Wilembewa na Maliko 5:1-43
5 Tetyo ove efwika kusilya iyakine ya nyanja, mu dela ya Agelasa.
2 Ndipo Yesu pechiseluka m’bote, ekumana na munthu ali na mzimu uipa ofumila mmanda.*
3 Yove enzekonda kunkhala mmanda mwamene umo, ndipo kufumila kale-kale paliye munthu aliyense ekwanisha kumumanga olo na tcheni koma yove osatenda.
4 Yove emangililiwapo mugoli komasoti kumangiwa na matcheni moweleja-weleja, koma enzetenda matcheni amene awo komasoti kutyola magoli amene awo mwakuti paliye ekwanisha kumugonjesa.
5 Ndipo nthawe zonse, usiku na nzuŵa, enzeŵilikija mmanda na mmalupili komasoti enze licheka-cheka na myala.
6 Koma pechiwona Yesu ali patali emuutukila nomugwadila.
7 Pavuli pake eŵilikija na mawu amphamvu kuti: “Kansi mufuna chinji kuli newo, Yesu Mwana wa Mulungu Wakululu? Nukulumbilishani pali Mulungu kuti osati munitamanishe.”
8 Chifukwa Yesu enzeuja mzimu wamene uyo kuti: “Fuma muli uyu munthu, wewo mzimu uipa.”
9 Lomba Yesu ekonsha munthu wamene uyo kuti: “Zina yako niwe ŵani?” Yove eyankha kuti: “Zina yangu nine Gulu, chifukwa tilipo tanyinji.”
10 Ndipo epitilija kupapatila Yesu kuti osati atumije mizimu yamene iyo kutali na dela yamene iyo.
11 Tetyo chigulu cha nkhumba chenze kulya mmbali mwa lupili.
12 Tetyo mizimu yamene iyo imupapatila kuti: “Titumijeni muli izozala nkhumba kuti tikaloŵe mwamene.”
13 Tetyo yove eilola. Pechichita tetyo mizimu iipa yala ifuma nakuyaloŵa mu nkhumba zamene izo ndipo nkhumba zonse zamene izo ziutukila ku mpoli-poli nodjumphila mu nyanja. Nkhumba zamene izo zenzepo pafupi-fupi 2.000 ndipo zimbila mu nyanja mwamene umo.
14 Koma achiŵeta a nkhumba zamene izo ethaŵa nakuyalaŵila vamene ivo mu tauni na mminzi, ndipo ŵanthu ewela kuzawona vamene ivo vichitika.
15 Tetyo efwika kuli Yesu ndipo ewona munthu wala enze na chiŵanda wamene poyamba enze na gulu ya mizimu iipa. Emuwona alinkhale pansi, alivwale bwino-bwino komasoti maganizo ŵake ali bwino-bwino ndipo ove echita wowa.
16 Komasoti ŵala ewona vamene ivo vichitika, efotokozela ŵanthu amene awo vichitikila munthu wala enze na viŵanda komasoti zala nkhumba.
17 Tetyo ŵanthu amene awo eyamba kupapatila Yesu kuti afumeko ku dela ya kwawo kwamene uko.
18 Lomba Yesu penzekwela bote, munthu wala enze na viŵanda emupapatila kuti alute nawo.
19 Yesu aliye muvomeje koma emuuja kuti: “Nkhoya ku ng’anda kwenekwako ndipo ukaŵauje vonse vawakuchitila Yehova na chifundo chawakuwonesha.”
20 Tetyo munthu wala efumapo ndipo eyamba kufalisa mu Dekapoli* vonse vechimuchitila Yesu, mwakuti ŵanthu onse edabwa ngako.
21 Yesu pechitaukasoti na bote nojokela silya iyakine, gulu ikulu ya ŵanthu iungana kuli yove, pa nthawe yamene iyi yove enze mmbali mwa nyanja.
22 Pavuli pake mmozi wa asogoleli a malo opemphelela, zina yake Yailo, ewela. Pechimuwona egwada pa vipazi vake.
23 Yove emupapatila moweleja-weleja kuti: “Mwana wangu mwanakazi olwala mwa kaya-kaya. Pulizi tiyeni mukamuike manja kuti apole nonkhala na moyo.”
