ni vosavuta kuti ngamila iloŵe pa kabowo ka nsingano kusiyana nakuti munthu wolemela aloŵe mu Ufumu wa Mulungu.”
26 Ove edabwa ngako ndipo emukonsha* kuti: “Lomba angapulumuke niŵani?”
27 Yesu eŵaloleshesha noŵauja kuti: “Kuli ŵanthu vamene ivi n’vosakwanishika, koma vililini tetyo kwa Mulungu chifukwa vinthu vonse n’vokwanishika kwa Mulungu.”
28 Petulo eyamba kumuuja kuti: “Onani! Sewo tasiya vinthu vonse nokukonkhelelani.”
29 Yesu enena kuti: “Shuwa nukuujani, paliye wasiya ng’anda, enekwake, azilongosi, amama, atata, ŵana olo minda chifukwa cha newo komasoti chifukwa cha uthenga uweme,
30 wamene palipano afwanelini vinyinji kuwelejela maulwendo 100 mu nthawe* ino. Yove afwane ng’anda, enekwake, azilongosi, amama, ŵana na minda, komasoti atamanishiwe, ndipo mu nthawe ikuza, azafwane moyo wosasila.
31 Koma anyinji amene ni oyambilila azankhale osilijila ndipo osilijila azankhale oyambilila.”
32 Lomba epitilija ulwendo wawo wakuya ku Yelusalemu ndipo Yesu enze pasogolo pawo. Ophunzila amene awo edabwa ngako ndipo ŵanthu enzemukonkhelela eyamba kuchita wowa. Kachiŵili soti etola ophunzila ŵake 12 ŵala noluta nawo pambali noyamba kuŵauja vinthu ivi vamene venze visala patontho kuti vimuchitikile:
33 “Lomba tikuya ku Yelusalemu ndipo Mwana wa munthu akapelekewe kuli ansembe akulu-akulu na alembi. Ove akamuweluze kuti apaiwe ndipo akamupeleke kuli ŵanthu amitundu iyakine.
34 Ove akamuchitile vinthu viipa, kumutila mata, kumukwapula nomupaya, koma pakazapita masiku atatu, azauke.”
35 Lomba Yakobo na Yohani, ŵana analume a Zebedayo, eluta kuli yove nomuuja kuti: “Mphunzisi tufuna kuti mutichitile chilichonse chatingakusengeni.”
36 Yove eŵakonsha kuti: “Mufuna nikuchitileni chinji?”
37 Ove emuyankha kuti: “Mutilole kuti mmozi wa sewo azankhale ku kwanja yanu ngayo ndipo muyakine azankhale kumanjele kwanu mu ulemelelo wanu.”
38 Koma Yesu eŵauja kuti: “Muziŵalini chamusenga. Kansi mungamwe vanukumwa newo olo kubatiziwa ubatizo wanubatiziwa newo?”
39 Ove emuyankha kuti: “Eye tingachite tetyo.” Pamene apo Yesu eŵauja kuti: “Vanukumwa newo muzamwe chendi ndipo muzabatiziwe chendi ubatizo wanubatiziwa newo.
40 Koma ninelini woyenelela kusankha wamene akuti azankhale ku kwanja yangu ngayo olo yamanjele. Atata ŵangu azapeleke mwayi wamene uyo kuli ŵanthu ŵechikonzela.”
41 Ophunzila ayakine 10 ŵala pechimvwa vamene ivi, ekalipa ngako chifukwa cha Yakobo na Yohani.
42 Koma Yesu eŵaita noŵauja kuti: “Mwewo muziŵa kuti amene owoneka monga* olamulila ŵanthu amitundu iyakine, okandilila ŵanthu ŵawo ndipo akulu-akulu ŵawo owonesha mphamvu zawo pali ove.
43 Vufunikalini kunkhala teti pakati panu. Koma aliyense wamene ofuna kuti ankhale nkulu pakati panu ofunikila kunkhala ntumiki wanu.
44 Ndipo wamene ofuna kuti ankhale woyamba pakati panu ofunikila kunkhala wantchito wa onse.
45 Chifukwa olo Mwana wa munthu aliyewele kuzatumikiliwa koma kuzatumikila na kuzapeleka moyo wake dipo* kuti awombole ŵanthu anyinji.”
46 Pavuli pake efwika ku Yeliko. Koma yove na ophunzila ŵake komasoti gulu ikulu penzefuma mu Yeliko, Batimeyu (mwana wa Timeyu) wosenga-senga wamene enze na vuto yosalola, enkhala pansi mmbali mwa nsewu.
47 Pechimvwa kuti Yesu Mnazaleti opita, Batimeyu eyamba kuŵilikija kuti: “Yesu, Mwana wa Davite, nichitileni chifundo!”
48 Pechichita tetyo ŵanthu anyinji eyamba kumuzuzula nomuuja kuti ankhale chelele. Koma akachita tetyo niyesoti penzeŵilikija ngako kuti: “Mwana wa Davite, nichitileni chifundo!”
49 Tetyo Yesu epanama nonena kuti: “Muujeni awele kuno.” Ove euja munthu wamene uyo asalola kuti: “Tang’a ntima, panama, okuita.”
50 Tetyo yove eponya kutali malaya ŵake akunja ndipo epanama mokulumija noluta kwenze Yesu.
51 Lomba Yesu emukonsha kuti: “Ufuna kuti nikuchitile chinji?” Munthu wamene uyo enze na vuto yosalola eyankha kuti: “Rab·boʹni,* niyavyeni kuti niyambe kulola.”
52 Yesu emuuja kuti: “Nkhoya. Chikhulupililo chako chakupojeka.” Nthawe yamene iyo eyamba kulola, ndipo eyamba kukonkhelela Yesu mu nsewu.
Malizu a m'nyansi
^ Mu Chigiliki, “chawamanga mu djoko imozi.”
^ Kupaya kunenewa apa ni kupaya munthu mochitakonzekela osati mwalamulo.
^ Mabaibolo ayakine onena kuti, “ekonshana.”
^ Onani matanthauzo a mawu ayakine.
^ Olo kuti, “amene oziŵika kuti.”
^ Onani matanthauzo a mawu ayakine.
^ Kutanthauza, “Mphunzisi.”
