Wilembewa na Maliko 12:1-44
12 Pavuli pake eyamba kulaŵila nawo pokatishila ntchito mafanizo kuti: “Munthu muyakine elima munda wa mpesa nomanga mpanda kuzenguluka munda wamene uyo komasoti ekumba chisengu chokandilamo mphesa nomanga nsanja. Pechichita tetyo eusiya mmanja mwa alimi noluta ku chalo chiyakine.
2 Lomba nthawe ya vitwazi peikwana, etumija wantchito wake kuli alimi amene awo kuti akamupaseko viyakine mwa vitwazi va mmunda wa mpesa wamene uyo.
3 Koma ove emukata nomuniyata ndipo emujosha aliye kanthu.
4 Yove etumijasoti wantchito muyakine kuli ove koma wameneyu emutema mmutu komasoti kumuchitila viipa.
5 Etumijasoti muyakine koma wamene uyu emupaya. Lomba etumijasoti antchito ayakine anyinji. Ayakine a ove eŵaniyata ndipo ayakine eŵapaya.
6 Yove esala tyala na mmozi wakuti amutumije, mwana wake wapantima. Tetyo emutumija chendi nolaŵila kuti, ‘Mwana wangu uyu yeka akamulemekeze.’
7 Koma alimi amene awo eyamba kupangana kuti, ‘Yaa! Uyu niye akuti azalondele chuma. Welani, tiyeni timupaye ndipo chuma chamene icho chizankhale chasu.’
8 Tetyo emukata nomupaya ndipo emutaya kunja kwa munda wa mpesa wamene uyo.
9 Kansi munecho wa munda wamene uyo azachite chinji? Yove azawele nopaya alimi amene awo ndipo munda wa mpesa wamene uyo azaupeleke kuli ayakine.
10 Kansi mukaliye ŵelengako vayunena lemba? Pala yunena kuti: ‘Mwala wechikana omanga ng’anda wankhala mwala wapakona wofunika ngako.*
11 Wamene uyu wafumila kwa Yehova ndipo ni wodabwisa mmenso mwasu.’”
12 Pechimvwa vamene ivo enzefuna kumukata,* koma eyopa gulu ya ŵanthu chifukwa ove eziŵa kuti yove enena fanizo yamene iyo penzeganizila za ove. Tetyo echingomusiya nofumapo.
13 Pavuli pake emutumijila ayakine mwa Afalisi na ŵanthu amene enzekonkhelela Helode kuti akamupezele vifukwa pa vinthu vangalaŵile.
14 Pechifwika, ove emuuja kuti: “Mphunzisi, tuziŵa kuti mwewo mulaŵila vachendi ndipo muchitalini vinthu pofuna tyala kukondwelesha munthu, chifukwa muloleshalini mawonekedwe a ŵanthu koma muphunzisa njila ya Mulungu mokatijana na choonadi. Kansi n’vololeka kupeleka nsonkho kwa Kaisala olo yayi?
15 Kansi tikopeleka olo yayi?” Yesu eziŵa chinyengo chawo ndipo eŵakonsha kuti: “Ndaŵa yanji muniyesa? Letani kuno ndalama ya dinali niiwone.”
16 Ove emuletela ndipo yove eŵakonsha kuti: “Kansi chinso ichi na mawu ŵake aŵa ni vaŵani? Ove eyankha kuti: Ni va Kaisala.”
17 Tetyo Yesu enena kuti: Pelekani vinthu va Kaisala kwa Kaisala koma va Mulungu kwa Mulungu.” Ndipo ove edabwa naye ngako.
18 Pavuli pake Asaduki amene onena kuti akufwa azaushiwelini, ewela nomukonsha kuti:
19 “Mphunzisi, Mose etilembela kuti keno mwanalume wamwalila nosiya mwanakazi koma osasiya mwana, nkwake ofunika kutola mwanakazi wamasiye wamene uyo nomuvyalila ŵana wala nkwake.
20 Lomba penze analume 7 pa ukwawo. Woyamba elungula mwanakazi, koma emwalila osasiya ŵana.
21 Wachiŵili elungula mwanakazi wamene uyo, koma nayesoti emwalila osasiya mwana. Vichitikasoti chimozi-mozi kuli wachitatu.
22 Ndipo onse 7 ŵala aliyesiye mwana. Posilijila pake mwanakazi wala emwalilasoti.
23 Kansi pamene apa, akufwa akazaushiwa mwanakazi wamene uyo azankhale wa ŵani? Pakuti onse 7 emulungula.”
24 Yesu eŵayankha kuti: “Muphoniyesha. Kansi kuphoniyesha kwamene uku ni chifukwalini chakuti muziŵalini Malemba olo mphamvu ya Mulungu?
25 Chifukwa akufwa akazaushiwa, analume azalungulelini ndipo anakazi azalunguliwelini, koma azankhale monga na angelo akululu.
