Wilembewa na Maliko 6:1-56
6 Tetyo efumako kwamene uko nofwika mu dela ya kwawo ndipo ophunzila ŵake emukonkhelela.
2 Nsiku ya Sondo peikwana, yove eyamba kuphunzisa mmalo opemphelela. Ŵanthu anyinji emumvwishila edabwa ndipo enena kuti: “Kansi munthu wamene uyu evitola kuni vinthu vamene ivi? Ndipo ndaŵa yanji nzelu zamene izi zipelekewa kuli yove, komasoti kuti akokwanisha kuchita ntchito zamphamvu zoteti?
3 Kansi wamene uyu ni mmisililini wa vokhoma-khoma, mwana wa Maliya, komasoti nkwake wa Yakobo, Yosefe, Yudasi na Simoni? Ndipo azilongosi ŵake ni aŵalini ŵatili nawo pano?” Tetyo eyamba kukalipa naye.
4 Koma Yesu eŵauja kuti: “Mneneli olemekezewalini kwawo, olo nenekwake, olo m’ng’anda mwake ngamo-ngamo, koma kuyakine.”
5 Tetyo kwamene uko aliye kwanishe kuchita ntchito zilizonse zamphamvu, koma echingokata olwala oŵelengeka noŵapojeka.
6 N’chendi, yove edabwa kuwona kuti ŵanthu amene awo enzeve chikhulupililo. Tetyo ezenguluka mminzi yapafupi noyamba kuphunzisa ŵanthu.
7 Pavuli pake eita ophunzila ŵake ŵala 12 noyamba kuŵatumija aŵili-aŵili ndipo eŵapasa mphamvu kuti akokwanisha kufumya mizimu iipa.
8 Komasoti eŵalamula kuti osati anyamule kanthu kalikonse pa ulwendo wawo koma ndodo yeka tyala. Eŵalamula kuti osati anyamule nkate, chola cha vakulya olo ndalama* mvyola vawo,
9 koma kuti avwale nsapato komasoti kuti osati avwale malaya aŵili.
10 Komasoti eŵauja kuti: “Mukafwika pa ng’anda iliyonse, mukonkhala pa ng’anda pamene apo mpaka nthawe yofumapo ikwane.
11 Kulikonse kwakuti akaleke kulondelani olo kukumvwishilani, pofuma kwamene uko kunkhumulani lukungu kumendo kwanu kuti unkhale umboni kuli ove.”
12 Tetyo eluta kuyalalikila kuti ŵanthu alape,
13 ndipo efumya viŵanda vinyinji, komasoti kuzoza mafuta ŵanthu anyinji olwala noŵapojeka.
14 Lomba Mfumu Helode ichimvwa vamene ivi chifukwa zina ya Yesu imvwikila ngako ndipo ŵanthu enzenena kuti: “Yohani M’batizi wauka kwa akufwa n’chifukwa chake ochita ntchito zamphamvu.”
15 Koma ayakine enzenena kuti: “Ni Eliya.” Ndipo ayakine enzenenasoti kuti: “Ni mneneli monga ni mwenzele aneneli akale.”
16 Koma Helode pechimvwa za Yesu enena kuti: “Shuwa Yohani wala wenitenda mutu waushiwa chendi.”
17 Elaŵila vamene ivi chifukwa Helode wamene uyu etumija ŵanthu kuti akakate Yohani nomumanga ndipo emuzalilila mu djeli chifukwa cha Helodiya, mwanakazi wa nkwake Filipo, wechilungula yove Helode.
18 Echita vamene ivi chifukwa Yohani enzeuja Helode kuti: “N’vosaloleka kuti mutole mwanakazi wa nkwanu.”
19 Tetyo Helodiya emusungila chidani mu ntima ndipo enzefuna kumupaya, koma aliye kwanishe kuchita vamene ivo.
20 Helode enzeyopa Yohani chifukwa enzeziŵa kuti ni munthu wolungama komasoti ntuŵa, tetyo enzemutetezela. Pechimvwa venzelaŵila esiliwa nzelu, komalomba epitilija kumumvwishila mosangalala.
21 Lomba nsiku yakuti Helodiya akwanilishe volinga vake ikwana. Yamene iyi yenze nsiku yokumbukila kuvyalika kwa Helode ndipo ekonzela chakulya cha nchingulo nduna zake, akulu-akulu a masodja na ŵanthu oziŵika ngako amu Galileya.
22 Lomba mwana mwanakazi wa Helodiya eloŵa noyamba kuvina, mwakuti ekondwelesha Helode na ayakine ŵenzekulya nawo pamozi. Lomba mfumu iuja msimbi wamene uyo kuti: “Unisenge chilichonse chaufuna ndipo nikupase.”
23 Shuwa, echita lapa kuti: “Chilichonse chaunganisenge nikupase, olo hafu ya ufumu wangu.”
24 Tetyo msimbi wamene uyo efuma nakuyakonsha amayi ŵake kuti: “Nikasenge chinji?” Amayi ŵake amene awo emuuja kuti: “Ukasenge mutu wa Yohani M’batizi.”
25 Nthawe yamene iyo yove eluta kuli mfumu nosenga kuti: “Nufuna munipase mutu wa Yohani M’batizi mmbale lomba teti.”
26 Olo kuti mfumu ichimvwa chisoni ngako, iliye fune kumukanila poganizila kuti yenze ilapa komasoti alwendo ŵake.*
27 Tetyo, nthawe yamene iyo mfumu ituma nsodja enzeigada nomulamula kuti alete mutu wa Yohani. Yove eluta nakuyamutenda mutu mu djeli mwamene umo
28 ndipo euleta mmbale. Lomba eupeleka kuli wala msimbi ndipo msimbi wamene uyo echiyaupeleka kuli amayi ŵake.
