Wilembewa na Maliko 14:1-72
-
Ansembe ekonza zakuti apaye Yesu (1, 2)
-
Etila Yesu mafuta onunkhila ngako (3-9)
-
Yudasi epeleka Yesu (10, 11)
-
Pasika wosilijila (12-21)
-
Eyambisha mwambo wa Chakulya cha Nchingulo cha Ambuye (22-26)
-
Elaŵililatu kuti Petulo azamukane (27-31)
-
Yesu epemphela ku Gesemani (32-42)
-
Yesu ekatiwa (43-52)
-
Epasiwa mulandu mu Khoti Ikulu ya Ayuda (53-65)
-
Petulo ekana Yesu (66-72)
14 Lomba kwenze kwisala masiku aŵili kuti Pasika na chikondwelelo cha mikate iliye vofufumisha vichitike. Ndipo ansembe akulu-akulu na alembi enze sakila-sakila njila yakuti akatishile ntchito pokata* Yesu mochenjela nomupaya.
2 Ove enzenena kuti: “Osati tizamukate pa chikondwelelo, kuyopela kuti ŵanthu angazachita nsokonezo.”
3 Pa nthawe yamene Yesu yenze ku Betaniya, m’ng’anda ya Simoni wamankhutu, kwiwela mwanakazi muyakine wamene enze na botolo ya mafuta onunkhila yopangiwa na mwala wa alabasitala. Mafuta amene aŵa enze nado ngaye-ngaye ndipo enze odula ngako. Yove esegula yala botolo ya alabasitala mochita kufwaya, noyamba kutila mafuta amene awo mmutu mwa Yesu.
4 Ŵanthu ayakine pechiwona vamene ivi, eyamba kuujana mokalipa kuti: “Ndaŵa yanji owononga teti mafuta onunkhila amene aŵa?
5 Mafuta onunkhila amene aŵa sembe agulisiwa na ndalama zopitilila madinali 300 ndipo ndalama zamene izo sembe zapelekewa kuli osauka!” Tetyo ove ekalipa ngako na mwanakazi wamene uyo.
6 Koma Yesu eŵauja kuti: “Mulekeni, ndaŵa yanji mumuvutisha? Yove wanichitila vinthu viweme.
7 Chifukwa osauka amene awo muŵe nawo nthawe zonse, ndipo mungakwanishe kuŵachitila viweme nthawe iliyonse yamwafuna. Koma newo muŵelini nane nthawe zonse.
8 Mwanakazi wamene uyu wachita vangakwanishe. Yove watililatu mafuta onunkhila pa muŵili wangu pokonzekela kuikiwa mmanda kwangu.
9 Shuwa nukuujani, kulikonse kwati ukalalikiliwe uthenga uweme pa chalo chonse, ŵanthu akolaŵila vawachita mwanakazi wamene uyu kuti akomukumbukila.”
10 Pavuli pake Yudasi Sikaliyoti, mmozi wa ophunzila 12 ŵala, efumapo noluta kuli ansembe akulu-akulu kuti akapeleke Yesu kuli ove.
11 Pechimvwa vamene ivo, ove esangalala ndipo emulonjeza kuti amupase ndalama za nsimbi. Tetyo yove eyamba kusakila-sakila mpata uweme kuti amupeleke.
12 Pa nsiku yoyamba ya chikondwelelo cha Mikate iliye Vofufumisha, pa nsiku yamene mwa mwambo enzepeleka nsembe ya nyama ya Pasika, ophunzila ŵake emukonsha kuti: “Kansi mufuna tikakukonzeleni kuni malo olyelako Pasika?”
13 Lomba Yesu etuma aŵili mwa ophunzila ŵake amene awo noŵauja kuti: “Nkhoyani mu tauni ndipo mwanalume muyakine akakumane namwe alitwike nongo ya manzi mukamukonkhelele,
14 ndipo m’ng’anda yati akaloŵe, mukauje munecho wa ng’anda wamene uyo kuti, ‘Mphunzisi wanena kuti: “Chipinda cha alwendo chili kuni mwaningalyele Pasika pamozi na ophunzila ŵangu?”’
15 Yove akakuwonesheni chipinda chikulu cha mmululu chokonzewa luweme. Mukatikonzele Pasika mwamene umo.”
16 Tetyo ophunzila amene awo eluta nakuyaloŵa mu tauni ndipo vichitika ndendende monga ni mwechiŵaujila. Ndipo kwamene uko ekonza vinthu vonse vofunikila pa Pasika.
17 Chakunchingulo, Yesu efwika pamozi na ophunzila ŵake 12 ŵala.
18 Ndipo pechinkhala pa thebo noyamba kulya chakulya, Yesu enena kuti: “Shuwa nukuujani, mmozi wa mwewo, wanikulya naye pamozi, anipeleke.”
19 Ove echimvwa chisoni ndipo eyamba kumukonsha yumo-yumo kuti: “Kansi ni newo payakine?”
20 Yove enena kuti: “Ni mmozi wa mwewo 12, wanutoŵela naye pamozi mmbale umu.
21 Mwana wa munthu afumepo, mokatijana na vakunena Malemba ponena za yove. Koma soka kuli munthu wamene opeleka Mwana wa munthu! Sembe vankhala luweme kuti munthu wamene uyu aliye vyalike.”
