Wilembewa na Maliko 2:1-28
2 Koma papita masiku atontho, Yesu eloŵasoti mu Kapelenawo ndipo ŵanthu echimvwa kuti ali pa ng’anda.
2 Tetyo ŵanthu anyinji eungana kwamene uko mwakuti penzevesoti malo onkhala, chifukwa ŵanthu ezula mpaka pa muliyango ndipo eyamba kuŵauja uthenga uweme.
3 Lomba kwiwela ŵanthu amene emuletela munthu wozizila vizo ndipo enyamuliwa na ŵanthu 4.
4 Koma chifukwa cha kupaka kwa ŵanthu aliye kwanishe kumufwisha pafupi na Yesu. Tetyo epasula pa ntenje sitiliti na penze Yesu, ndipo pechiboola pa ntenje pamene apo, eselushilapo machila a wala munthu wozizila vizo.
5 Yesu pechiwona chikhulupililo chawo, euja munthu wamene uyo wozizila vizo kuti: “Mwanawe, machimo ŵako akhululukiliwa.”
6 Lomba alembi ayakine enze pamene apo ndipo eyamba kuganiza mmitima mwawo kuti:
7 “Ndaŵa yanji munthu wamene uyu olaŵila teti? Onyoza Mulungu wamene uyu. Niŵanisoti muyakine angakhululukile machimo, ni Mulungu yekalini?”
8 Koma nthawe yamene iyo Yesu eziŵa mu ntima mwake kuti ove oganiza vamene ivo, ndipo eŵakonsha kuti: “Ndaŵa yanji muganiza vinthu vamene ivi mmitima mwanu?
9 Chosavuta n’chini, kuuja wozizila vizo wamene uyu kuti, ‘Machimo ŵako akhululukiliwa,’ olo kunena kuti, ‘Panama ndipo nyamula machila ŵako uyende’?
10 Koma kuti muziŵe kuti Mwana wa munthu ali na mphamvu pano pa chalo zokhululukila machimo—” pavuli pake euja wala munthu wozizila vizo kuti:
11 “Nulaŵila na wewo, Panama, tola machila ŵako amene aŵa ndipo ulute kwanu.”
12 Pevichitika tetyo munthu wamene uyo epanama ndipo nthawe yamene iyo enyamula machila ŵake amene awo noyenda yeka ŵanthu onse owona. Tetyo onse amene awo edabwa ngako ndipo etamanda Mulungu kuti: “Voteti tikaliye viwonapo.”
13 Pavuli pake yove elutasoti mmbali mwa nyanja. Gulu yonse ya ŵanthu ipitilija kuluta kuli yove ndipo eyamba kuŵaphunzisa.
14 Penzepita, ewona Levi mwana wa Alufeyo alinkhale mu ofesi yosonkheshelamo nsonkho, ndipo emuuja kuti: “Unkhale wophunzila wangu.” Nthawe yamene iyo enyamuka nomukonkhelela.
15 Nthawe iyakine, enzekulya chakulya m’ng’anda mwa Levi ndipo ŵanthu anyinji osonkhesha nsonkho komasoti ochimwa enzekulya pamozi na Yesu na ophunzila ŵake. Kwamene uko kwenze ŵanthu anyinji enzemukonkhelela.
16 Koma alembi ŵa Afalisi, pechiwona kuti Yesu akulya pamozi na ŵanthu ochimwa na osonkhesha nsonkho, eyamba kukonsha ophunzila ŵake kuti: “Ndaŵa yanji akulya pamozi na ŵanthu osonkhesha nsonkho komasoti ochimwa?”
17 Yesu pechimvwa vamene ivi eŵayankha kuti: “Ŵanthu asalwala ofunikilalini dokota, koma olwala niye omufuna. Niliyewele kuzaita ŵanthu olungama, koma ochimwa.”
18 Ophunzila a Yohani na Afalisi enzelekeja kulya. Tetyo ove ewela kuli yove nomukonsha kuti: “Ndaŵa yanji ophunzila a Yohani na ophunzila ŵa Afalisi olekeja kulya, koma ophunzila ŵanu olekejalini?”
19 Yesu eŵayankha kuti: “Ayake a mkwati ofunikalini kulekeja kulya keno mkwati wamene uyo ali nawo pamozi, kansi n’tetyo lini? Keno mkwati wamene uyo ali nawo pamozi angalekejelini kulya.
20 Koma masiku akuza pamene mkwati wamene uyo azafumyiwe pakati pawo ndipo pa nsiku yamene iyo azalekeje kulya.
21 Paliye angasonelele chigamba cha nyula yanyowani pa malaya ŵake akunja akale. Akachita vamene ivo, chigamba chamene icho chukweŵa nokezula malaya akale amene awo ndipo kukezuka kwamene uko kuyangijilika ngako.
22 Komasoti, paliye munthu wamene otila vinyu wanyowani mu vyola vachikumba vakale. Akachita vamene ivo, vinyu wamene uyo uphulisa vyola vamene ivo. Pavuli pake vinyu wamene uyo utaika ndipo vyola vamene ivo vuwonongeka. Koma ŵanthu otila vinyu wanyowani mu vyola vachikumba vanyowani.”
23 Yesu penzepita mminda ya tiligu pa nsiku ya Sondo, ophunzila ŵake eyamba kupulula ngala-ngala za tiligu noyamba kulya.
24 Tetyo Afalisi emuuja kuti: “Ona! Ndaŵa yanji ochita vinthu vamene ni vosafunika kuvichita pa nsiku ya Sondo?”
25 Koma yove eŵayankha kuti: “Kansi muliye ŵelenge vechichita Davite, pamozi na analume ŵenze nawo pechimvwa njala ndipo enzeveletu chilichonse?
26 Nkhani yunena za Abiyatala wansembe nkulu yunena kuti, Davite eloŵa m’ng’anda ya Mulungu ndipo echilya mitanda ya nkate wowonesha kwa Mulungu,* wamene aliyense enzefunikilalini kulya mokatijana na malamulo, koma ansembe ŵeka. Yove etola mitanda iyakine ya nkate wamene uyo nopasa analume ŵenze nawo pamozi. Kansi mwewo muliye ŵelenge nkhani yamene iyi?”
27 Pavuli pake eŵauja kuti: “Nsiku ya Sondo inkhalako chifukwa cha munthu, osati munthu chifukwa cha nsiku ya Sondo.
28 Tetyo Mwana wa munthu ni Munecho wa Sondo.”
Malizu a m'nyansi
^ Olo kuti, “nkate wachiwoneshelo.”
