Wilembewa na Maliko 8:1-38
8 Mmasiku amene awo, gulu ya ŵanthu iunganasoti koma yenzeve chakulya. Lomba Yesu eita ophunzila ŵake noŵauja kuti:
2 “Gulu yamene iyi ya ŵanthu yunimvwisha chifundo, chifukwa ŵanthu amene aŵa ankhala na newo kwa masiku atatu ndipo aliye chakulya.
3 Nikaŵauja kuti alute kwawo ali na njala, alenguke pa njila. Ndipo ayakine a ove afumila kutali ngako.”
4 Koma ophunzila ŵake emuyankha kuti: “Kansi munthu angaifwane kuni mitanda ya nkate yokwanila kulyesha ŵanthu onse amene aŵa, kumalo kuliye ŵanthu monga ni kuno?”
5 Lomba Yesu eŵakonsha kuti: “Muli na mitanda ingani ya nkate?” Ove eyankha kuti: “Tili nayo 7.”
6 Lomba euja ŵanthu amene awo kuti ankhale pansi. Pavuli pake, etola yala mitanda 7 ya nkate nopemphela. Pechichita tetyo eisuna-suna noyamba kupeleka kuli ophunzila ŵake kuti ayaŵe, ndipo ove eyaŵila gulu ya ŵanthu yamene iyo.
7 Ophunzila amene awo enzesoti na tunsomba toŵelengeka ndipo pechidalisa tunsomba twamene uto, eŵauja kuti ayaŵilesoti ŵanthu amene awo.
8 Tetyo ŵanthu onse amene awo echilya nokuta, mwakuti visala vechitola-tola vizula vitundu vikulu-vikulu 7.
9 Komalomba penze analume pafupi-fupi 4.000. Pavuli pake eŵauja kuti alute.
10 Nthawe yamene iyo yove ekwela bote pamozi na ophunzila ŵake nofwika mu chigawo cha Dalamanuta.
11 Kwamene uku kwiwela Afalisi ndipo eyamba kushushana naye. Enzefuna kuti aŵawoneshe chizindikilo chofumila kululu, pofuna kumuyesa.
12 Tetyo eŵesa ngako nonena kuti: “Ndaŵa yanji m’badwo wamene uyu ufunishisha chizindikilo? Shuwa nukuujani, m’badwo wamene uyu upasiwelini chizindikilo chilichonse.”
13 Pechilaŵila vamene ivi eŵasiya nokwelasoti bote noluta kusilya iyakine.
14 Komalomba ove eluŵa kunyamula mikate, tetyo enzeve chilichonse m’bote mwamene umo kuchosapo ntanda umozi wa nkate tyala.
15 Ndipo eŵachenjeja mwa mphamvu kuti: “Nkhalani menso! Chenjelani na chofufumisha cha Afalisi na cha Helode.”
16 Tetyo ophunzila amene awo eyamba kukangana pa nkhani yosoŵa nkate.
17 Yesu pechiwona vamene ivo, eŵakonsha kuti: “Ndaŵa yanji mukangana pa nkhani yosoŵa nkate? Kansi muziŵalini nomvwisha tanthauzo yake mpaka pano? Kansi mitima yanu ikaliye ziŵa mphela?
18 ‘Olo kuti muli na menso, mulolalini. Ndipo olo kuti muli na matu, mukumvwalini. Kansi mukumbukilalini
19 vichitika penisuna-suna mitanda 5 ya nkate nolyesha analume 5.000? Kansi pemwitola-tola visala mwizuja vitundu vingani?” Ove eyankha kuti: “Venze vitundu 12.”
20 Penisuna-suna mitanda 7 ya nkate nolyesha analume 4.000, kansi visala vemwitola-tola vizula vitundu vingani vikulu-vikulu?” Ove emuyankha kuti: “Venzepo 7.”
21 Lomba yove eŵakonsha kuti: “Kansi mumvwishalini mphela tanthauzo yake?”
22 Tetyo efwika ku Besaida. Kwamene uku ŵanthu emuletela munthu wamene enze na vuto yosalola. Ŵanthu amene awo emupapatila kuti akumye munthu wamene uyo.
23 Yove ekata kwanja ya munthu wosalola wamene uyo noluta naye kunja kwa munzi. Kwamene uko yove eyika mata mmenso mwa munthu wamene uyo noika manja ŵake pali yove ndipo emukonsha kuti: “Kansi uwona chilichonse?”
24 Munthu wamene uyo elolesha mmululu nolaŵila kuti: “Nuwona ŵanthu, koma owoneka monga ni vimiti vamene vuyenda-yenda.”
25 Yove ekatasoti mmenso mwa munthu wamene uyo ndipo eyamba kulola bwino-bwino. Munthu wamene uyo epolelatu mwakuti eyamba kuwona chilichonse paliye vuto.
26 Pavuli pake emuuja kuti alute kwawo nonena kuti: “Koma osapitila mmunzi umu.”
27 Lomba Yesu na ophunzila ŵake efumako noluta kuminzi yaku Kaisaleya wa Filipi. Ali mu njila, eyamba kukonsha ophunzila ŵake kuti: Kansi ŵanthu onena kuti newo nine ŵani?”
28 Ove emuyankha kuti: “Onena kuti nimwe Yohani M’batizi, ayakine onena kuti nimwe Eliya, koma ayakine onena kuti nimwe mmozi wa aneneli.”
29 Lomba ekonsha ophunzila amene awo kuti: “Lomba mwewo munena kuti nine ŵani?” Petulo eyankha kuti: “Nimwe Khilisitu.”
30 Pechilaŵila vamene ivo, eŵalamula mwamphamvu kuti osati auje aliyense za yove.
31 Komasoti eyamba kuŵaphunzisa kuti Mwana wa munthu ofunika kukumana na mavuto anyinji komasoti kukaniwa na akulu, ansembe akulu-akulu na alembi. Ndipo azapaiwe noushiwa pakazapita masiku atatu.
32 Kulaŵila chendi, yove elaŵila mawu amene aŵa mosapita mmbali. Koma Petulo etola Yesu noluta naye pambali noyamba kumuzuzula.
33 Pechimvwa vamene ivi, Yesu echunguluka nololesha ophunzila ŵake, pavuli pake ezuzula Petulo kuti: “Luta kuvuli kwangu, Satana! Chifukwa vauganiza ni maganizo lini a Mulungu, koma ni maganizo a ŵanthu.”
34 Pavuli pake yove eita gulu ya ŵanthu pamozi na ophunzila ŵake noŵauja kuti: “Keno munthu ofuna kunikonkhelela, alikane yeka ndipo atakule chimuti chake chotamanilapo* nopitilija kunikonkhelela.
35 Chifukwa aliyense wofuna kupulumusha moyo wake azautaye. Koma aliyense wotaya moyo wake chifukwa cha newo na uthenga uweme, azaupulumushe.
36 Kansi munthu angapindule chinji keno angafwane vinthu vonse va ichi chalo koma notaya moyo wake?
37 Olo kansi munthu angapeleke chinji changachinjanishe na moyo wake?
38 Chifukwa aliyense ochita nsoni na newo komasoti mawu ŵangu mu m’badwo uno wachigololo* komasoti wochimwa, Mwana wa munthu azachite nayesoti nsoni akazawela mu ulemelelo wa Atata ŵake pamozi na angelo atuŵa.”