Wilembewa na Maliko 3:1-35
3 Kachiŵilisoti Yesu eloŵa mmalo opemphelela. Mwamene umo mwenze munthu wolemala kwanja.
2 Lomba Afalisi enzemuloleshesha kuti awone keno angapojeke munthu wamene uyo pa nsiku ya Sondo na cholinga chakuti amupase mulandu.
3 Ndipo yove euja munthu wolemala kwanja wamene uyo kuti: “Panama, wela apa pakati.”
4 Pavuli pake Yesu eŵakonsha kuti: “Kansi malamulo olola kuchita chinji pa nsiku ya Sondo, chiweme olo chiipa? Kupulumusha moyo olo kupaya?” Koma ove echingonkhala chelele.
5 Yesu eŵalolesha mokalipa ndipo echimvwa chisoni ngako chifukwa cha kuyuma mitima kwawo. Pavuli pake euja munthu wamene uyo kuti: “Tambulula kwanja yako.” Yove etambulula chendi ndipo inkhala bwino-bwino.
6 Pechiwona vamene ivi Afalisi amene awo efuma ndipo nthawe yamene iyo eluta kuyapangana pamozi na ŵanthu enzekonkhelela Helode kuti amupaye.
7 Koma Yesu na ophunzila ŵake efumako noluta ku nyanja ndipo chigulu cha ŵanthu chofumila ku Galileya na ku Yudeya chimukonkhelela.
8 Olosoti ŵanthu anyinji ofumila ku Yelusalemu, ku Idumeya, kusilya kwa Yolodano komasoti ofumila mmadela aku Tulo na Sidoni, echimvwa vonse venzechita ndipo eluta kuli yove.
9 Ndipo yove euja ophunzila ŵake kuti amuletele bote itontho yakuti akwelemo kuti gulu ya ŵanthu yamene iyo osati imupanikije.
10 Pakuti enze epojeka ŵanthu anyinji, onse amene enze na matenda akulu emuunganila* kuti angomukumya.
11 Olosoti mizimu iipa, yenze kuti ikamuwona, yenzeliponesha pansi pamenso pake noŵilikija kuti: “Mwewo nimwe Mwana wa Mulungu.”
12 Koma moweleja-weleja yove eilamula mwamphamvu kuti osati imuulule.
13 Pavuli pake ekwela mulupili noita ŵanthu ŵenzefuna ndipo ove eluta kuli yove.
14 Tetyo esankha gulu ya ŵanthu 12, amenesoti eŵapasa zina yakuti atumwi, kuti akoyenda naye nthawe zonse komasoti kuti akoŵatuma kuyalalikila
15 noŵapasa mphamvu zakuti akofumya viŵanda.
16 Mu gulu ya ŵanthu 12 ŵala ŵechisankha mwenze Simoni, wamene emupasasoti zina yakuti Petulo,
17 Yakobo mwana wa Zebedayo na Yohani nkwake wa Yakobo (aŵili amene aŵa eŵapasasoti zina yakuti Bowanege, yamene yutanthauza “Ŵana a kulilima kwa Leza”),
18 Andileya, Filipo, Batulumeu, Mateyo, Thomase, Yakobo mwana wa Alufeyo, Tadeyo, Simoni Kananiya,*
19 na Yudasi Sikaliyoti, wamene pavuli pake echizamupeleka. Pavuli pake Yesu eloŵa m’ng’anda.
20 Kwamene uko gulu ya ŵanthu iunganasoti, mwakuti aliye kwanishe olo kulya chakulya.
21 Koma enekwake pechimvwa vamene ivo eluta kuyamukata chifukwa ove enzenena kuti: “Wasiluka.”
22 Komasoti alembi amene efumila ku Yelusalemu enzenena kuti: “Ali na Belezebule,* ndipo ofumya viŵanda na mphamvu ya wolamulila viŵanda.”
23 Tetyo pechiŵaita elaŵila nawo pokatishila ntchito mafanizo kuti: “Kansi Satana angafumye tyani Satana?
24 Keno ufumu wayaŵanika, ufumu wamene uyo ungankhalishelini.
25 Komasoti keno ng’anda yayaŵanika, ng’anda yoteti ingankhalishelini.
26 Molingana na vamene ivi, keno Satana waliukila yeka ndipo wayaŵanika, angankhalishelini koma akuya kumapeto.
27 Kulaŵila chendi, paliye angaloŵe m’ng’anda ya munthu wamphamvu noiŵa katundu wake keno poyamba angaleke mumanga munthu wamphamvu wamene uyo. Akachita tetyo niye pangakwanishe kutola katundu m’ng’anda mwamene umo.
28 Shuwa nukuujani, ŵana a ŵanthu azakhululukiliwe vinthu vonse, keno echita machimo otyani olo keno elaŵila mawu onyoza tyani.
29 Koma aliyense wamene wanyoza mzimu utuŵa azakhululukiliwelini mpaka kale-kale, koma azankhale na mulandu wa chimo yosasila.”
30 Elaŵila vamene ivi chifukwa ove enzemunena kuti: “Ali na mzimu uipa.”
31 Lomba pewela amayi ŵake nenekwake ndipo epanama panja notuma munthu kuti akamuite.
32 Gulu ya ŵanthu inkhala momuzenguluka ndipo ŵanthu amene awo emuuja kuti: “Amayi ŵanu nenekwanu ali apa panja okufunani.”
33 Koma yove eŵayankha kuti: “Kansi amayi ŵangu nenekwangu niŵani?”
34 Pavuli pake eloleshesha onse ŵala enzenkhale pansi momuzenguluka nonena kuti: “Onani! Amayi ŵangu nenekwangu ni aŵa.
35 Aliyense ochita vakufuna Mulungu, wamene uyo niye nkwangu, mulongosi wangu na amayi ŵangu.”
Malizu a m'nyansi
^ Olo kuti, “emumboma, emubungilila.”
^ Olo kuti, “wakhama.”
^ Ni zina iyakine yakuziŵika nayo Satana, wamene ni nkulu olo kuti wolamulila viŵanda.