Wilembewa na Mateyo 15:1-39
15 Tetyo Afalisi na alembi ofumila ku Yelusalemu eluta kwa Yesu nomukonsha kuti:
2 “Ndaŵa yanji ophunzila ŵanu ofwaya miyambo ya makolo? Mwachisanzo, osambalini kumanja* akafuna kulya chakulya.”
3 Koma yove eŵayankha kuti: “Ndaŵa yanji mwewo mufwaya malamulo a Mulungu chifukwa cha miyambo yanu?
4 Mwachisanzo, Mulungu enena kuti, ‘Mukolemekeza atata ŵanu na amayi ŵanu.’ Komasoti enena kuti, ‘aliyense wolaŵilila mawu aipa atata ŵake olo amayi ŵake akopaiwa.’
5 Koma mwewo munena kuti, ‘Aliyense wouja atata ŵake olo amayi ŵake kuti: “Chilichonse chanili nacho, chamene sembe nakuyavyani nacho ni mphaso yakuti nipeleke kwa Mulungu,”
6 ofunikilalini kuyavya atata ŵake.’ Tetyo mwachitisha kuti mawu a Mulungu ankhale a tyala-tyala chifukwa cha miyambo yanu.
7 Mwewo ŵanthu achinyengo! Yesaya elosela vachendi vokhuza mwewo pechinena kuti:
8 Aŵa ŵanthu onilemekeza na milomo yeka, koma mitima yawo aiika kutali na newo.
9 Chilichonse chakuchita ponilambila ni chatyala-tyala, chifukwa ophunzisa malamulo a ŵanthu monga kuti ni malamulo a Mulungu.’”
10 Pechinena vamene ivi, eita gulu ya ŵanthu kuti ivwendele ndipo eŵauja kuti: “Mvwishilani ndipo muzindikile tanthauzo yake:
11 Chuloŵa nkamwa mwa munthu niyelini chumuipisha, koma chufuma nkamwa mwake niye chumuipisha.”
12 Tetyo ophunzila ŵake ewela nomukonsha kuti: “Kansi muziŵa kuti Afalisi akalipa na vala vamwalaŵila?”
13 Koma yove eyankha kuti: “Mbewu iliyonse yamene iliye komolewe na Atata ŵangu akululu izanyuliwe.
14 Alekeni amene awo. Ove nasogoleli asalola. Tetyo keno munthu asalola osogolela asalola muyake, onse aŵili azaponele muchisengu.”
15 Tetyo Petulo emusenga kuti: “Tiujeni tanthauzo ya fanizo yala.”
16 Yesu eŵakonsha kuti: “Kansi namwesoti muliye mvwishe?
17 Kansi muziŵalini kuti chilichonse chaloŵa nkamwa chupita m’mala ndipo chukuyataiwa kuchimbuzi?
18 Koma chilichonse chamene chufuma pakamwa chufumila mu ntima ndipo vinthu vamene ivo niye vuipisha munthu.
19 Mwachisanzo, mu ntima mufuma maganizo aŵa aipa: Maganizo opaya munthu, achigololo, achiwelewele,* oiŵa, maumboni awenye komasoti kunyoza Mulungu.
20 Vamene ivi niye vinthu vuipisha munthu, koma kulya chakulya osasamba kumanja* kuipishalini munthu.”
21 Yesu pechifuma kwamene uko eluta m’madela aku Tulo na Sidoni.
22 Tetyo kwiwela mwanakazi muyakine wa ku Foinike kufumila m’madela amene awo ndipo eŵilikija kuti: “Nichitileni chifundo Ambuye, Mwana wa Davite. Mwana wangu mwanakazi ali na chiŵanda chamene chumutamanisha mwa nkhanza.”
23 Koma yove aliye muyankhe chilichonse. Tetyo ophunzila ŵake ewela nomuuja kuti: “Muujeni kuti alute, chifukwa opitilija mphela kuŵilikija kuvuli kwasu uku.”
24 Yove eyankha kuti: “Newo aliye nitumije kuli muyakine aliyense koma kuli mbelele zotaika za ng’anda ya Isilaeli.”
25 Koma mwanakazi wala ewela pafupi nomugwadila ndipo enena kuti: “Ambuye, niyavyeni!”
26 Yove emuyankha kuti: “Vingankhalelini luweme kutola chakulya cha ŵana noponyela tuimbwa.”
27 Mwanakazi wala enena kuti: “N’chendi Ambuye, koma lomba tuimbwa tukulya vinyenye vupona pa thebo ya ambuya atwine.”
28 Tetyo Yesu emuyankha kuti: “Wewo mayi, chikhulupililo chako ni chikulu. Vaufuna vichitike kuli wewo.” Ndipo nthawe yamene iyo mwana wake epola.
29 Yesu pechifuma kwamene uko, eluta kufupi na nyanja ya Galileya ndipo ekwela lupili nakuya nkhala pansi mulupili mwamene umo.
30 Pavuli pake ŵanthu anyinji ewela kuli yove. Ewela na ŵanthu olemala, ozizila vizo, avuto yosalola, avuto yosalaŵila na ayakine anyinji osiyana-siyana. Ŵanthu amene awo eŵankhazika kumendo kwake ndipo yove eŵapojeka.
31 Tetyo gulu ya ŵanthu amene awo idabwa kuwona kuti ŵanthu asalaŵila olaŵila, olemala oyenda komasoti ŵanthu asalola olola ndipo etamanda Mulungu wa Isilaeli.
32 Koma Yesu eita ophunzila ŵake noŵauja kuti: “Gulu yamene iyi ya ŵanthu yunimvwisha chifundo, chifukwa ŵanthu amene aŵa ankhala na newo kwa masiku atatu ndipo aliye chakulya. Nufunalini kuŵauja kuti alute na njala chifukwa angalenguke pa njila.”
33 Koma ophunzila amene awo emuuja kuti: “Kumalo kuliye ŵanthu monga ni kuno chakulya chokwanila gulu yonse yamene iyi tichifwane kuni?”
34 Lomba Yesu eŵakonsha kuti: “Muli na mitanda ingani ya nkate?” Ove emuyankha kuti: “Tili nayo 7 na tunsomba toŵelengeka.”
35 Tetyo pechiuja ŵanthu amene awo kuti ankhale pansi,
36 etola mitanda yala 7 ya nkate na zala nsomba. Pechipemphela, eisuna-suna noyamba kupeleka kuli ophunzila amene awo ndipo ove eyaŵila gulu ya ŵanthu amene awo.
37 Ŵanthu onse amene awo echilya nokuta, mwakuti visala vechitola-tola vizula vitundu vikulu-vikulu 7.
38 Koma amene echilya enze analume 4.000, osaŵelenga anakazi na ŵana atontho-atontho.
39 Pavuli pake, pechiuja ŵanthu amene awo kuti alute kwawo, yove ekwela sitima nofwika mu dela ya Magadani.
Malizu a m'nyansi
^ Ivi vutanthauzalini kuti enzekulya chakulya kumanja kulifipe koma kuti enzekonkhejalini miyambo ya Chiyuda yenzesambila kumanja.
^ Mu Chigiliki por·nei′a. Onani matanthauzo a mawu ayakine.
^ Ivi vutanthauzalini kuti enzekulya chakulya kumanja kulifipe koma kuti enzekonkhejalini miyambo ya Chiyuda yenzesambila kumanja.
