Wilembewa na Mateyo 16:1-28
16 Tetyo Afalisi na Asaduki eluta kwa Yesu ndipo pofuna kumuyesa, emusenga kuti aŵawoneshe chizindikilo chofumila kululu.
2 Koma Yesu eŵayankha kuti: “Kukayamba kufipa munena kuti, ‘Nyengo inkhale iweme, chifukwa kululu kwasweta monga ni mulilo.’
3 Koma m’mawa munena kuti, ‘Lelo kuwoneka kuti kulokwe mvula, chifukwa kululu kwasweta ndipo kuli mikumbi.’ Muziŵa kumasulila kawonekedwe ka kululu, koma mukangiwa kumasulila vizindikilo va nthawe ino.
4 M’badwo uipa komasoti wachigololo* ufunishisha mphela chizindikilo, koma upasiwelini chizindikilo chilichonse kupatulapo tyala chizindikilo cha Yona. Pechilaŵila vamene ivi efumako noŵasiya.
5 Tetyo ophunzila ŵake etaukila kusilya iyakine koma eluŵa kunyamula mikate.
6 Tetyo Yesu eŵauja kuti: “Nkhalani menso ndipo musamale na chofufumisha cha Afalisi na Asaduki.”
7 Koma ove eyamba kukambilana kuti: Tiliye nyamule mikate powela kuno.”
8 Yesu eziŵa vamene ivi ndipo enena kuti: “Mwewo achikhulupililo chitontho, ndaŵa yanji mukambilana zakuti muliye mikate?
9 Kansi mfundo yake muimvwishalini mphela? Olo kansi mukumbukilalini ŵanthu 5.000 echilya mitanda 5 ya mikate, komasoti kupaka kwa vitundu vemwiikamo chakulya chisala?
10 Olo kansi mukumbukilalini ŵanthu 4.000 amene echilya mitanda 7 ya nkate, komasoti kupaka kwa vitundu vikulu-vikulu vemwiikamo chakulya chisala?
11 Lomba ndaŵa yanji muzindikilalini kuti nunenalini za nkate, koma zakuti musamale na vofufumisha va Afalisi na Asaduki?
12 Pechinena tetyo ezindikila kuti enzenenalini zakuti asamale na vofufumisha va nkate, koma kuti asamale na venzephunzisa Afalisi na Asaduki.
13 Pechifwika mudela ya Kaisaleya wa Filipi, Yesu ekonsha ophunzila ŵake kuti: “Kansi ŵanthu onena kuti Mwana wa munthu niŵani?
14 Ove eyankha kuti: “Ayakine onena kuti nimwe Yohani M’batizi, ayakine onena kuti Eliya, koma ayakine onena kuti Yelemiya olo m’mozi wa aneneli.”
15 Lomba yove eŵakonsha kuti: “Lomba mwewo munena kuti nine ŵani?”
16 Simoni Petulo eyankha kuti: “Nimwe Khilisitu, Mwana wa Mulungu wamoyo.”
17 Yesu emuuja kuti: “Niwe wosangalala Simoni mwana wa Yona, chifukwa ni munthulini* wakuululila vamene ivi, koma atata ŵangu amene ali kululu niye achita vamene ivi.
18 Tetyo nanesoti nukuuja kuti: Wewo niwe Petulo ndipo pamwala uyu nizamangepo mpingo wangu. Magedi a Manda* azaugonjeselini.
19 Newo nizakupase makiyi a Ufumu wakululu. Chilichonse chaukuti uzamange pano pa chalo chizankhale kuti chamangiwa kale kululu, ndipo chilichonse chaukuti uzamasule pano pa chalo chizankhale kuti chamasuliwa kale kululu.”
20 Tetyo elamula ophunzila amene awo mwamphamvu kuti osati auje aliyense kuti yove ni Khilisitu.
21 Kufumila pa nthawe yamene iyo, Yesu eyamba kuuja ophunzila ŵake kuti yove ofunikila kuluta ku Yelusalemu. Kwamene uko akatamanishiwe ngako na akulu, ansembe akulu-akulu na alembi ndipo akapaiwe, koma pa nsiku yachitatu azaushiwe.
22 Tetyo Petulo etola Yesu noluta naye pambali noyamba kumuzuzula kuti: “Liwamileni ntima Ambuye. Osati mulole kuti vamene ivi vikuchitikileni olo patontho.”
23 Koma yove echunguluka nouja Petulo kuti: “Luta kuvuli kwangu, Satana! Niwe chosokoneza kuli newo chifukwa vauganiza ni maganizo lini a Mulungu, koma ni maganizo a ŵanthu.”
24 Pavuli pake Yesu euja ophunzila ŵake kuti: “Keno munthu ofuna kunikonkhelela, alikane yeka ndipo atakule chimuti chake chotamanilapo* nopitilija kunikonkhelela.
25 Chifukwa aliyense wamene ofuna kupulumusha moyo wake azautaye, koma aliyense wataya moyo wake chifukwa cha newo azaufwane.*
26 Kansi munthu angapindule chinji keno angafwane vinthu vonse va ichi chalo koma notaya moyo wake? Olo kansi munthu angapeleke chinji changachinjanishe na moyo wake?
27 Chifukwa Mwana wa munthu azawele mu ulemelelo wa Atata ŵake pamozi na angelo ŵake. Pa nthawe yamene iyo azapeleke mphoto kuli aliyense mokatijana na minkhalidwe yake.
28 Shuwa nukuujani kuti pali ayakine apanama pano amene azalaulelini imfwa olo patontho mpaka poyamba akawone Mwana wa munthu owela monga Mfumu.”
Malizu a m'nyansi
^ Olo kuti, “wosakhulupilika.”
^ Mu Chigiliki, “nyomfu na milopa.”
^ Amene aŵa ni manda a ŵanthu onse. Onani matanthauzo a mawu ayakine.
^ Onani matanthauzo a mawu ayakine.
^ Olo kuti, “azankhalesoti na moyo.”
