Wilembewa na Mateyo 17:1-27
17 Papita masiku 6, Yesu etola Petulo, Yakobo na nkwake Yohani nokwela nawo mulupili itali kwaŵeka-ŵeka.
2 Tetyo ove ewona kuti wachinja mawonekedwe ŵake. Chinso chake chiŵala ngako monga ni zuŵa ndipo malaya ŵake akunja eŵala* ngako.
3 Pavuli pake ewona Mose na Eliya okambilana na Yesu.
4 Tetyo Petulo euja Yesu kuti: “Ambuye vingankhale luweme kuti sewo tikonkhala pano. Keno mufuna, nimange matenti atatu pano, imozi yanu, imozi ya Mose na iyakine ya Eliya.
5 Akalilaŵila tetyo, nkumbi woŵala ngako wiŵavingilija ndipo pemvwika mawu kufumila mu nkumbi wamene uyo akuti: “Uyu ni Mwana wangu wanukonda wamene onikondwelesha ngako. Mukomumvwila.”
6 Ophunzila amene awo pechimvwa vamene ivi egwada noŵelama mpaka vinso vawo pansi ndipo echita wowa ngako.
7 Pavuli pake Yesu evwendela kuli ove ndipo eŵakata nonena kuti: “Ukani, osayopa.”
8 Pechilolesha ewona kuti paliye muyakine aliyense koma Yesu yeka.
9 Penzeseluka mulupili mwamene umo, Yesu eŵalamula kuti: “Osauja aliyense za mensomphenya amene aŵa mpaka Mwana wa munthu akaushiwe kwa akufwa.”
10 Koma ophunzila amene awo emukonsha kuti: “Lomba ndaŵa yanji alembi onena kuti Eliya ofunikila kuwela poyamba?”
11 Yove eyankha kuti: “Eye, Eliya azawele chendi ndipo azawejeleshe vinthu vonse.
12 Koma olo n’tetyo newo nukuujani kuti Eliya ewela kale koma ove aliye muzindikile ndipo emuchitila vilivonse venzefuna ove. Ove azatamanishesoti Mwana wa munthu mwanjila yamene iyi.”
13 Pechilaŵila tetyo ophunzila amene awo eziŵa kuti onena za Yohani M’batizi.
14 Pechifwika pafupi na gulu ya ŵanthu, mwanalume muyakine emuvwendelela ndipo emugwadila nonena kuti:
15 “Ambuye muchitile chifundo mwana wangu mwanalume, chifukwa yove olwala matenda opozewa ndipo ovutika ngako. Nthawe zinyinji oponela pa mulilo komasoti m’manzi.
16 Niluta naye kuli ophunzila ŵanu koma ekangiwa kumupojeka.”
17 Yesu eyankha kuti: “Mwewo m’badwo uliye chikhulupililo na wosokonezeka maganizo, kansi ninkhale namwe mphela mpaka nthawe yanji? Nipitilije kukupililani mpaka nthawe yanji? Welani naye kuno.”
18 Tetyo Yesu ezuzula chiŵanda chamene icho ndipo chifuma. Nthawe yamene iyo mulumbwana wamene uyo epola.
19 Pavuli pake ophunzila eluta kuli Yesu penze kwayeka nomukonsha kuti: “Ndaŵa yanji sewo tikangiwa kufumya chiŵanda chala?”
20 Yove eŵayankha kuti: “Chifukwa cha kuchepa kwa chikhulupililo chanu. Shuwa nukuujani, keno mungankhale na chikhulupililo cholingana na kansele ka mpilu kuchepa kwake, mungakwanishe kuuja lupili iyi kuti, ‘Fuma pano ulute apo,’ ndipo izafumepo chendi. Paliye chati chizaleke kwanishika kuli mwewo.”
21 ——
22 Pechisonkhana pamozi ku Galileya, Yesu eŵauja kuti: “Mwana wa munthu azapelekewe m’manja mwa ŵanthu
23 ndipo azamupaye. Koma pa nsiku yachitatu azaushiwe.” Ove pechimvwa vamene ivi echimvwa chisoni ngako.
24 Pechifwika ku Kapelenawo, ŵanthu osonkhesha nsonkho wa madalakima aŵili eluta kwa Petulo nomukonsha kuti: “Kansi mphunzisi wanu opeleka madalakima aŵili a nsonkho?”
25 Yove enena kuti: “Eye opeleka.” Koma pechiloŵa m’ng’anda akaliye laŵila chilichonse, Yesu emukonsha kuti: “Simoni, uganiza tyani? Kansi mafumu a pa chalo olondela ndalama za viphaso olo za nsonkho kufumila kwa ŵani? Kufumila kuli ŵana ŵawo olo kuli ŵanthu achilwendo?”
26 Pechiyankha kuti: “Kufumila kuli ŵanthu achilwendo,” Yesu emuuja kuti: “Niye kuti ŵana ofunikilalini kupeleka nsonkho.
27 Koma kuti osati tiŵakalipishe, luta kunyanja, ukaponye mbezo ndipo ukatole nsomba yati ukayambilile kukasha. Ukeiyashamisha kukamwa kwake, ukapezemo ndalama imozi ya nsimbi.* Ukaitole nolipilila nsonkho wako na wangu.”
Malizu a m'nyansi
^ Olo kuti, “etuŵa.”
^ Mu Chigiliki, “ndalama ya siteta.” Ndalama yamene iyi yulingana na madalakima 4.
