Wilembewa na Maliko 15:1-47
15 Mokulumija mmatemwakucha, ansembe akulu-akulu pamozi na akulu komasoti alembi, kutanthauza Khoti yonse Ikulu ya Ayuda,* eungana pamozi kuti akatijane vakuti amuchite Yesu. Pavuli pake emumanga noluta naye kuyamupeleka kwa Pilato.
2 Tetyo Pilato emukonsha kuti: “Kansi niwe Mfumu ya Ayuda?” Yove eyankha kuti: “Vili tetyo monga ni mwamwanenela.”
3 Koma ansembe akulu-akulu enzemulaŵilila vinthu vinyinji.
4 Lomba Pilato emukonshasoti kuti: “Kansi usoŵa choyankha? Ona kupaka kwa milandu yakukuyopejela.”
5 Koma Yesu paliyesoti chilichonse chechiyankha, mwakuti Pilato edabwa ngako.
6 Pa chikondwelelo chilichonse, Pilato enzemasula wa djeli mmozi wasenga ŵanthu.
7 Pa nthawe yamene iyo munthu muyakine zina yake Balaba enze mu djeli pamozi na ŵanthu oukila boma. Ove epaya munthu pa nthawe yenzeukila boma.
8 Tetyo gulu ya ŵanthu ifwika noyamba kusenga mokatijana na venzeŵachitila Pilato nthawe zonse.
9 Yove eŵakonsha kuti: “Kansi mufuna kuti nikumasulileni Mfumu ya Ayuda?”
10 Chifukwa Pilato enzeziŵa kuti ansembe akulu-akulu emupeleka chifukwa cha njilu.
11 Koma lomba ansembe akulu-akulu elimbikisa ŵanthu kusenga kuti aŵamasulile Balaba.
12 Poyankha Pilato eŵakonsha kuti: “Lomba uyu wamunena kuti ni Mfumu ya Ayuda, nichite naye chinji?”
13 Ove eŵilikijasoti kuti: “Apanyikiwe wamene uyo!”*
14 Koma Pilato epitilija kuŵakonsha kuti: “Ndaŵa yanji? Kansi yove wamene uyu waphoniya chinji?” Koma ŵanthu amene awo epitilija kuŵilikija mwamphamvu kuti: “Wamene uyo apanyikiwe mphela!”*
15 Pechichita tetyo, pofuna kukwanilisha venzefuna ŵanthu amene awo, Pilato eŵamasulila Balaba. Lomba elamula kuti Yesu akwapuliwe pavuli pake emupeleka kuti akamupaye pomupanyika pachimuti.
16 Masodja emutola noluta naye m’bwalo yapa ng’anda ya gavana. Kwamene uko eunganija gulu yonse ya masodja.
17 Lomba emuvwalika chovwala chisweta-chisweta ndipo eŵila chisote chachifumu chaminga nomuvwalika.
18 Lomba eyamba kumuŵilikija kuti: “Muli tyani, mwewo Mfumu ya Ayuda!”
19 Komasoti enzemuniyata mmutu na tete nomutila mata komasoti enzegwada nomuŵelamila.
20 Pechisilija kumunyoza kwamene uko, emuvula chala chovwala chisweta-chisweta nomuvwalika malaya ŵake akunja ndipo efuma naye noluta kuyamukhomelela pachimuti.
21 Komasoti ove ekakamija munthu muyakine wamene enzepita zina yake Simoni waku Kulene kuti amutakulile chimuti chake chotamanilapo.* Yove wamene uyu enzefumila kudela yakuminzi ndipo enze atata ŵake ŵa Alekizanda na Lufu.
22 Tetyo efwika naye pamalo oitiwa kuti Gologota. Mawu amene aŵa akaŵamasulila otanthauza kuti, “Malo a Chibade.”
23 Kwamene uko eyesa kumupasa vinyu woyavija na mule,* koma yove ekana.
24 Ndipo emukhomelela pachimuti noyaŵana malaya ŵake akunja pochita madjiki pa malaya amene awo, kuti awone changatole munthu aliyense.
25 Lomba nthawe peyenze cha mma 9 koloko mmawa,* ove emukhomelela pachimuti.
26 Mawu owonesha mulandu wechimupaila eŵalemba kuti: “Mfumu ya Ayuda.”
27 Komasoti ove epanyika pachimuti vigaŵenga viŵili pamozi na yove. Chimozi echipanyika ku kwanja yake ngayo ndipo chiyakine kumanjele.
