Wilembewa na Mateyo 12:1-50
-
Yesu, “Munecho wa Sondo” (1-8)
-
Munthu wolemala kwanja opojekewa (9-14)
-
Ntumiki wokondewa wa Mulungu (15-21)
-
Viŵanda vufumyiwa na mzimu utuŵa (22-30)
-
Chimo yosakhululukiliwa (31, 32)
-
Chimuti chuziŵika na vitwazi vake (33-37)
-
Chizindikilo cha Yona (38-42)
-
Mzimu wonyansa ujokela (43-45)
-
Amayi ŵake a Yesu nenekwake (46-50)
12 Pa nthawe iyakine Yesu enzepita m’minda ya tiligu pa nsiku ya Sondo. Ophunzila ŵake echimvwa njala ndipo eyamba kupulula ngala-gala za tiligu na kulya.
2 Afalisi pechiwona vamene ivi emuuja kuti: “Ona! Ophunzila ŵako ochita vinthu vamene ni vosayenelela kuvichita pa nsiku ya Sondo.”
3 Koma yove eŵayankha kuti: Kansi muliye ŵelenge vechichita Davite, pamozi na analume ŵenze nawo pechimvwa njala?
4 Yove eloŵa m’ng’anda ya Mulungu ndipo echilya mitanda ya nkate wowonesha kwa Mulungu,* wamene yove na ŵanthu ŵenze nawo enzefunikilalini kulya mokatijana na malamulo, koma ansembe ŵeka.
5 Olo kansi muliye ŵelenge m’Chilamulo kuti ansembe m’kachisi enzefwaya Sondo pokata ntchito nsiku ya Sondo koma nonkhala mphela osaphoniya?
6 Koma nukuujani kuti muyakine nkulu kupambana kachisi alipano.
7 Koma kuti mwamvwisha tanthauzo ya mawu akuti, ‘Nufuna chifundo osati nsembe,’ sembe muliye weluze ŵanthu osaphoniya.
8 Chifukwa Mwana wa munthu ni Munecho wa Sondo.”
9 Pechifuma pamene apo, echiyaloŵa m’malo ŵawo opemphelela.
10 Mwamene umo mwenze munthu wolemala kwanja. Tetyo ove emukonsha kuti, “Kansi n’vololeka kupojeka olwala pa nsiku ya Sondo?” Cholinga chawo chenze chakuti amupeze chifukwa nomupasa mulandu.
11 Koma yove eŵayankha kuti: “Kuti muli na mbelele imozi yeka, lomba mbelele yamene iyo noponela muchisengu pa nsiku ya Sondo, kansi alipo pakati panu angaleke ikata noifumya?
12 Komalomba munthu ni wofunika ngako kupambana mbelele! Tetyo ni vololeka kuchita chinthu chiweme pa nsiku ya Sondo.”
13 Pavuli pake euja munthu wamene uyo kuti: “Tambulula kwanja yako.” Yove etambulula chendi ndipo inkhala bwino-bwino monga ni iyake.
14 Koma Afalisi amene awo efuma nakuyapangana kuti amupaye.
15 Yesu pechiziŵa vamene ivi efumapo pamalo amene awo. Ŵanthu anyinji emukonkhelela ndipo yove eŵapojeka onse,
16 koma eŵalamula mwamphamvu kuti osati amuulule.
17 Echita vamene ivi kuti vechilaŵila Mulungu kupitila muli mneneli Yesaya vikwanilishiwe. Yove enena kuti:
18 “Onani ntumiki wangu wanasankha, wokondewa wangu, wamene onikondwelesha ngako. Nizaike mzimu wangu pali yove ndipo ŵanthu a mitundu iyakine azaŵawoneshe bwino-bwino chilungamo ngacho-ngacho.
19 Azakanganelini na munthu olo kuŵilikija ndipo paliye ati azamvwe mawu ŵake m’misewu ikulu-ikulu.
20 Tete yofwaika azaityolelini ndipo nthambo ya laiti yuchoka usi azaizimwelini mpaka azakwanishe kuleta chilungamo.
21 Shuwa, mu zina yake mitundu ya ŵanthu izayembekezele viweme.”
22 Pavuli pake emuletela munthu enze na chiŵanda, wamenesoti enze na vuto yosalola komasoti enzelaŵilalini ndipo yove emupojeka, mwakuti munthu wosalaŵila wamene uyo eyamba kulaŵila komasoti kulola.
23 Pevichitika tetyo gulu yamene iyo ya ŵanthu idabwa ngako ndipo eyamba kunena kuti: “Kansi wamene uyu angankhalelini wala Mwana wa Davite?”
24 Afalisi pechimvwa vamene ivi enena kuti: “Wamene uyu ofumyalini viŵanda na mphamvu zake yayi koma na mphamvu za Belezebule,* wolamulila viŵanda.”
25 Pechiziŵa maganizo ŵawo, yove eŵauja kuti: “Ufumu uliwonse woyaŵanika usila ndipo tauni iliyonse olo ng’anda iliyonse yoyaŵanika yunkhalishalini.
26 Molingana na vamene ivi, keno Satana ofumya Satana, niye kuti wayaŵanika. Lomba kansi Ufumu wake ungankhalepo tyani?
27 Komasoti keno newo nufumya viŵanda na mphamvu za Belezebule, kansi ophunzila ŵanu ovifumya na mphamvu za ŵani? N’chifukwa chake ophunzila ŵanu amene awo azakuweluzeni kuti nimwe ophoniya.
