Wilembewa na Mateyo 14:1-36
14 Pa nthawe yamene iyo Helode, wotonga dela,* echimvwa vokhuza Yesu
2 ndipo euja atumiki ŵake kuti: “Wamene uyu ni Yohani M’batizi. Euka kwa akufwa ndipo n’chifukwa chake ochita ntchito zamphamvu.”
3 Helode* ekata Yohani nomumanga ndipo emuzalilila mu djeli chifukwa cha Helodiya, mwanakazi wa nkwake Filipo wechilungula Helode wamene uyo.
4 Echita vamene ivi chifukwa chakuti Yohani emuuja kuti: “N’vosaloleka kuti mutole mwanakazi wamene uyu kunkhala nkazi wanu.”
5 Koma olo kuti Helode enzefuna kupaya Yohani, enzeyopa gulu ya ŵanthu chifukwa ove enzekhulupilila kuti enze mneneli.
6 Koma peifwika nsiku yokumbukila kuvyalika kwa Helode, mwana mwanakazi wa Helodiya evina pa nsiku yamene iyo ndipo ekondwelesha ngako Helode,
7 mwakuti echita lapa polonjeza msimbi wamene uyo kuti amupase chilichonse changasenge.
8 Lomba amayi ŵake pechichita kumuuja vakuti asenge, msimbi wamene uyo enena kuti: Munipase mutu wa Yohani M’batizi m’mbale lomba teti.
9 Mfumu yamene iyo ichimvwa chisoni koma poganizila lumbilo yala yeipanga komasoti ŵanthu ŵeyenze nawo pa phwando yamene iyo, ilamula kuti mutu wamene uyo upelekewe.
10 Tetyo etuma munthu kuti akatende mutu wa Yohani mu djeli.
11 Pavuli pake eleta mutu wamene uyo m’mbale noupeleka kuli msimbi wamene uyo ndipo yove eluta nawo kwa amayi ŵake.
12 Pavuli pake ophunzila ŵake ewela kuzatola muŵili wake na kuyauyika m’manda.
13 Tetyo eluta kuyauja Yesu, Yesu pechimvwa vamene ivi efumako kwamene uko na sitima noluta kumalo kuliye ŵanthu kuti akankhale kwayeka. Koma gulu ya ŵanthu peichimvwa vamene ivo, imukonkhelela na mendo kufumila m’matauni ŵawo.
14 Yesu pechiseluka mu sitima yamene iyo ewona gulu ikulu ya ŵanthu ndipo eŵamvwila chisoni noŵapojekela ŵanthu ŵawo olwala.
15 Koma chakunchingulo ophunzila ŵake ewela kuli yove nonena kuti: “Kuno kuliye ŵanthu ndipo nthawe yasila, ŵaujeni ŵanthu amene aŵa kuti anyamuke, alute m’minzi kuti akagule chakulya chakuti alye.”
16 Koma Yesu eŵayankha kuti: “Paliye chifukwa chakuti alutile. Mwewo muŵapase chakulya.”
17 Ove emuuja kuti: “Tiliye chilichonse pano, kupatulapo mitanda 5 ya nkate na nsomba ziŵili tyala.”
18 Yove enena kuti: “Letani kuno vamene ivo.”
19 Pavuli pake elamula gulu ya ŵanthu yamene iyo kuti inkhale pansi pa uzu. Tetyo etola mitanda 5 ya nkate na nsomba zala ziŵili nololesha kululu nopemphela. Pechichita tetyo esuna-suna mitanda yala ya nkate noitwala kuli ophunzila ŵake amene awo ndipo ove eyaŵila gulu yamene iyo ya ŵanthu.
20 Tetyo onse echilya nokuta ndipo visala evitola-tola mwakuti vitundu 12 vizula.
21 Koma amene echilya enze analume pafupi-fupi 5.000 osaŵelenga anakazi na ŵana atontho-atontho.
22 Pavuli pake mokulumija, Yesu euja ophunzila ŵake kuti akwele sitima notangula kuluta ku silya iyakine. Koma yove esalilila na cholinga chakuti auje ŵanthu amene awo kuti alute kwawo.
23 Pechiuja ŵanthu amene awo kuti alute, ekwela lupili ali yeka kuyapemphela. Yove enkhala kwamene uko ali yeka mpaka kwefipa.
24 Pa nthawe yamene iyi sitima yamene yala yenze iluta kutali* pakati pa manzi, ndipo yenzekankhiwa ngako na mafunde chifukwa enzelimbana na chimphepo cha mphamvu.
25 Koma pa ukamalonda wa 4* m’matemwakucha, yove efwika kuli ophunzila ŵake amene awo oyenda palulu pa manzi.
26 Ophunzila amene awo pechimuwona oyenda pa nyanja, echita wowa nonena kuti: “Shuwa amene aŵa ni mensomphenya!” Ndipo eŵilikija mwa wowa.
27 Koma nthawe yamene iyo Yesu eŵauja kuti: “Nkhazikani ntima pansi, ni newo. Osati muchite wowa.”
28 Lomba Petulo eyankha kuti: “Ambuye keno ni mwewo chendi niujeni niyende apa pa manzi niwele uko kuli mwewo.”
29 Yove emuuja kuti: “Wela!” Tetyo Petulo eseluka mu sitima yamene iyo noyenda pamanzi kuluta kwenze Yesu.
30 Koma pechiwona chimphepo cha nkuntho, echita wowa. Pechiyamba kumbila eŵilikija kuti: “Ambuye nipulumusheni!”
31 Nthawe yamene iyo Yesu etambulula kwanja yake nomukata ndipo emuuja kuti: “Wachikhulupililo chitontho wewo, ndaŵa yanji wakaikila?”
32 Pechikwela mu sitima, mphepo yala ya nkuntho ileka.
33 Pamene apo amene enze mu sitima mwamene umo emugwadila nonena kuti: “Nimwe chendi Mwana wa Mulungu.”
34 Ndipo etaukila ku ntunthu ku Genesaleti.
35 Ŵanthu a mu dela yamene iyi pechimuzindikila, etumija uthenga m’minzi yonse ya pafupi ndipo emuletela ŵanthu onse amene enzelwala.
36 Ŵanthu enzemusenga kuti angokata usalu wopyata wa m’mbali mwa malaya ŵake akunja, ndipo ŵanthu onse emukata epolelatu.
Malizu a m'nyansi
^ Mu Chigiliki, “gavana wa chigawo cha 4 cha dela.”
^ Wamene uyu ni Helode Antipa. Onani matanthauzo a mawu ayakine.
^ Mu Chigiliki, “masitadiya anyinji.” Sitadiya imozi yenze yolingana na mamita 185.
^ Nthawe yamene iyi yenze yamba 3 koloko mpaka zuŵa kufuma cha m’ma 6 koloko m’mawa.