28 ——
29 Ŵanthu enzepita pafupi enzenena mawu onyoza Yesu ndipo enzezunguja mitu yawo nonena kuti: “Wewo wenzenena kuti ungakwanishe kuwisha kachisi nomumanga mmasiku atatu,
30 lipulumushe poseluka pachimuti chotamanilapo chamene icho!”*
31 Chimozi-mozisoti ansembe akulu-akulu pamozi na alembi nawosoti enzemunyoza. Ove enzenena kuti: “Ayakine ekwanisha kuŵapulumusha koma kuti yove alipulumushe yeka vumukanga!
32 Lomba Khilisitu Mfumu ya Isilaeli, iseluke pachimuti chamene icho chotamanilapo,* kuti sewo tiwone nokhulupilila.” Navosoti vigaŵenga vechipanyikiwa navo pamozi venzemunyoza.
33 Nthawe peifwika cha mma 12 koloko nzuŵa* kwichita mfinzi chalo chonse chamene icho, mpaka 3 koloko nzuŵa.*
34 Cha mma 3 koloko mwamene umo, Yesu eŵilikija mwamphamvu kuti: “Eʹli, Eʹli, laʹma sa·bach·thaʹni?” Mawu amene aŵa akaŵamasulila otanthauza kuti: “Mulungu wangu, Mulungu wangu, mwanisiilanji newo?”
35 Ayakine mwa ŵanthu enzepaname chapafupi pechimvwa vamene ivo eyamba kulaŵila kuti: “Mvwani! Oita Eliya.”
36 Pavuli pake muyakine eutuka kuyavwivwika chinkhupule mu vinyu wowawasha ndipo eika ku tete nomupasa kuti amwe. Yove enena kuti: “Mulekeni! Tiwone keno Eliya angawele kuzamuselusha.”
37 Koma Yesu eŵilikija mokweja mawu ndipo esilijika.
38 Lomba nyula yochingilijila ya m’ng’anda yopatulika ikezuka pakati kufumila palulu mpaka pansi.
39 Lomba nsogoleli wa masodja enzepaname chapafupi mololeshana na Yesu, pechiwona vichitika pa nthawe yenzesilijika, enena kuti: “Shuwa munthu uyu enze chendi Mwana wa Mulungu.”
40 Penzesoti anakazi amene enzeloleshesha koma ali patali. Ayakine mwa ove enze Maliya waku Magadala, Maliya amayi ŵake a Yakobo Ntontho na Yose komasoti penze Salome,
41 wamene enzeyenda naye pamozi nomutumikila pa nthawe yenze ku Galileya. Penzesoti anakazi ayakine anyinji amene ewela naye pamozi kufumila ku Yelusalemu.
42 Lomba pakuti mwenze nchingulo ngako komasoti yenze nsiku yokonzekela, olo kuti nsiku yakuti mailo yake ni Sondo,
43 kwiwela Yosefe waku Alimateya, munthu woziŵika wa mu Khoti Ikulu ya Ayuda, wamenesoti enzeyembekezela Ufumu wa Mulungu. Yove eluta motang’a ntima kwa Pilato kuyasenga muŵili wa Yesu.
44 Koma Pilato enzekaikila kuti keno enze emwalila kale. Tetyo eitanisha nsogoleli wa masodja kuti amukonshe keno Yesu enze emwalila kale chendi.
45 Pechisimikijila kufumila kuli nsogoleli wa masodja wamene uyo, elola kuti Yosefe akatole muŵili wamene uyo.
46 Lomba Yosefe pechigula nyula iweme ngako nomuselusha, emuvunga pa nyula yamene iyo nomuika mmanda* ŵechichompha pa mwala. Pavuli pake egugulusha chimwala novala pa mulyango wa manda amene awo.
47 Koma Maliya waku Magadala na Maliya amayi ŵake a Yose, epitilija kololeshesha pamene apo pechiikiwa.
Malizu a m'nyansi
^ Mu Chigiliki, “Sanihedilini.”
^ Olo kuti, “Apaiwe popanyikiwa pachimuti!”
^ Olo kuti, “Apaiwe mphela popanyikiwa pachimuti!”
^ Onani matanthauzo a mawu ayakine.
^ Manzi onunkhila ofumila pachimuti amene nthawe ziyakine enzeŵakatishila ntchito popanga mafuta.
^ Mu Chigiliki, “awa yachitatu,” kuŵelenga kufumila mma 6 koloko mmawa.
^ Onani matanthauzo a mawu ayakine.
^ Onani matanthauzo a mawu ayakine.
^ Mu Chigiliki, “awa ya 6,” kuŵelenga kufumila mma 6 koloko mmawa.
^ Mu Chigiliki, “awa ya 9,” kuŵelenga kufumila mma 6 koloko mmawa.
^ Olo kuti, “mmanda achikumbukilo.”