Wilembewa na Maliko 7:1-37
7 Lomba Afalisi na alembi ayakine amene efumila ku Yelusalemu eungana kwa Yesu.
2 Lomba ove ewona ayakine mwa ophunzila ŵake akulya chakulya na mmanja mufipa olo kuti chosasamba mmanja.*
3 (Afalisi na Ayuda onse akulyalini akaliye samba mmanja mpaka mu tukonyokonyo, pokonkheja mwambo wa makolo.
4 Ndipo akawela kufumila ku maketi akulyalini mpaka ayambe asamba mmanja. Pali miyambo iyakinesoti inyinji yechilondela ndipo oikonkheja, monga kuvwivwika makapu mmanzi, mmanongo na muviya vopangiwa na kopa.*)
5 Tetyo Afalisi na alembi amene aŵa emukonsha kuti: “Ndaŵa yanji ophunzila ŵanu okonkhejalini miyambo ya makolo koma akulya chakulya na mmanja mufipa?”
6 Yove eŵayankha kuti: “Yesaya elosela vachendi vokhuza mwewo mwa ŵanthu achinyengo, mokatijana na vakunena Malemba kuti, ‘Aŵa ŵanthu onilemekeza na milomo yeka, koma mitima yawo aiika kutali na newo.
7 Chilichonse chakuchita ponilambila ni chatyala-tyala, chifukwa ophunzisa malamulo a ŵanthu monga kuti ni malamulo a Mulungu.’
8 Munyalanyaza malamulo a Mulungu noyumilila miyambo ya ŵanthu.”
9 Komasoti eŵauja kuti: “Mochenjela munyalanyaza malamulo a Mulungu kuti mukokonkheja miyambo yanu.
10 Mwachisanzo, Mose enena kuti, ‘Mukolemekeza atata ŵanu na amayi ŵanu, komasoti enena kuti, ‘Aliyense wolaŵilila mawu aipa atata ŵake olo amayi ŵake akopaiwa.’
11 Koma mwewo munena kuti, ‘Munthu akauja atata ŵake olo amayi ŵake kuti: “Chilichonse chanili nacho, chamene sembe nakuyavyani nacho ni khobani (kutanthauza mphaso yakuti nipeleke kwa Mulungu),”’
12 mwewo mulolalini soti kuti munthu wamene uyo achitile atata ŵake olo amayi ŵake chinthu chilichonse.
13 Mukochita vamene ivi muchitisha kuti mawu a Mulungu ankhale a tyala-tyala chifukwa cha miyambo yanu yamupeleka kuli ŵanthu. Ndipo muchita vinthu vinyinji monga ni vamene ivi.”
14 Pechichita tetyo eita gulu yamene iyo ya ŵanthu kuti iwelesoti kuli yove ndipo eŵauja kuti: “Tetekelani kuno monse ndipo mumvwishe tanthauzo yake.
15 Paliye chilichonse chufumila kunja kwa munthu noloŵa mmuŵili mwake chingamuipishe. Koma vinthu vufuma mwa munthu niye vumuipisha.
16 ——
17 Lomba pechiloŵa m’ng’anda iyakine kutali na gulu yamene iyo ya ŵanthu, ophunzila ŵake eyamba kumukonsha za fanizo yala.
18 Tetyo yove eŵakonsha kuti: “Kansi namwe muziŵalinisoti monga ni ove? Kansi muziŵalini kuti paliye chofumila kunja kwa muŵili noloŵa mmuŵili mwa munthu chingamuipishe?
19 Vili tetyo chifukwa chupitalini mu ntima mwake koma mmala mwake, ndipo chikuyafuma ku chimbuzi.” Na mawu amene aŵa Yesu elamula kuti vakulya vonse ni viweme.