26 Koma pa mfundo yakuti akufwa oushiwa, kansi mwewo muliyeŵelenge m’buku ya Mose mu nkhani yokhuza chizambwa chaminga kuti Mulungu emuuja kuti: ‘Newo nine Mulungu wa Abulahamu, Mulungu wa Isaki na Mulungu wa Yakobo’?
27 Yove ni Mulungu wa ŵanthu amoyo, osati akufwa. Muphoniyesha ngako mwewo mwa ŵanthu.”
28 Mmozi wa alembi wamene efwika noŵamvwa oshushana, eziŵa kuti eŵayankha bwino. Tetyo ekonsha Yesu kuti: “Kansi lamulo yoyamba* ni yotyani pa malamulo onse?”
29 Yesu eyankha kuti: “Yoyamba niyakuti, ‘Mvwani mwewo Aisilaeli, Yehova Mulungu wasu ni Yehova mmozi.
30 Mukokonda Yehova Mulungu wanu na ntima wanu wonse, moyo wanu wonse, maganizo ŵanu onse na mphamvu zanu zonse.’
31 Yachiŵili ni iyi, ‘Ukokonda muyako monga ni mwaulikondela weka.’ Paliye lamulo iyakine ikulu kupambana amene aŵa.”
32 Mulembi wamene uyo enena kuti: “Mphunzisi, mwalaŵila luweme mokatijana na choonadi, yove ni mmozi ndipo paliyesoti Mulungu muyakine kupatulapo yove.’
33 Ndipo kukonda Mulungu na ntima wonse, maganizo onse, mphamvu zonse komasoti kukonda muyako monga ni mwaulikondela weka, n’vofunika ngako kupambana nsembe zonse zoputija za mphumbulu na nsembe ziyakine.”
34 Yesu pechiziŵa kuti mulembi wamene uyo wayankha mwanzelu, emuuja kuti: “Wewo ulilini kutali na Ufumu wa Mulungu.” Koma paliye aliyense etang’a ntima kuti amukonshesoti.
35 Koma lomba Yesu penzephunzisa m’kachisi enena kuti: “Ndaŵa yanji alembi onena kuti Khilisitu ni mwana wa Davite?
36 Kupitila mu mzimu utuŵa Davite wamene uyo enena kuti, ‘Yehova euja Ambuye ŵangu kuti: “Nkhala ku kwanja yangu ngayo mpaka nizaike adani ŵako pansi pa mendo ŵako.’”
37 Davite wamene uyo emuita kuti Ambuye, lomba vingakwanishike tyani kuti ankhale mwana wake?” Ndipo gulu ikulu ya ŵanthu yenzemutetekela mosangalala.
38 Pophunzisa pamene apo Yesu enenasoti kuti: “Chenjelani na alembi amene okonda kuyenda-yenda alivwale mikhanjo komasoti okonda kupasiwa moni mmamaketi.
39 Okondasoti kunkhala mmipando ya kusogolo* mmalo opemphelela komasoti mmalo olemekezeka ngako pachakulya cha nchingulo.
40 Ove olonda chuma cha anakazi* amasiye ndipo opeleka mapemphelo atali-atali pofuna kuliwoneshela. Ŵanthu amene aŵa azalondele chilango choŵaŵa ngako.”*
41 Lomba enkhala pansi pa malo ŵenzekwanisha kuwona moponyamo vopeleka* ndipo eyamba kuwona mweyenze ponyela gulu ya ŵanthu ndalama moponyamo vopeleka mwamene umo. Ewona ŵanthu anyinji olemela oponyamo ndalama zinyinji.
42 Pavuli pake pefwika mwanakazi wamasiye wosauka ndipo eponyamo tundalama tuŵili tutontho-tutontho tuliye mphamvu ngako.
43 Lomba Yesu eita ophunzila ŵake noŵauja kuti: “Shuwa nukuujani kuti mwanakazi wamasiye wosauka wamene uyu waponya zinyinji kupambana ayakine onse amene aponya ndalama moponyamo vopeleka.
44 Vili tetyo chifukwa onse amene aŵa aponya ndalama zatapa pa zinyinji zali nazo, koma mwanakazi wamene uyu, mu umphaŵi wake waponya zonse zenzenazo, eye zonse zamene sembe zamuyavya pa moyo wake.”
Malizu a m'nyansi
^ Mu Chigiliki, “mutu wa kona.”
^ Olo kuti, “kumumanga.”
^ Olo kuti, “yofunika ngako.”
^ Olo kuti, “mmipando iweme ngako.”
^ Mu Chigiliki, “Ove akulya mmang’anda ŵa anakazi.”
^ Olo kuti, “champhamvu.”
^ Olo kuti, “bokosi ya vopeleka.”
