Wilembewa na Maliko 4:1-41
4 Yesu eyambasoti kuphunzisa mmbali mwa nyanja ndipo chigulu cha ŵanthu chiungana pafupi na yove. Tetyo yove ekwela bote nonkhala mwamene umo pataliko patontho na penze ŵanthu amene awo, koma gulu yonse yamene iyo ya ŵanthu inkhala mmbali mwa nyanja yamene iyo.
2 Ndipo eyamba kuŵaphunzisa vinthu vinyinji pokatishila ntchito mafanizo. Penzeŵaphunzisa enzeŵauja kuti:
3 “Mvwani! Wokomola mbewu eluta kuti akakomole.
4 Penzekomola, mbewu ziyakine ziponela mmbali mwa msewu ndipo kwiwela tunyoni nozilya.
5 Ziyakine ziponela pa myala pamene penzeve ngako lito ndipo zimela mokulumija chifukwa lito yamene iyo yenze tyala palulu.
6 Koma zuŵa peiŵala ngako ziŵauka ndipo zifota chifukwa zenzeve miju.
7 Mbewu ziyakine ziponela pa minga ndipo minga yamene iyo ikula nokangisha mbewu zamene izo kukula mwakuti ziliye twale chitwazi chilichonse.
8 Koma ziyakine ziponela pa nthaka iweme ndipo zimela nokula, mwakuti ziyamba kutwala vitwazi. Mbewu iyakine itwala vitwazi 30, iyakine 60 ndipo iyakine 100.”
9 Pavuli pake eyangijila mawu akuti: “Wamene ali na matu akumvwa, amvwe.”
10 Lomba penze payeka, ŵanthu ayakine ŵenze nawo pafupi pamozi na atumwi 12 ŵala, eyamba kumukonsha vokhuza ŵala mafanizo.
11 Yove eŵauja kuti: “Mwewo mwapasiwa mwayi wakuti mumvwishe chisinsi chopatulika cha Ufumu wa Mulungu. Koma ŵala ali kunja oujiwa vonse pokatishila ntchito mafanizo
12 kuti kulola, akololesha chendi koma osati akowona. N’chendi kuti kumvwa akokumvwa, koma akokwanishalini kuziŵa tanthauzo yake. Komasoti kuti osati achinje nokhululukiliwa.”
13 Yove eŵaujasoti kuti: “Keno mumvwishalini fanizo yamene iyi, lomba mungamvwishe tyani mafanizo ayakine?
14 “Munthu wokomola wamene uyo, okomola mawu.
15 Tetyo mbewu zukomolewa mmbali mwa msewu ni mawu amene akomolewa mwa ŵanthu amene ochita akangokumvwa mawu amene awo, Satana owela nakuzachosa mawu akomolewa muli ove.
16 Molingana na vamene ivi, mbewu zakomolewa pa myala ni mawu amene akomolewa mwa ŵanthu amene ochita akangokumvwa mawu amene awo oŵalondela mosangalala.
17 Koma ove onkhala aliye miju ndipo ochiŵilila kwa nthawe itontho. Lomba akayamba kuvutishiwa olo kutamanishiwa chifukwa cha mawu amene awo, oleka.
18 Lomba palisoti mbewu ziyakine zamene zukomolewa pa minga. Amene aŵa ni ŵanthu akumvwa mawu,
19 koma nkhaŵa za moyo wa nthawe* ino, chinyengo cha mphamvu cha chuma komasoti kufunishisha vinthu viyakine, vuloŵa mmitima yawo nokangisha mawu amene awo kukula ndipo otwalalini vitwazi.
20 Posilijila, mbewu zikomolewa pa nthaka iweme ni ŵanthu amene omvwishila mawu ndipo oŵalondela luweme notwala vitwazi muyakine 30, muyakine 60, ndipo muyakine 100.”
21 Yove eŵaujasoti kuti: “Laiti oivwinikilalini na chitundu olo kuiyika kunyansi kwa bedi, kansi ochita tetyo? Koma oiyika pa choikapo laiti, kansi n’tetyolini?
