Wilembewa na Maliko 13:1-37
13 Yesu penzefuma mu kachisi, mmozi wa ophunzila ŵake emuuja kuti: “Mphunzisi, onani mwazuwamijila izi ng’anda na myala!”
2 Koma Yesu emuuja kuti: “Kansi waziwona ng’anda zapalulu zamene izi? Pano pazasalelini mwala uliwonse palulu pa mwala uyake wamene ukuti uzaleke poneshewa.”
3 Pechinkhala pansi mu lupili ya Maolivi, kachisi penzewonekela luweme, Petulo, Yakobo, Yohani na Andileya emukonsha ali paŵeka kuti:
4 “Tiujeni, kansi vinthu vamene ivi vizachitike nthawe yanji ndipo chizindikilo chuwonesha kuti vinthu vonse vamene ivi vufwika kumapeto n’chinji?”
5 Tetyo Yesu eyamba kuŵauja kuti: “Samalani kuti munthu osati akuluŵilisheni.
6 Anyinji azawele mu zina yangu nonena kuti, ‘Khilisitu wala ni newo,’ ndipo azaluŵilishe ŵanthu anyinji.
7 Komasoti mukazakumvwa chongo cha nkhondo na malipoti a nkhondo, osati muzachite wowa. Vamene ivi vufunikila kuchitika chendi, koma mapeto azankhale kuti akaliye fwika mphela.
8 Ntundu uzayambane na ntundu uyakine ndipo ufumu uzayambane na ufumu uyakine. Kuzankhale vivomezi mmalo osiyana-siyana komasoti kuzankhale njala. Vamene ivi ni chiyambi cha mavuto akulu.*
9 Koma mwewo nkhalani ochenjela. Ŵanthu azalute namwe kumakhoti atontho-atontho ndipo azakukwapuleni mmalo opemphelela nokupanamikani pamenso pa magavana na mafumu chifukwa nimwe ophunzila ŵangu, kuti ove aphunzile za newo.
10 Komasoti poyamba uthenga uweme ufunikila kulalikiliwa ku ŵanthu a mitundu yonse.
11 Koma pakuluta namwe kuti akakupelekeni, osakulumija kudela nkhaŵa kuti mukalaŵile chinji. Vati mukapasiwe pa nthawe yamene iyo, mukalaŵile vamene ivo chifukwa ni mwewolini mukuti mukalaŵile, koma mzimu utuŵa.
12 Komasoti munthu azapeleke nkwake kuti apaiwe ndipo atata azapeleke mwana wawo. Ŵana azaukile makolo ŵawo ndipo azachitishe kuti apaiwe.
13 Ndipo ŵanthu onse azakuzondeni chifukwa cha zina yangu. Koma wamene akuti azapilile mpaka pa mapeto niye akuti azapulumuke.
14 Koma mukazawona chinthu chonyansa chuleta chiwonongeko chili paname pa malo ŵachisafunika kupanama (woŵelenga azaziŵe), pamene apo ali mu Yudeya azayambe kuthaŵila ku malupili.
15 Munthu wamene ali pa ntenje wa ng’anda osati azaseluke olo kuloŵa nkati kuyatola chinthu chilichonse m’ng’anda mwake mwamene umo.
16 Ndipo munthu wamene ali mmunda osati azajokele ku vinthu vawasiya mvuli kuyatola malaya ŵake akunja.
17 Soka kuli anakazi amavumo komasoti onyonsha ŵana mmasiku amene awo!
18 Pitilijani kupemphela kuti osati vizachitike mu nthawe yozizila.
19 Chifukwa masiku amene awo azankhale masiku a chisauso chamene chikaliye chitikapo kufumila pa chiyambi cha chilengedwe chechilenga Mulungu kuzafwika nthawe yamene iyo ndipo chizachitikelini soti.
20 Kulaŵila chendi, kuti Yehova aliye fupikishe masiku amene awo, sembe paliye angazapulumuka. Koma chifukwa cha osankhiwa ŵechisankha yove, wafupikisha masiku amene awo.
21 Komasoti pa nthawe yamene iyo, munthu akazakuujani kuti, ‘Onani! Khilisitu wala ali kuno,’ olo, ‘Onani! Ali uko,’ osati muzakhulupilile vamene ivo.
22 Chifukwa kuzawele ŵanthu amene otalijila wenye kuti ni Khilisitu komasoti aneneli awenye ndipo azachite vizindikilo komasoti vodabwisa kuti keno n’vokwanishika, azaluŵilishe osankhiwa amene awo.
23 Tetyo mwewo chenjelani. Newo nakuujilantuni vinthu vonse.
24 Koma mmasiku amene awo, chisauso chamene icho chikazakuti chasila, zuŵa izachite mfinzi ndipo mwezi uzawoneshelini kuŵala kwake.
25 Nyenyezi zizapone kufumila kululu ndipo mphamvu zili kululu zizanyang’anyike.
26 Pavuli pake ŵanthu azawone Mwana wa munthu akuza mmikumbi na mphamvu ikulu komasoti ulemelelo.
27 Lomba yove azatumije angelo ndipo azaunganije osankhiwa ŵake kufumila kumphepo 4, kufumila kwachulekejela chalo kuyafwikasoti kwachulekejela mmululu.
28 Lomba phunzilani vokhuza chimuti cha nkhuyu kufumila pa fanizo iyi: Msambo wake utete ukatumba nochita matepo, muziŵa kuti mainza ali pafupi.
29 N’chimozi-mozisoti na mwewo mukazawona vinthu vamene ivi vuchitika, muzaziŵe kuti yove ali pafupi, ali pa muliyango ngapo-ngapo.
30 Shuwa nukuujani kuti m’badwo wamene uyu uzasilelini wonse kufwa, mpaka vinthu vonse vamene ivi vizachitike.
31 Kululu na chalo vizachoke, koma mawu ŵangu azankhalepo mpaka kale-kale.
32 Ponena za nsiku yamene iyo olo nthawe yake, paliye oziŵa, olo angelo akululu olosoti Mwana, koma Atata ŵeka.
33 Nkhalani menso, nkhalani tchelu, chifukwa muziŵalini kuti nthawe yoikiliwatu izafwike nthawe yanji.
34 Ni volingana na munthu wamene akuya ku chalo chiyakine, wamene wasiya ng’anda mmanja mwa antchito ŵake, aliyense pa ntchito yake, nolamula kamalonda wapagedi kuti akonkhala tchelu.
35 Tetyo nkhalani mphela tuni chifukwa muziŵalini nthawe yakuti azawele munecho wa ng’anda. Muziŵalini keno azawele nchingulo, pakati pa usiku, mmatemwakucha* olo mmamawa,
36 kuti akazafwika mwazizizi, osati azakupezeni muyona.
37 Koma vamene ivi vanukuujani nuuja onse: Nkhalani menso.”
Malizu a m'nyansi
^ Olo kuti, “chiyambi cha mavuto akulu monga ni ululu wakumwa mwanakazi akasala patontho kuvyala.”
^ Mu Chigiliki, “akombwe olila.”