28 Koma keno newo nufumya viŵanda na mphamvu ya mzimu wa Mulungu, niye kuti Ufumu wa Mulungu wakufwikilani mozizimusha.
29 Olo kansi munthu angaloŵe tyani m’ng’anda ya munthu wamphamvu nomulonda katundu wake, keno angaleke kumumanga poyamba munthu wa mphamvu wamene uyo? Akachita tetyo niye pangakwanishe kutola katundu m’ng’anda mwamene umo.
30 Aliyense wamene alilini kumbali yangu oshushana na newo ndipo wamene asakata ntchito younganija ŵanthu pamozi na newo oŵamwaja.
31 Pa chifukwa chamene ichi nukuujani kuti ŵanthu azakhululukiliwe chimo ya ntundu uliwonse na mawu aliwonse onyoza, koma wonyoza mzimu azakhululukiliwelini.
32 Mwachisanzo aliyense wolaŵila mawu onyoza Mwana wa munthu, azakhululukiliwe. Koma aliyense wolaŵila mawu onyoza mzimu utuŵa, azakhululukiliwelini, muli ino nthawe* olo kusogolo.
33 Mwewo muchitisha kuti chimuti na vitwazi vake vinkhale viweme olo muchitisha kuti chimuti na vitwazi vake vinkhale vowola, chifukwa chimuti chuziŵika na vitwazi vake.
34 Mwewo ŵana anjoka, mungalaŵile tyani vinthu viweme pamene nimwe aipa? Chifukwa pakamwa polaŵila vilizule mu ntima.
35 Munthu muweme ofumya viweme kufumila mu chuma chake chiweme cha mu ntima mwake, koma munthu muipa ofumya vinthu viipa kufumila mu chuma chake chiipa cha mu ntima mwake.
36 Nukuujani kuti pa Nsiku ya Chiweluzo, ŵanthu azayankhe mulandu pa mawu aliwonse atyala-tyala ŵakulaŵila.
37 Chifukwa na mawu ŵako uzaweluziwe kuti niwe wolungama ndipo na mawu ŵakosoti uzaweluziwe kuti niwe wophoniya.”
38 Lomba alembi na Afalisi ayakine emusenga kuti: Mphunzisi tufuna mutiwoneshe chizindikilo.”
39 Poyankha yove eŵauja kuti: “M’badwo uipa komasoti wachigololo* ufunishisha kuwona chizindikilo. Koma upasiwelini chizindikilo chilichonse kupatulapo tyala chizindikilo cha mneneli Yona.
40 Chifukwa molingana na Yona wamene enkhala m’mala mwa chinsomba chikulu masiku atatu, usiku na mzuŵa, nayesoti Mwana wa munthu azankhale mu ntima mwa ichi chalo masiku atatu, usiku na mzuŵa.
41 Ŵanthu a ku Ninive azauke pa Nsiku ya Chiweluzo pamozi na m’badwo uyu ndipo azaushushe, chifukwa ove elapa pechimvwa ulaliki wa Yona. Komalomba muyakine opambana Yona alipano.
42 Mfumu inakazi ya kum’mwela azaiushe kwa akufwa pamozi na m’bwadwo uyu ndipo izaushushe, chifukwa mfumu inakazi yamene iyi iwela kufumila kwachulekejela chalo kuzakumvwa nzelu za Solomo. Komalomba muyakine opambana Solomo alipano.
43 Mzimu wonyansa ukafuma mwa munthu, upita m’malo aliye manzi kusakila-sakila malo onkhala ndipo upezalini malo aliwonse.
44 Tetyo unena kuti, ‘Nijokele ku ng’anda yangu yala yenifumamo.’ Ukafwika ufwana kuti munkhalalini aliyense koma ni mopyelewa luweme komasoti mowamyiwa luweme.
45 Ukachita tetyo uluta kuyatola mizimu iyakine 7 iipa ngako kupambana wamene uyo ndipo ikaloŵa nkati mwamene umo yunkhala mwamene umo. Vokonkhapo vake vochita va munthu wamene uyo vunkhala viipa ngako kupambana poyamba. Niyesoti mwati vizankhalile na m’badwo uipa wamene uyu.”
46 Ali nkati molaŵila na gulu yamene iyo ya ŵanthu kwiwela amayi ŵake na akwake. Ove epanama panja ndipo enzefuna kulaŵila naye.
47 Tetyo munthu muyakine emuuja kuti: “Amayi ŵanu nenekwanu ali apa panja, ofuna alaŵile namwe.”
48 Poyankha yove eyankha munthu wamene uyo wenzelaŵila naye kuti: “Kansi amayi ŵangu niŵani ndipo enekwangu niŵani?”
49 Pavuli pake etambulula kwanja yake nolata ophunzila ŵake, nonena kuti: “Ona! Amayi ŵangu nenekwangu ni aŵa!
50 Chifukwa aliyense ochita vakufuna Atata ŵangu akululu, wamene uyo niye nkwangu, mulongosi wangu na amayi ŵangu.”
Malizu a m'nyansi
^ Olo kuti, “nkate wachiwoneshelo.”
^ Ni zina iyakine yakuziŵika nayo Satana, wamene ni nkulu olo kuti wolamulila viŵanda.
^ Onani matanthauzo a mawu ayakine.
^ Olo kuti, “wosakhulupilika.”