22 Penzepitilija kulya, yove etola nkate nopemphela kwa Mulungu. Pavuli pake eusuna-suna noŵapasa ndipo enena kuti: “Tolani, nkate uyu upanamila muŵili wangu.”
23 Pavuli pake etola kapu ya vinyu ndipo pechipemphela, eipeleka kuli ove mwakuti onse echimwa.
24 Lomba eŵauja kuti: “Vinyu wamene uyu upanamila ‘milopa yangu ya pangano,’ yamene ikuti izachekewe chifukwa cha ŵanthu anyinji.
25 Shuwa nukuujani, nizamwelini soti chakumwa chofumila ku mphesa mpaka nsiku yanikuti nizamwe chanyowani mu Ufumu wa Mulungu.”
26 Pamapeto pake, pechisilija kuimba nyimbo zotamanda Mulungu,* efuma noluta kulupili ya Maolivi.
27 Yesu eŵauja kuti: “Monse muniutuke nonisiya neka, chifukwa Malemba onena kuti: ‘Nizapaye chiŵeta ndipo mbelele zizamwajikane.’
28 Koma nikazauka kwa akufwa, nizatangule kuyafwika ku Galileya mwewo mukaliye fwikako.”
29 Koma Petulo eyankha kuti: “Olo ayakine onse angautuke nokusiyani, newo neka ningautukelini.”
30 Pamene apo Yesu emuyankha kuti: “Shuwa nukuuja wewo kuti lelo, usiku wamene uno, kombwe akaliyelila kaŵili, unikane katatu.”
31 Koma yove epitilija kunena kuti: “Keno n’kufwa, newo nifwe namwe pamozi, ningakukanenilini.” Ndipo ayakine onse eyamba kunenasoti chimozi-mozi.
32 Pavuli pake efwika pamalo oitiwa kuti Gesemani ndipo euja ophunzila ŵake amene awo kuti: “Nkhalani pansi pamene pano, newo nikuya kuyapemphela.”
33 Poluta kwamene uko etola Petulo, Yakobo na Yohani ndipo yove eyamba kumvwa chisoni komasoti kuvutika ngako mu ntima mwake.
34 Pavuli pake eŵauja kuti: “Newo nikumvwa* chisoni chakufwa nacho. Nkhalani pamene pano ndipo munkhale mphela tuni.”
35 Tetyo pechiluta pasogolo patontho egwada, mpaka chinso chake pansi ndipo eyamba kupemphela kuti keno venze vokwanishika, nthawe yamene iyi imupitilile.
36 Pavuli pake enena kuti: “Abba,* Atata. Vinthu vonse n’vokwanishika kuli mwewo. Nichoseleni kapu iyi. Komalomba osati mwakufuna kwangu, koma mwakufuna kwanu.”
37 Pechichita tetyo ejokela ndipo eŵafwana kuti oyona. Tetyo ekonsha Petulo kuti: “Simoni, n’chendi kuti uyona? Kansi uliye mphamvu kuti ungankhale mphela tuni kwa wani awa?
38 Nkhalani tuni ndipo mupitilije kupemphela kuti osati muloŵe mmayeselo. N’chendi, mzimu ni wofunishisha koma muŵili ni wofoka.”
39 Pechichita tetyo, efumaposoti noluta kuyapemphela ndipo enenasoti mawu amene ŵala.
40 Ejokelasoti noŵafwana kuti oyona, chifukwa vikope vawo venze vilemewa, tetyo ove esoŵa chomuyankha.
41 Ejokelasoti kachitatu noŵauja kuti: “Shuwa nthawe monga ni ino mungoyona nopumula? Mphela! Nthawe yakwana! Onani! Mwana wa munthu opelekewa mmanja mwa ŵanthu ochimwa.
42 Panamani, tiyeni takuya. Onani! Wonipeleka wala ali pafupi.”
43 Nthawe yamene iyo, akalilaŵila tetyo, Yudasi mmozi wa ophunzila 12 ŵala efwika pamozi na gulu ya ŵanthu kufumila kuli ansembe akulu-akulu, alembi na akulu alinyamule vibemba na vinkholi.
44 Apa n’kuti womupeleka wamene uyu enze eŵapasa chizindikilo chakuti: “Wati nikapase kisi ni wamene uyo mukamukate noluta naye ndipo muwonesheshe kuti osati athaŵe.”
45 Lomba Yudasi eluta sitiliti nofwika kuli yove. Pavuli pake enena kuti: “Labi!” Ndipo emupasa kisi.
46 Tetyo ove emukata nomumanga.
47 Koma mmozi mwa ŵanthu amene enzepaname pafupi esolola chibemba chake nochentchena nacho wantchito wa nkulu wa ansembe mpaka kutendelatu kwatu yake.
48 Koma Yesu eŵakonsha kuti: “Ndaŵa yanji mwawela kuzanikata mulinyamule vibemba na vinkholi monga mukuyalimbana na chigaŵenga?
