Wilembewa na Mateyo 10:1-42
10 Tetyo eita ophunzila ŵake okwana 12 noŵapasa mphamvu kuti akokwanisha kufumya mizimu iipa, komasoti kupojeka matenda a ntundu uliwonse ŵenzelwala ŵanthu.
2 Mazina ŵa atumwi 12 ni aŵa: Simoni, wamene enzeitiwa kuti Petulo* na Andileya nkwake. Yakobo mwana wa Zebedayo na nkwake Yohani.
3 Filipo na Batulumeu, Thomase na Mateyo wosonkhesha nsonkho, Yakobo mwana wa Alufeyo na Tadeyo.
4 Simoni Kananiya* na Yudasi Sikaliyoti, wamene pavuli pake epeleka Yesu.
5 Yesu etumija atumwi 12 amene aŵa ndipo eŵapasa malangizo aŵa: “Osapita munsewu wa ŵanthu a mitundu iyakine ndipo osaloŵa mu tauni iliyonse ya Asamaliya.
6 M’malo mwake, nthawe zonse mukoluta kuli mbelele zoluŵila za ng’anda ya Isilaeli.
7 Mukaluta mukolalikila kuti, ‘Ufumu wakululu wavwendela.’
8 Mukopojeka olwala, kuusha ŵanthu akufwa, kupojeka amankhutu komasoti kufumya viŵanda. Mwilondela mwamahala, mukopeleka mwamahala.
9 Osanyamula golide, siliva olo kopa* mu vyola vanu va ndalama.
10 Osanyamula chola cha vakulya cha pa ulwendo olo malaya aŵili* olo nsapato olosoti ndodo chifukwa wantchito ofunikila kulondela chakulya chake.
11 Mukaloŵa mu tauni olo m’munzi uliwonse, mukosakila-sakila wamene ni woyenelela kumuuja uthenga wanu, ndipo mukonkhala m’ng’anda mwake mpaka nthawe yofumako.
12 Mukaloŵa m’ng’anda, mukopeleka moni kuli ŵanthu a m’banja yamene iyo.
13 Keno akulondelani luweme, ntendele wamuŵafunila unkhale pali ŵanthu amene awo, koma keno aliye kulondeleni luweme, ntendele wanu ujokele kuli mwewo.
14 Kulikonse kwati akaleke kukulondelani munthu olo kumvwishila mawu ŵanu, pofuma mu ng’anda yamene iyo olo mu tauni yamene iyo mukokunkhumula lukungu kumendo kwanu.
15 Shuwa nukuujani, chilango cha tauni yamene iyo chizankhale choŵaŵa ngako pa Nsiku ya Chiweluzo kupambana cha Sodomu na Gomola.
16 Onani! Nukutumijani monga ni mbelele pakati pa mphumphi. Tetyo mukochita vinthu mochenjela monga ni njoka koma mwachilungamo monga ni nkhunda.
17 Chenjelani na ŵanthu chifukwa azalute namwe kumakhoti atontho-atontho, ndipo azakukwapuleni m’malo ŵawo opemphelela.
18 Azakutwaleni kwa magavana na mafumu chifukwa nimwe ophunzila ŵangu, kuti nawo komasoti ŵanthu a mitundu iyakine aphunzile za newo.
19 Koma akazakutwalani kwamene uko osati muzadele nkhaŵa kuti mukalaŵile tyani olo kuti mukalaŵile chinji, chifukwa vamukuti mukalaŵile muzapasiwe nthawe yamene iyo.
20 Vili tetyo chifukwa ni mwewolini pamweka mukuti mukalaŵile, koma mzimu wa Atata ŵanu uzalaŵile kupitila muli mwewo.
21 Komasoti munthu azapeleke nkwake kuti apaiwe ndipo tata azapeleke mwana wake. Ŵana azaukile makolo ŵawo ndipo azachitishe kuti apaiwe.
22 Ŵanthu azakuzondeni chifukwa cha zina yangu, koma wamene akuti azapilile mpaka pa mapeto niye akuti azapulumuke.
23 Akakutamanishani mu tauni imozi muthaŵile mu tauni iyakine. Shuwa nukuujani muzasilijelini kuzenguluka matauni onse a Isilaeli Mwana wa munthu akaliye fwika.
