Wilembewa na Maliko 9:1-50
-
Yesu echinja mawonekedwe ŵake (1-13)
-
Mulumbwana wamene enze na chiŵanda epojekewa (14-29)
-
Vinthu vonse ni vokwanishika kuli munthu wamene ali na chikhulupililo (23)
-
-
Yesu elaŵilililatu kachiŵili vokhuza imfwa yake (30-32)
-
Ophunzila ekangana kuti nkulu ni ŵani (33-37)
-
Aliyense wamene olimbanalini nase ali ku mbali yasu (38-41)
-
Vosokoneza (42-48)
-
“Munkhale na munyu mwa mwewo mweka” (49, 50)
9 Lomba eŵaujasoti kuti: “Shuwa nukuujani kuti pali ayakine amene apanama pano amene azalaulelini imfwa olo patontho mpaka poyamba azawone kuwela kwa Ufumu wa Mulungu na mphamvu zake.”
2 Papita masiku 6, Yesu etola Petulo, Yakobo na Yohani nokwela nawo mulupili itali kwa ŵeka-ŵeka. Lomba yove echinja mawonekedwe ŵake ove owona.
3 Malaya ŵake akunja eyamba kung’anima notuŵa ngako kupambana mwangatuŵishile wowasha vovwala aliyense pano pa chalo.
4 Komasoti Eliya na Mose ewonekela kuli ove ndipo enzekambilana na Yesu.
5 Lomba Petulo euja Yesu kuti: “Labi, vingankhale luweme kuti sewo tikonkhala pano. Tetyo timange matenti atatu pano, imozi yanu, imozi ya Mose na iyakine ya Eliya.”
6 Petulo esoŵa chakuti alaŵile, chifukwa ophunzila amene awo echita wowa ngako.
7 Tetyo kwechita nkumbi wamene wiŵaziŵilija. Pavuli pake pemvwika mawu kufumila mu nkumbi wamene uyo akuti: “Uyu ni Mwana wangu wanukonda. Mukomumvwila.”
8 Pavuli pake ove elolesha uku na uku ndipo echingowona kuti paliye muyakine aliyense koma Yesu yeka mphela.
9 Penzeseluka mulupili mwamene umo Yesu eŵalamula mwa mphamvu kuti osati auje aliyense vamene ivo vechiwona, mpaka Mwana wa munthu azauke kwa akufwa.
10 Ove esunga chendi vamene ivo mu ntima,* koma eyamba kukambilana vokhuza tanthauzo ya kuuka kwa akufwa kwamene uko.
11 Lomba eyamba kumukonsha kuti: “Ndaŵa yanji alembi onena kuti Eliya ofunikila kuwela poyamba?”
12 Yove eŵayankha kuti: “Eliya azawele chendi poyamba nowejelesha vinthu vonse. Koma ndaŵa yanji malemba onena kuti Mwana wa munthu ofunikila kukumana na mavuto anyinji komasoti kumuchitila vinthu viipa?
13 Koma newo nukuujani kuti Eliya ewela kale ndipo emuchitila vilivonse vechifuna ove, mokatijana na vakunena Malemba vokhuza yove.”
14 Pechifwika kufupi na kwenze ophunzila ayakine ŵala, ove ewona gulu ikulu ya ŵanthu ili ŵazenguluke ndipo penze alembi amene enzekangana nawo.
15 Koma gulu yonse yamene iyo peimuwona idabwa ndipo imuutukila kuti ikamupase moni.
16 Lomba yove eŵakonsha kuti: “Mukangana nawo chinji?”
17 Munthu muyakine wamene enze mugulu yamene iyo emuyankha kuti: “Mphunzisi newo naleta mwana wangu mwanalume kuli mwewo chifukwa ali na mzimu wamene umukangisha kulaŵila.
18 Mzimu wamene uyo ukamuwela, umuponeshela pansi. Akachita tetyo ochita povu nkamwa komasoti okukuta menu ndipo ofoka. Nenze nasenga ophunzila ŵanu kuti auchose koma akangiwa.”
19 Yove eyankha kuti: “Mwewo m’badwo uliye chikhulupililo, kansi ninkhale namwe mphela mpaka nthawe yanji? Nipitilije kukupililani mpaka nthawe yanji? Welani naye kuno.”
20 Tetyo ove eluta naye kwa Yesu. Koma mzimu wamene uyo pewiwona Yesu nthawe yamene iyo wichitisha kuti mwana wamene uyo apalapate. Epona pansi nokunkhulika-kunkhulika ndipo enzechita povu kukamwa.
21 Lomba Yesu ekonsha atata ŵake kuti: “Kansi ivi vankhala vumuchitikila kwa nthawe itali tyani?” Atata ŵake a mwana wamene uyo enena kuti: “Kuyambila ali ntontho
22 ndipo kanyinji-kanyinji umuponeshela pamulilo komasoti mmanzi kuti umuwononge. Koma keno mungakwanishe kuchitapo kanthu, tichitileni chifundo notiyavya.”
23 Yesu ekonsha atata ŵake amene awo kuti: “Mukuti ‘Keno mungakwanishe’? Chilichonse ni chokwanishika kuli munthu wamene ali na chikhulupililo.”
