Wilembewa na Maliko 11:1-33
11 Ove pechifwika kufupi na ku Yelusalemu, ku Betefage na ku Betaniya pa lupili ya Maolivi, Yesu etumija ophunzila ŵake aŵili.
2 Yove eŵauja kuti: “Lutani mmunzi uyo wamuwona ndipo mukayaloŵa mwamene umo mukafwane bulu ntontho mwanalume ali mangilile wakaliye kwelapo munthu kufumila poyamba. Mukamumasule nowela naye kuno.
3 Munthu muyakine akayakukonshani kuti, ‘Ndaŵa yanji mumumasula bulu wamene uyu?’ Mukanene kuti, ‘Ambuye omufuna ndipo akayasilija kumukatishila ntchito amujoshele nthawe yamene iyo.’”
4 Tetyo ove enyamuka ndipo emufwana chendi bulu mwanalume alimangilile pamulyango, mmbali mwa nsewu utontho. Ndipo ove emumasula bulu wamene uyo.
5 Koma ayakine mwa ŵanthu amene enzepaname pamene apo eŵakonsha kuti: “Cholinga chanu n’chinji pamumasula bulu wamene uyu?”
6 Ove eŵauja vechinena Yesu ndipo eŵalola kuti alute.
7 Ŵanthu amene awo eleta wala bulu kuli Yesu. Pavuli pake eyanjika malaya ŵawo akunja pa nsana pa bulu wamene uyo ndipo yove ekwelapo.
8 Komasoti ŵanthu anyinji eyanjika malaya ŵawo akunja mu nsewu ndipo ayakine etenda vitepo mminda.
9 Lomba amene enze pasogolo komasoti enzewela mmvuli enzeŵilikija kuti: “M’pulumusheni! Wodalisiwa ni wamene akuza mu zina ya Yehova!
10 Wodalisiwa ni Ufumu wa atata ŵasu Davite wamene uyo ukuza! M’pulumusheni kululu kwamene uko!”
11 Yove eloŵa mu Yelusalemu nofwika m’kachisi. Lomba elolesha-lolesha vinthu vonse, koma pakuti nthawe yenze isila kale, eluta ku Betaniya pamozi na ophunzila ŵake 12 ŵala.
12 Nsiku yokonkhapo penzefuma ku Betaniya, echimvwa njala.
13 Lomba ali patali ewona chimuti cha nkhuyu chamene chenze na matepo. Yove eluta pamene apo kuti akawone keno angafwanemo kanthu. Koma pechifwika pachimuti chamene icho, aliyefwanemo chilichonse, koma matepo ŵeka tyala, chifukwa yenzelini nthawe ya nkhuyu.
14 Tetyo yove euja chimuti chamene icho kuti: “Munthu azalyelinisoti vitwazi vako mpaka kale-kale.” Ndipo ophunzila ŵake enzetetekela.
15 Lomba ove efwika ku Yelusalemu. Kwamene uko eloŵa m’kachisi noyamba kupitikisha ŵanthu amene enzegulisa nogula vinthu m’kachisi mwamene umo, ndipo egadabula mathebo a ŵanthu amene enzesintha ndalama komasoti mabenje a ŵanthu amene enzegulisa nkhunda.
16 Yove aliyelole kuti aliyense aloŵe m’kachisi mwamene umo alitakule ntolo.
17 Yove enzephunzisa nouja ŵanthu amene awo kuti: “Kansi Malemba onenalini kuti, ‘Ng’anda yangu izaitiwe kuti ng’anda yopemphelelamo ŵanthu amitundu yonse’? Koma mwewo mwaiyalusha nkhwema ya akawalala.”
18 Ansembe akulu-akulu na alembi echimvwa vamene ivo, ndipo eyamba kusakila-sakila mwangamupaile chifukwa enzemuyopa pakuti gulu yonse ya ŵanthu yenzedabwa na venzephunzisa.
19 Chakunchingulo kwa nsiku yamene iyo, ove efumamo mu tauni yamene iyo.
20 Koma mmamawa penzepita, ewona kuti chimuti chala cha nkhuyu chafota kale na miju kumo.
21 Tetyo Petulo echikumbukila chimuti chamene icho ndipo enena kuti: “Labi, onani! Chimuti chala cha nkhuyu chemwitembelela chafota.”
22 Yesu eŵayankha kuti: “Mukokhulupilila Mulungu.
23 Shuwa nukuujani kuti aliyense wouja lupili iyi kuti, ‘Nyamuka pano ukaliponye m’nyanja,’ ndipo okaikilalini mu ntima mwake koma ali na chikhulupililo kuti vawanena vichitike chendi, vizachitike chendi.
24 N’chifukwa chake nukuujani kuti, vinthu vonse vamusenga novipemphelela, mukokhulupilila kuti mwavilondela kale ndipo muzavilondele chendi.
25 Ndipo mukapanama nopemphela, mukokhululuka chilichonse chechikuphoniyelani munthu muyakine, kuti Atata ŵanu akululu akukhululukilenisoti machimo ŵanu.”
26 ——
27 Pavuli pake efwikasoti ku Yelusalemu. Ndipo penzeyenda m’kachisi ansembe akulu-akulu, alembi na akulu ewela
28 nomukonsha kuti: “Kansi muli na ulamulilo wochitila vinthu vamene ivi? Olo niŵani ekupasani ulamulilo wamene uyu?”
29 Yesu eŵayankha kuti: “Nikukonsheni konsho imozi. Muniyankhe, ndipo nanesoti nikuujeni enipasa ulamulilo wanuchitila vinthu vamene ivi.
30 Kansi ubatizo wenzechita Yohani wenze wofumila kululu olo ku ŵanthu? Niyankheni.”
31 Tetyo ove eyamba kukambilana kuti: “Tikalaŵila kuti, ‘Wifumila kululu,’ atikonshe kuti, ‘Lomba ndaŵa yanji muliye mukhulupilile?’
32 Koma kansi tinganene kuti ‘Wifumila ku ŵanthu’?” Ove enzeyopa gulu ya ŵanthu, chifukwa ŵanthu onse amene awo enzekhulupilila kuti Yohani enze chendi mneneli.
33 Tetyo ove eyankha Yesu kuti: “Tuziŵalini.” Yesu eŵauja kuti: “Nanesoti nikuujenilini enipasa ulamulilo wanuchitila vinthu vamene ivi.”