22 Chifukwa paliye chinthu chofisika chamene chingazaleka ululika ndipo paliye chinthu chosungiwa mwachisinsi ngako chamene chingazaleka ululika.
23 Wamene ali na matu akumvwa, amvwe.”
24 Epitilija kuŵauja kuti: “Mvwishilani mosamala vanulaŵila. Mpimo wamupimilako ayanu, namwesoti azakupimileni na wamene uyo. Eye, azakuyangijileni vinyinji.
25 Chifukwa wala ali navo azapasiwe vinyinji, koma wala aliye, azalondewe olo vala valinavo.”
26 Yove epitilija kulaŵila kuti: “Ufumu wa Mulungu uli monga ni mwakumwajila mbewu munthu pa nthaka.
27 Munthu wamene uyo oyona usiku nouka kukacha ndipo mbewu zamene izo zumela nokula. Koma mwavuchitikila vamene ivi, munecho wamene uyo oziŵalini.
28 Patontho-patontho, nthaka yala payeka yutwala vitwazi. Poyamba tiligu okula, pavuli pake ofumya ngala-ngala, pamapeto pake menso okosa a tiligu owonekela mu ngala-ngala mwamene umo.
29 Koma mbewu zamene izo zikapya, yove oziseŵa na djeko chifukwa nthawe yoweja yakwana.”
30 Yove epitilija kuti: “Kansi Ufumu wa Mulungu tingaulinganije na chinji, olo tingaufotokoze na fanizo yotyani?
31 Uli monga ni kansele ka mpilu,* kamene pa nthawe yokomola konkhala katontho ngako kupambana nsele zonse za pano pa chalo.
32 Koma akakakomola, komela nokula kupambana mbewu zonse za kudimba ndipo kopanga misambo ikulu-ikulu, mwakuti tunyoni twa mmululu tukwanisha kufwana malo onkhala mu chinfule chake.”
33 Yove eŵauja mawu pokatishila ntchito mafanizo anyinji olingana na amene aŵa, mokatijana na vangakwanishe kumvwa.
34 Ni chendi, nthawe zonse yove enzelaŵila nawo pokatishila ntchito mafanizo, koma kumbali enzefotokoza vinthu vonse kuli ophunzila ŵake.
35 Nsiku yamene iyo nchingulo, yove euja ophunzila ŵake kuti: “Tiyeni titaukile ku silya iyakine.”
36 Tetyo pechiuja gulu ya ŵanthu yamene iyo kuti ilute, ophunzila amene awo efuma naye pamozi pa bote yala yechikwela, koma enzesoti na mabote ayakine.
37 Pavuli pake kwiyamba chimphepo cha mphamvu chankuntho, ndipo mafunde enzeniyata bote yamene iyo mwakuti isala patontho kumbila.
38 Koma Yesu enzeyone kuvuli kwa bote yamene iyo, alisamile pilo. Tetyo emuusha nomukonsha kuti: “Mphunzisi, kansi vukukhuzanilini kuti tasala patontho kufwa?”
39 Pechimvwa vamene ivi euka nokalipila mphepo yamene iyo komasoti kuuja nyanja yamene iyo kuti: “Leka! Nkhala chelele!” Pechilaŵila tetyo mphepo yamene iyo ileka ndipo pavuli pake penkhala zii ngako.
40 Lomba yove eŵakonsha kuti: “Ndaŵa yanji muchita wowa teti? Kansi muliyeletu chikhulupililo mpaka pano?”
41 Koma ove echimvwa wowa ngako ndipo eyamba kukonshana kuti: “Kansi munthu wamene uyu niŵani ngako-ngako? Olo mphepo na nyanja vumumvwila.”
Malizu a m'nyansi
^ Onani matanthauzo a mawu ayakine.
^ “Mpilu” watomolewa pamene apa upezeka ku Palesitina. Kansele kake konkhala katontho ngako koma kakamela, kamuti kake kokula mpaka kufwika mamita 4 ndipo konkhala na misambo.