24 Pevichitika tetyo Yesu enyamuka naye pamozi, ndipo gulu ikulu ya ŵanthu yenze mukonkhelela nomupanikija.
25 Lomba penze mwanakazi muyakine wamene enzelwala matenda otaya milopa kwa vyaka 12.
26 Madokota anyinji emuchitisha kuti avutike ngako.* Yove ewononga chuma chake chonse koma aliyepole, mmalo mwake matenda amene awo enzekungokulila-kulila.
27 Pechimvwa vokhuza Yesu, echiyaloŵa mu gulu ya ŵanthu amene awo nomuwelela kuvuli kwake, pavuli pake ekata malaya ŵake akunja.
28 Echita vamene ivi chifukwa mu ntima mwake enzenena kuti: “Nikangokata tyala malaya ŵake akunja, shuwa nipole.”
29 Nthawe yamene iyo eleka kutaya milopa ndipo mmuŵili mwake echimvwa kuti wapolelatu matenda ŵake akulu amene awo.
30 Nthawe yamene iyo, Yesu eziŵa kuti mphamvu yafuma mmuŵili mwake ndipo echunguluka mu gulu ya ŵanthu amene awo nokonsha kuti: “Niŵani wakata malaya ŵangu akunja?”
31 Koma ophunzira ŵake emuuja kuti: “Mwewo mweka muwona kuti ŵanthu onse amene aŵa akupanikijani, lomba mungakonshelenji kuti, ‘Niŵani wanikata?’”
32 Koma lomba yove enzelolesha-lolesha kuti awone wachita vamene ivi.
33 Mwanakazi wala echita wowa noyamba kunjenjemela pechiziŵa vamuchitikila ndipo efwika pafupi nogwada pamenso pake nomuuja nkhani yonse.
34 Yove euja mwanakazi wamene uyo kuti: “Mwanawe, chikhulupililo chako chakupojeka. Luta mu ntendele ndipo matenda ŵako akulu amene awo asililetu.”
35 Ali nkati molaŵila, pewela analume ayakine ofumila ku ng’anda kwa wala nsogoleli wa malo opemphelela ndipo emuuja kuti: “Wala mwana wanu wamwalila! Musiyeni Mphunzisi wamene uyu osamuvutisha.”
36 Koma Yesu echimvwa venzelaŵila ŵanthu amene awo ndipo euja nsogoleli wala wa malo opemphelela kuti: “Osayopa, nkhala tyala na chikhulupililo.”
37 Pa nthawe yamene iyo aliyelolesoti kuti aliyense amukonkhelele kupatulapo Petulo, Yakobo na Yohani, wamene ni nkwake wa Yakobo.
38 Tetyo efwika ku ng’anda kwa wala nsogoleli wa malo opemphelela ndipo echimvwa chongo cha ŵanthu olila komasoti kumimila ngako.
39 Pechiloŵa nkati, ekonsha ŵanthu amene awo kuti: “Ndaŵa yanji muchita chongo komasoti kulila teti? Uyu mwana aliye mwalile, koma aliyone.”
40 Pechilaŵila vamene ivi ŵanthu amene awo eyamba kumuseka monyoza. Koma pechiŵafumya onse, etola atata ŵake na amayi ŵake a mwana wamene uyo, komasoti ŵala ŵanthu ŵenze nawo ndipo eloŵa kwenze mwana wamene uyo.
41 Tetyo ekata kwanja ya mwana wamene uyo nonena kuti: “Talʹi·tha cuʹmi,” mawu amene akamasuliliwa otanthauza kuti: “Wewo kamsimbi, nulaŵila na wewo, uka!”
42 Nthawe yamene iyo msimbi wamene uyo euka noyamba kuyenda. (Msimbi wamene uyo enze na vyaka 12.) Ndipo ŵanthu amene awo esangalala ngako.
43 Koma yove eŵalamula moweleja-weleja* kuti osati auje aliyense nkhani yamene iyi. Pavuli pake eŵauja kuti amupase chakulya msimbi wamene uyo.
Malizu a m'nyansi
^ Olo kuti, “mmanda achikumbukilo.”
^ Olo kuti, “Chigawo cha matauni 10.”
^ Olo kuti, “emuchitisha kuti ululu uyangijilike.”
^ Olo kuti, “eŵalamula mwamphamvu.”