29 Ophunzila ŵake pechimvwa vamene ivo ewela nakuzatola muŵili wake nakuyauika mmanda.*
30 Atumwi eungana kwa Yesu nomuuja vonse vechichita komasoti kuphunzisa.
31 Yove eŵauja kuti: “Welani kuno mwewo, tilute kwaseka kuliye ŵanthu kuti mukapumuleko patontho.” Chifukwa ŵanthu anyinji enzewela noluta ndipo enzeve nthawe yakuti apumule olosoti yakuti alye chakulya.
32 Tetyo ekwela bote noluta kwaŵeka kumalo kuliye ŵanthu.
33 Koma ŵanthu eŵawona penzekuya ndipo anyinji eziŵa vamene ivo. Tetyo kufumila mmatauni onse ŵanthu enzeutukila kwamene uko na mendo ndipo ŵanthu amene awo niye eyamba kufwika kwamene uko.
34 Koma pechiseluka ewona gulu ikulu ya ŵanthu ndipo eŵamvwila chisoni, chifukwa enze monga ni mbelele ziliye chiŵeta. Tetyo eyamba kuŵaphunzisa vinthu vinyinji.
35 Lomba kwiyamba kufipa, ndipo ophunzila ŵake ewela kuli yove nonena kuti: “Kuno kuliye ŵanthu ndipo nthawe yasila.
36 Ŵaujeni ŵanthu amene aŵa kuti anyamuke, alute mminzi na mmadela apafupi kuti akagule chakulya chakuti alye.”
37 Koma yove eŵayankha kuti: “Mwewo muŵapase chakulya.” Yesu pechilaŵila vamene ivi ove emukonsha kuti: “Kansi tilute kuyagula mitanda ya nkate ya ndalama zokwana madinali 200 noitwala kuli ŵanthu amene aŵa kuti alye?”
38 Yove eŵakonsha kuti: “Muli na mitanda ingani ya nkate? Nkhoyani mukawone!” Pechiiwona enena kuti: “Ilipo 5 na nsomba ziŵili.”
39 Pavuli pake euja ŵanthu amene awo kuti ankhale pansi mmagulu pa uzu wobiliŵila.
40 Ndipo enkhala chendi mmagulu, ayakine ŵanthu 100, ayakine ŵanthu 50.
41 Lomba etola mitanda 5 ya nkate na nsomba zala ziŵili nololesha kululu ndipo epemphela. Pavuli pake esuna-suna mitanda ya nkate yamene iyo noipeleka kuli ophunzila ŵake kuti aitwale kuli ŵanthu amene awo, komasoti esuna-suna nsomba ziŵili zamene izo noyaŵila ŵanthu onse amene awo.
42 Tetyo onse echilya nokuta
43 ndipo mikate isala eitola-tola nozuja vitundu 12, osaŵelengela nsomba.
44 Ŵanthu amene echilya mikate yamene iyo enzepo analume okwana 5.000.
45 Pavuli pake mokulumija, Yesu euja ophunzila ŵake kuti akwele bote notangula kuluta kusilya iyakine kufupi na chaku Besaida. Koma yove esalilila na cholinga chakuti auje ŵanthu amene awo kuti alute kwawo.
46 Pechilailana na ŵanthu amene awo, yove efumapo noluta kulupili kuyapemphela.
47 Nchingulo kwayamba kufipa, bote yala yenze pakati pa nyanja, koma yove enze yeka ku ntunthu.
48 Pechiwona ophunzila amene awo ovutika kuchapa chifukwa cholimbana na chimphepo cha mphamvu, yove eŵakonkha oyenda pa nyanja. Mwamene umu mwenze mmatemwakucha wasala patontho ukamalonda wa 4.* Koma ophunzila amene awo enzewona monga kuti ofuna kuŵapitilila.
49 Pechimuwona oyenda pa nyanja pamene apo ophunzila amene awo eganiza kuti: “Shuwa amene aŵa ni mensomphenya!” Ndipo eŵilikija ngako.
50 Echita vamene ivi chifukwa onse amene awo emuwona ndipo echita wowa. Koma nthawe yamene iyo yove eŵauja kuti: “Nkhazikani ntima pansi, ni newo. Osachita wowa.”
51 Lomba Yesu ekwela m’bote mwamene umo ndipo mphepo yamene iyo ileka. Pechiwona vamene ivi edabwa ngako.
52 Chifukwa chakuti aliye mvwishe tanthauzo yala ya mitanda ya nkate, ove enzevutika mphela kuti amvwishe vinthu vonse.
53 Pechitauka nofwika kuntunthu, efwika ku Genesaleti nopanamika bote yamene iyo pafupi.
54 Koma pechingoseluka m’bote mwamene umo, ŵanthu emuziŵa.
55 Tetyo ŵanthu eutuka uku na uku mudela yonse yamene iyo noyamba kunyamula pa machila ŵanthu onse amene enzelwala, kuluta nawo kwechimvwa kuti yove ali kwamene uko.
56 Ndipo akangoloŵa mminzi olo mmatauni komasoti mmadela enzeŵazenguluke, ŵanthu enzenkhazika olwala mmamaketi. Ove enzemupapatila kuti angokata usalu wopyata wa mmbali mwa malaya ŵake akunja, ndipo ŵanthu onse eukata epola.
Malizu a m'nyansi
^ Mu Chigiliki, “kopa.”
^ Olo kuti, “komasoti ŵala ŵenzekulya nawo chakulya pathebo.”
^ Olo kuti, “mmanda achikumbukilo.”
^ Nthawe yamene iyi yenzeyamba 3 koloko mpaka zuŵa kufuma cha mma 6 koloko mmawa.
