Wilembewa na Mateyo 18:1-35
18 Pa nthawe yamene iyo, ophunzila ewela pafupi na Yesu nomukonsha kuti: “Niŵani ngaye-ngaye akuti azankhale nkulu ngako mu Ufumu wakululu?”
2 Tetyo yove eita mwana ntontho nomupanamika pakati pawo.
3 Pavuli pake eŵauja kuti: “Shuwa nukuujani, mukaleka chinja nonkhala monga ni ŵana atontho-atontho, muzaloŵelini mu Ufumu wakululu.
4 Tetyo aliyense akuti azalichefye monga ni mwana uyu ntontho niye akuti azankhale nkulu ngako mu Ufumu wakululu.
5 Komasoti aliyense walondela mwana ntontho monga ni wamene uyu mu zina yangu walondelasoti newo.
6 Koma aliyense wokalipisha m’mozi wa tuŵana utu twamene tunikhulupilila, vingankhale luweme ngako kumumangilila chimwala cha mphelo mu nkosi mwake chakuyendesha bulu, nomuponya m’nyanja yonoka.
7 Soka kuli ichi chalo chifukwa cha vosokoneza! Eye paliye mwatingachitile, vosokoneza vamene ivo vufunika kuwela chendi, koma soka kuli munthu woleta chusokoneza!
8 Tetyo keno kwanja yako olo kwendo yako yukusokoneza, uitende noitaya kutali. Kuli bwino kuti ukafwane moyo uliye chizo chimozi olo uli wolemala kusiyana na kuti uponyewe m’mulilo wosasila uli na manja onse aŵili olo mendo onse aŵili.
9 Komasoti keno linso yako yukuchimwisha* uichose noitaya kutali. Ni bwino kuti ukafwane moyo uli na linso imozi kusiyana na kuti uponyewe mu Gehena* wa mulilo uli na menso onse aŵili.
10 Samalani mwewo mwa ŵanthu kuti osati munyoze m’mozi wa utu tuŵana, chifukwa nukusimikijilani kuti angelo ŵawo kululu owona chinso cha Atata ŵangu akululu nthawe zonse.
11 ——
12 Muganiza tyani? Keno munthu ali na mbelele 100 ndipo imozi mwa mbelele zamene izo yasoŵa, kansi angalekesiya mbelele 99 zala mulupili noluta kuyasakila-sakila yala yasoŵa?
13 Akaifwana, shuwa nukuujani, osangalala ngako na mbelele yamene iyo kusiyana na zala 99 ziliye soŵe.
14 Molingana na vamene ivi, Atata ŵangu akululu ofunalini kuti olo m’mozi wa utu tuŵana awonongeke.
15 Komasoti keno m’bale wako wakuchimwila, ulute ukamufotokozele vawaphoniya* vamene ivo pamweka, wewo na yove. Keno wakumvwila, niyekuti wajosha m’bale wako wamene uyo.
16 Koma akaleka kukumvwila, uluteko na munthu muyakine m’mozi olo aŵili, kuti nkhani yonse ikasimikijilike na umboni wa mboni* ziŵili olo zitatu.
17 Amene aŵasoti akaleka kuŵamvwila, uuje mpingo. Ndipo mpingo wamene uyo akaleka kuumvwilasoti, kuli wewo ankhale monga ni munthu wofumila mu ntundu uyakine komasoti monga ni wosonkhesha nsonkho.
18 Shuwa nukuujani, vilivonse vamukuti muzamange pano pa chalo vizankhale kuti vamangiwa kale kululu. Ndipo vilivonse vamukuti muzamasule pano pa chalo vizankhale kuti vamasuliwa kale kululu.
19 Komasoti nukuujani kuti, keno aŵili a mwewo pano pa chalo mungapangane kuti musenge chinthu chofunika, Atata ŵangu akululu azakuchitileni.
20 Chifukwa kulikonse kwasonkhana aŵili olo atatu mu zina yangu, newo nizankhale pakati pawo.”
21 Pavuli pake Petulo ewela nomukonsha kuti: “Ambuye, kansi m’bale wangu nikomukhululukila kangani akaniphoniyela? Mpaka maulwendo 7 kansi?”
22 Yesu emuyankha kuti: “Nukuuja kuti, osati maulwendo 7 ŵeka yayi, koma mpaka maulwendo 77.
23 Ni chifukwa chake Ufumu wakululu tingaulinganije na mfumu yamene yenzefuna kuti antchito ŵake aweje nkhongole.
24 Mfumu yamene iyo peiyamba kulondela nkhongole zamene izo, atumiki ŵake eleta munthu wamene enze na nkhongole ya matalente 10.000.*
25 Koma chifukwa chakuti sembe aliye kwanishe kuweja nkhongole yamene iyo, abwana ŵake elamula kuti mwanalume wamene uyu, nkazi wake, ŵana ŵake komasoti vonse venze navo vigulisiwe nomuwejela ndalama zake.
26 Tetyo wantchito wamene uyu egwada pansi nomuŵelamila ndipo enena kuti, ‘Nilezeleni ntima pulizi, nizakuwejeleni zonse.’
27 Bwana wamene uyo echimvwa chifundo na vamene ivi ndipo emusiya wantchito wamene uyo nomukhululukila yala nkhongole yake.
28 Koma wantchito wamene uyo pechifuma ekumana na wantchito muyake wamene enze na nkhongole yake yokwana madinali 100. Tetyo emukata noyamba kumushipa pa nkosi, nonena kuti, ‘Weja nkhongole yangu kamangu.’
29 Wantchito muyake wamene uyo egwada pansi noyamba kumudandaulila kuti, ‘Nilezeleni ntima pulizi, nizakuwejeleni.’
30 Koma yove aliye lole ndipo eluta naye ku djeli kuti akamuzalilile mpaka akasilije kuweja nkhongole yamene iyo.
31 Antchito ayake pechiwona vamene ivo vichitika, echimvwa chifundo ngako ndipo eluta kuli abwana ŵawo na kuyaŵafotokozela vonse vichitika.
32 Tetyo abwana ŵake amene awo emuita nomuuja kuti: ‘Wantchito muipa wewo, newo nakukhululukila nkhongole yonse yala pawanidandaulila.
33 Kansi sembe uliye muchitile chifundo wantchito muyako, monga ni mwanachitila newo kuli wewo?’
34 Tetyo abwana ŵake amene awo ekalipa ngako ndipo eluta naye kuli wopanamila djeli kuti akamuzalilile mpaka akasilije kuweja nkhongole yonse yala.
35 Atata ŵangu akululu azakuchitilenisoti monga ni vamene ivi keno aliyense wa mwewo okhululukilalini m‘bale wake na ntima wonse.”
Malizu a m'nyansi
^ Olo kuti, “yukukhubulwisha.”
^ Onani matanthauzo a mawu ayakine.
^ Mu Chigiliki, “ulute ukamuzuzule.”
^ Mu Chigiliki, “na pakamwa pa mboni.”
^ Matalente 10.000 ansimbi enze olingana na madinali 60 miliyoni.