20 Yove enenasoti kuti: “Chufuma mmuŵili mwa munthu niye chuipisha munthu.
21 Chifukwa mu ntima mwa ŵanthu mufuma maganizo aipa monga: achiwelewele,* aukawalala, opaya ŵanthu,
22 achigololo, adyela, ochita viipa, achinyengo, ankhalidwe iliye nsoni,* alinso ya njilu, mawu onyoza, kulitumba komasoti kuchita vinthu mosoŵa nzelu.
23 Vinthu vonse viipa vamene ivi vufuma mu ntima mwa munthu ndipo vumuipisha.”
24 Pechifuma kwamene uko eluta mu chigawo cha Tulo na Sidoni. Kwamene uko eloŵa m’ng’anda iyakine ndipo aliyefune kuti munthu aliyense aziŵe kuti ali kwamene uko. Koma ŵanthu eziŵa mphela.
25 Nthawe yamene iyo, mwanakazi muyakine wamene mwana wake mwanakazi enze na mzimu uipa echimvwa za yove ndipo ewela na kuzagwada ku vipazi kwake.
26 Mwanakazi wamene uyu enze Mgiliki, wa Chisulofoinike. Yove esenga Yesu moweleja-weleja kuti afumye chiŵanda muli mwana wake wamene uyo.
27 Koma Yesu euja mwanakazi wamene uyo kuti: “Poyamba, pofunika kuti ŵana akute, chifukwa vingankhalelini luweme kutola chakulya cha ŵana noponyela tuimbwa.”
28 Koma mwanakazi wamene uyo emuyankha kuti: “N’chendi ambuye, komalomba tuimbwa tukulya vinyenye va ŵana amene awo m’nyansi mwa thebo.”
29 Yesu pechimvwa vamene ivo euja mwanakazi wamene uyo kuti: “Chifukwa chakuti wanena vamene ivi, nkhoya, chiŵanda chamene icho chafuma muli mwana wako.”
30 Tetyo eluta ku ng’anda kwake ndipo efwana kuti chiŵanda chafuma muli mwana wamene uyo wamene enze yone pa bedi.
31 Yesu penzefuma m’chigawo cha Tulo kuluta ku nyanja ya Galileya, epitila na ku Sidoni komasoti m’chigawo cha Dekapoli.*
32 Kwamene uko ŵanthu emuletela munthu wa vuto yosamvwa komasoti wovutika kulaŵila, ove emusenga kuti aike kwanja yake pali munthu wamene uyo.
33 Koma yove etola munthu wamene uyo nofuma naye pa gulu yamene iyo ya ŵanthu noluta naye pambali. Pavuli pake epitisha vikumo vake mmatu mwa munthu wamene uyo, ndipo etila mata pa vikumo vake nokumya lilimi ya munthu wamene uyo.
34 Pechichita tetyo elolesha kululu noŵesa ngako, pavuli pake euja munthu wamene uyo kuti: “Efata” kutanthauza kuti, “Seguka.”
35 Pechichita tetyo, matu ŵake eseguka ndipo vuto yake yosalaŵila yamene iyo isililatu mwakuti eyamba kulaŵila bwino-bwino.
36 Lomba eŵalamula kuti osati auje aliyense vamene ivo vichitika. Koma enzekuti akaŵalesha mwa mphamvu kuti osati auje aliyense, niyesoti penzevifalisa ngako.
37 N’chendi, ove edabwa ngako ndipo enena kuti; “Wachita vinthu vonse bwino-bwino shuwa. Olo ŵanthu amene enze na vuto yosamvwa akumvwa komasoti amene enze na vuto yosalaŵila olaŵila.”
Malizu a m'nyansi
^ Ivi vutanthauzalini kuti enzekulya chakulya kumanja kulifipe koma kuti enzekonkhejalini miyambo ya Chiyuda yenzesambila kumanja.
^ Olo kuti, “vankuwa.”
^ Mu Chigiliki por·nei′a. Onani matanthauzo a mawu ayakine.
^ Mu Chigiliki a·sel′gei·a. Onani matanthauzo a mawu ayakine.
^ Olo kuti, “Chigawo cha Matauni 10.”