24 Wophunzila opambanalini mphunzisi wake ndipo wantchito opambanalini abwana ŵake.
25 Wophunzila ongolingana tyala na omuphunzisa ndipo wantchito ongolingana tyala na abwana ŵake. Keno ŵanthu aita munecho wa ng’anda kuti Belezebule,* kuli tyani na ayakine a m’banja yamene iyo?
26 Tetyo osaŵayopa, chifukwa paliye chofisika chingaleke ululika ndipo paliye chisinsi chingaleke ululika.
27 Vanukuujani mu mfinzi mukovilaŵila patuŵa, ndipo vamukumvwa kuli ŵanthu akoŵeleŵeshana, mukovilalikila muli pantenje.
28 Osachita wowa na ŵala opaya muŵili koma angakwanishelini kupaya moyo. M’malo mwake mukoyopa wala wamene angakwanishe kuwononga vonse viŵili, moyo na muŵili kumo m’Gehena.*
29 Nthaki ziŵili ozigulisa na kandalama kamozi kaliye mphamvu ngako,* n’tetyo lini? Koma paliye olo imozi ingapone pansi Atata ŵanu osaziŵa.
30 Ndipo olo sisi yanu yonse ya m’mutu mwanu oiŵelenga.
31 Tetyo osachita wowa, nimwe ofunika ngako kupambana nthaki zinyinji.
32 Tetyo aliyense wamene ovomekeja pamenso pa ŵanthu kuti ni wophunzila wangu, nanesoti nizamuvomekeje pamenso pa Atata ŵangu akululu kuti niwophunzila wangu.
33 Koma aliyense wamene akuti azanikane pamenso pa ŵanthu, nanesoti nizamukane pamenso pa Atata ŵangu akululu.
34 Osaganiza kuti niwela kuzaleta ntendele pano pa chalo. Niliyewele kuti nizalete ntendele koma chidani.
35 Niwela kuzakanganisha ŵanthu. Niwela kuzachitisha kuti mwana mwanalume akangane na atata ŵake, mwana mwanakazi kukangana na amayi ŵake komasoti kuti mwanakazi wolunguliwa akangane na apongozi ŵake anakazi.
36 Kulaŵila chendi adani a munthu azankhale a m’banja yake ngayo-ngayo.
37 Aliyense wamene okonda ngako atata ŵake olo amayi ŵake kupambana newo ni wosayenelela kuti ankhale wophunzila wangu. Komasoti aliyense wamene okonda ngako mwana wake mwanalume olo mwanakazi kupambana newo ni wosayenelela kuti ankhale wophunzila wangu.
38 Komasoti aliyense wamene ofunalini kunyamula chimuti chake chotamanilapo* nopitilija kunikonkhelela ni wosayenelela kuti ankhale wophunzila wangu.
39 Aliyense wamene oyesa kupulumusha moyo wake azautaye, koma wamene wataya moyo wake chifukwa cha newo azaufwane.
40 Wamene wakulondelani walondelasoti newo ndipo wamene walondela newo walondelasoti wala enituma.
41 Wamene walondela mneneli chifukwa yove ni mneneli azalondele mphoto yolingana na yakulondela mneneli, ndipo wamene walondela munthu wolungama chifukwa yove ni wolungama azalondele mphoto yolingana na yakulondela munthu wolungama.
42 Aliyense wopasa mmozi wa utu tuŵana olo tyala manzi ozizila m’kapu kuti amwe chifukwa ni wophunzila wangu, shuwa nukuujani, wamene uyo mphoto yake izataikelini olo patontho.”
Malizu a m'nyansi
^ “Petulo” oziŵika na mazina 5. Pano oitiwa kuti “Simoni, wamene enzeitiwa kuti Petulo.” Pa Mt 16:16 oitiwa kuti “Simoni Petulo,” pa Mac 15:14, “Sumiyoni,” ndipo pa Yoh 1:42, “Kefa.” Koma kanyinji-kanyinj oitiwa kuti “Petulo,” monga ni mwavilili pa Mt 14:28.
^ Olo kuti, “wakhama.”
^ Olo kuti, “nkuwa.”
^ Olo kuti, “malaya oyangijila.”
^ Ni zina iyakine yakuziŵika nayo Satana, wamene ni nkulu olo kuti wolamulila viŵanda.
^ Onani matanthauzo a mawu ayakine.
^ Mu Chigiliki, “asaliyoni imozi.”
^ Onanisoti matanthauzo a mawu ayakine.