49 Nsiku na nsiku nenze namwe m’kachisi nophunzisa, koma muliye nikate. Koma lomba ivi vuchitika kuti Malemba akwanilishiwe.”
50 Pevichitika tetyo ophunzila ŵake onse emuutuka nomusiya yeka.
51 Koma mulumbwana muyakine wamene echingovwinikila nyula iweme paliye chovwala chiyakine nkati, eyamba kumukonkhelela pafupi ndipo ŵanthu amene awo eyeja kuti amukate.
52 Koma mulumbwana wamene uyo eŵasiila mmanja nyula yake yala nothaŵa ali chinthaku.*
53 Lomba ove etola Yesu noluta naye kuli nkulu wa ansembe ndipo ansembe akulu-akulu komasoti akulu na alembi onse eungana kwamene uko.
54 Koma Petulo enzemukonkhelela aliko patali, mpaka efwika m’bwalo yapa ng’anda ya nkulu wa ansembe wamene uyo. Petulo wamene uyo enkhala pansi pamozi na antchito a m’ng’anda mwamene umo noyamba kuyota mulilo walululu.
55 Lomba ansembe akulu-akulu na Khoti yonse Ikulu ya Ayuda enzesakila-sakila umboni kuti ayopejele Yesu mulandu na cholinga chakuti amupaye, koma aliye ufwane.
56 Ŵanthu anyinji enzepeleka umboni wawenye kuti amuyopejele mulandu, koma maumboni ŵawo amene awo enzeshushana.
57 Komasoti, ŵanthu ayakine enzepanama nopeleka umboni womuyopejela kuti:
58 “Sewo timumvwa yove penzenena kuti, ‘Newo nizawishe kachisi uyu wamene emangiwa na manja ndipo mmasiku atatu ŵeka nizamange muyakine osati womangiwa na manja.’”
59 Komalomba olo pa mfundo zamene izi, umboni wawo wenze wosakatijana.
60 Pavuli pake, nkulu wa ansembe epanama pakati pawo nokonsha Yesu kuti: “Kansi uyankhelini? Kansi ukumvwalini vamene ivi vakukunena ŵanthu?”
61 Koma yove echingonkhala chelele osayankha chilichonse. Apasoti nkulu wa ansembe eyamba kumukonsha kuti: “Kansi niwe Khilisitu Mwana wa Wodalisiwa wamene uyo?”
62 Lomba Yesu enena kuti: “Eye, ninewo chendi, ndipo muzawone Mwana wa munthu alinkhale ku kwanja ngayo ya mphamvu. Muzamuwonesoti owela na mikumbi yakululu.”
63 Nkulu wa ansembe pechimvwa vamene ivi ekezula vovwala vake nonena kuti: “Lomba tingafunesoti mboni ziyakine pamene apa?
64 Mwalimvwila mweka mwakunyozela Mulungu. Muwona tyani pamene apa?” Onse enena kuti ofunikila kufwa mphela.
65 Ndipo ayakine eyamba kumutila mata, kumuvala kumenso nomukhoma nkhonyo. Ove enzemuuja kuti: “Lotela!” Pechimuniyata mbama, masodja apakhoti emutola.
66 Lomba Petulo penze m’nyansi, m’bwalo, kwiwela mmozi wa asimbi antchito a nkulu wa ansembe.
67 Pechiwona Petulo oyota mulilo, emuloleshesha nonena kuti: “Mwewosoti mwenze na Yesu, wala Mnazaleti.”
68 Koma yove ekana ponena kuti: “Numuziŵalini olo patontho munthu wamene uyu, ndipo numvwishalini vaulaŵila.” Pechiyankha tetyo efuma panja noluta pagedi.*
69 Kwamene ukosoti msimbi wantchito emuwona ndipo eyambasoti kuuja ŵanthu amene enzepaname pafupi kuti: “Aŵa amundala alisoti mu gulu ya ophunzila ŵake.”
70 Apasoti Petulo ekana. Papita kanthawe patontho, ŵanthu enzepaname pafupi eyamba kuuja Petulo kuti: “Shuwa wewosoti uli mu gulu ya ophunzila ŵake. Ndipo niwesoti Mgalileya.”
71 Koma yove eyamba kutembelela nolapa kuti: “Munthu wamene uyu wamunena newo numuziŵalini yayi.”
72 Nthawe yamene iyo kombwe elila kachiŵili ndipo Petulo ekumbukila ŵala mawu a Yesu akuti: “Kombwe akaliyelila kaŵili, uzanikane katatu.” Ndipo echimvwa chisoni noyamba kulila.
Malizu a m'nyansi
^ Olo kuti, “amangile.”
^ Olo kuti, “kuimba masalimo.”
^ Olo kuti, “Moyo wangu ukumvwa.”
^ Mawu a Chihebeli olo Chialamu otanthauza “Ababa,” olo kuti “Atata ŵangu!”
^ Olo kuti, “aliye vwale bwino-bwino; enzevwale vovwala va nkati veka.”
^ Olo kuti, “noluta pakang’anda kapagedi.”