24 Nthawe yamene iyo atata ŵake a mwana wamene uyo eŵilikija nonena kuti: “Chikhulupililo nili nacho! Tang’ishani chikhulupililo changu!”
25 Lomba Yesu pechiwona kuti gulu ya ŵanthu yuutukila kuli ove, ekalipila mzimu uipa wamene uyo kuti: “Wewo mzimu ukangisha munthu kulaŵila komasoti kumvwa, nukulamula, fuma ndipo osati uzaloŵesoti muli yove.”
26 Mwana wamene uyo pechiŵilikija nopalapata ngako, mzimu wamene uyo wifuma ndipo enzewoneka monga wafwa, mwakuti ŵanthu anyinji enzenena kuti: “Wamwalila!”
27 Koma Yesu emukata kwanja nomuusha ndipo mwana wamene uyo epanama.
28 Lomba pechiloŵa m’ng’anda, ophunzila ŵake emukonsha ali kwa ŵeka kuti: “Ndaŵa yanji sewo takangiwa kufumya chiŵanda chala?”
29 Yove eŵayankha kuti: “Mzimu wa ntundu wamene uyu ungakwanishelini kufuma na chilichonse, koma na pemphelo tyala.”
30 Pechifuma kwamene uko epitilija ulwendo wawo kupita mu Galileya koma yove aliyefune kuti aliyense aziŵe zakuti ali kwamene uko.
31 Chifukwa yove enzephunzisa ophunzila ŵake noŵauja kuti: “Mwana wa munthu azapelekewe mmanja mwa ŵanthu ndipo azamupaye. Koma olo kuti azamupaye azauke pakazapita masiku atatu.”
32 Koma olo n’tetyo, ophunzila amene awo aliye mvwishe mawu ŵake amene awo ndipo enzeyopa kuti amukonshe.
33 Pavuli pake efwika ku Kapelenawo. Lomba penze m’ng’anda eŵakonsha kuti: “Kansi mwenzekangana chinji mu njila?”
34 Ove echingonkhala chelele, chifukwa mu njila enzekangana kuti nkulu niŵani pakati pawo.
35 Tetyo enkhala pansi noita ophunzila ŵake 12 ŵala noŵauja kuti: “Keno aliyense ofuna kunkhala woyambilila, ofunika kunkhala wosilijila pa onse komasoti ntumiki wa onse.”
36 Pavuli pake etola mwana ntontho nomupanamika pakati pawo ndipo emukumbatila noŵauja kuti:
37 “Aliyense walondela mwana ntontho monga ni wamene uyu mu zina yangu, walondelasoti newo. Ndipo aliyense walondela newo, aliye londele newo neka, koma walondelasoti Mulungu enituma.”
38 Pavuli pake Yohani euja Yesu kuti: “Mphunzisi, sewo tiwona munthu muyakine ofumya viŵanda mu zina yanu lomba sewo timulesha, chifukwa oyendalini na sewo.”
39 Koma Yesu enena kuti: “Osamulesha, chifukwa paliye angachite ntchito zamphamvu mu zina yangu, nthawe yamene iyoletu nonilaŵilila vinthu viipa.
40 Chifukwa wamene oshushanalini na sewo ali kumbali yasu.
41 Komasoti aliyense wamene wakupasani kapu ya manzi akumwa chifukwa chakuti nimwe ophunzila a Khilisitu, shuwa nukuujani, wamene uyo mphoto yake izataikelini.
42 Koma aliyense wokalipisha mmozi wa tuŵana utu twamene tuli na chikhulupililo vingamunkhalile luweme ngako keno angamumangilile chimwala cha mphelo mu nkosi mwake chakuyendesha bulu nomuponya m’nyanja.
43 Keno kwanja yako yukusokoneza, uitende. Vingankhale luweme kuti ukafwane moyo uliye chizo chimozi, kusiyana na kuti ukalute ku Gehena,* uli na manja onse aŵili ku mulilo wamene ungazimwiwelini.
44 ——
45 Ndipo keno kwendo yako yukusokoneza, uitende. Vingankhale luweme kuti ukafwane moyo uli lemale, kusiyana na kuti ukaponyewe mu Gehena* uli na mendo onse aŵili.
46 ——
47 Keno linso yako yukuchimwisha,* uitaye. Vingankhale luweme kuti ukaloŵe mu Ufumu wa Mulungu uli na linso imozi kusiyana na kuti ukaponyewe mu Gehena* uli na menso onse aŵili,
48 Kwamene vikusi va vinthu vakufwa vikufwalini ndipo mulilo wake uzimwalini.
49 Chifukwa aliyense ofunikila kuwajiwa munyu wamene upanamila mulilo.
50 Munyu ni uweme, koma keno munyu wasila mphamvu, kansi mphamvu yamene iyo mungaiwejeleshe tyani? Nkhalani na munyu mwa mwewo mweka ndipo nkhalani na ntendele pakati panu.”
Malizu a m'nyansi
^ Mabaibolo ayakine onena kuti, “Ove aliye uje chendi aliyense vamene ivo.”
^ Onani matanthauzo a mawu ayakine.
^ Onani matanthauzo a mawu ayakine.
^ Olo kuti, “yukukhubulwisha.”
^ Onani matanthauzo a mawu ayakine.
