Wilembewa na Mateyo 19:1-30
19 Yesu pechisilija kulaŵila vinthu vamene ivi, efuma ku Galileya noluta ku malile a Yudeya kusilya iyakine ya Yolodano.
2 Gulu ikulu ya ŵanthu imukonkhelela kwamene uko ndipo yove eŵapojeka.
3 Tetyo Afalisi ewela kuli yove na cholinga chofuna kumuyesa ndipo emukonsha kuti: “Kansi n’vololeka kuti mwanalume aleke mwanakazi wake pa chifukwa chilichonse?”
4 Yesu eyankha kuti: “Kansi muliye ŵelenge kuti wamene elenga ŵanthu pachiyambi eŵalenga mwanalume na mwanakazi
5 nonena kuti: ‘Chifukwa cha vamene ivi mwanalume azasiye atata ŵake na amayi ŵake nolipamikija kuli mwanakazi wake ndipo aŵili amene awo azankhale muŵili umo’?
6 Mwakuti onkhalalinisoti aŵili koma muŵili umo. Tetyo chawamanga pamozi,* Mulungu munthu osati achipatule.”
7 Ove emukonsha kuti: “Lomba ndaŵa yanji Mose elamula kuti mwanalume akopeleka chikalata chosilijila ukwati kuli mwanakazi nomuleka?”
8 Yove eŵayankha kuti: “Chifukwa cha kuyuma mitima kwanu, Mose ekulolani kuti mukosilija ukwati, koma kufumila pachiyambi venzelini tetyo.
9 Newo nukuujani kuti aliyense waleka mwanakazi wake nolungula muyakine wachita chigololo kupatulapo keno wamuleka chifukwa cha chiwelewele.”*
10 Pavuli pake ophunzila ŵake enena kuti: “Keno vili tetyo kuli munthu na mwanakazi wake, niye kuti vingankhale luweme kusalungula.”
11 Yove eŵauja kuti: “Ni onselini angakwanishe kuchita vamene ivi, koma tyala ŵala ali na mphaso.
12 Ayakine olungulalini chifukwa chakuti evyalika tetyo, ndipo ayakine chifukwa chakuti elowewa na ŵanthu. Koma pali ayakine amene ofunalini kulungula chifukwa cha Ufumu wakululu. Amene angakwanishe kuchita vamene ivi achite.”
13 Pavuli pake ŵanthu emuletela ŵana atontho-atontho kuti aike manja pali ove noŵapemphelela, koma ophunzila amene awo eŵakalipila.
14 Koma Yesu eŵauja kuti: “Alekeni ŵana amene awo ndipo osaŵalesha kuti awele kuli newo, chifukwa Ufumu wakululu ni wa ŵanthu monga namene aŵa.”
15 Tetyo eika manja ŵake pali ŵana amene awo pavuli pake efuma kwamene uko.
16 Lomba munthu muyakine ewela kuli yove nomukonsha kuti: “Mphunzisi, kansi ni vinthu viweme votyani vanufunikila kuchita kuti nikafwane moyo wosasila?”
17 Yove emuyankha kuti: “Ndaŵa yanji unikonsha vokhuza vinthu viweme? Pali tyala mmozi wamene ni muweme. Tetyo keno ufuna kuzafwana moyo, ukosunga malamulo nthawe zonse.”
18 Yove emukonsha kuti: “Malamulo otyani?” Yesu eyankha kuti: “Osapaya munthu,* osachita chigololo, osaiŵa, osapeleka umboni wa wenye.
19 Mukolemekeza atata ŵanu na amayi ŵanu, komasoti yakuti, Ukokonda muyako monga ni mwaulikondela weka.”
20 Mulumbwana wamene uyo eyankha Yesu kuti: “Nankhala nukonkheja malamulo onse amene aŵa, n’chinjisoti chiyakine chanufunikila kuchita?”
21 Yesu emuuja kuti: “Keno ufuna kunkhala wangwilo,* nkhoya ukagulise katundu wako wonse ndipo ndalama zake ukapase osauka. Ukachita tetyo uzankhale na chuma kululu, tetyo uwele uzankhale wophunzila wangu.”
22 Mulumbwana wamene uyo pechimvwa vamene ivi efumapo ali na chisoni, chifukwa enze na katundu unyinji.
23 Tetyo Yesu euja ophunzila ŵake kuti: “Shuwa nukuujani, vizankhale vovuta kuti munthu wolemela azalowe mu Ufumu wakululu.
24 Komasoti nukuujani kuti, ni vosavuta kuti ngamila iloŵe pakabowo ka nsingano kusiyana nakuti munthu wolemela aloŵe mu Ufumu wakululu.”
25 Ophunzila amene awo pechimvwa vamene ivi, edabwa ngako ndipo ekonsha kuti: “Lomba angapulumuke ni ŵani?”
26 Yesu eŵaloleshesha noŵauja kuti: “Kuli ŵanthu vamene ivi n’vosakwanishika, koma vinthu vonse n’vokwanishika kwa Mulungu.”
27 Pavuli pake Petulo enena kuti: “Onani! Sewo tasiya vinthu vonse nokukonkhelelani, lomba kansi tizafwane chinji?”
28 Yesu eŵauja kuti: “Shuwa nukuujani, pa nthawe yolengasoti vinthu, Mwana wa munthu azankhale pa mpando wake wachifumu wa ulemelelo, mwewo amene mwankhala munikonkhelela muzankhalesoti m’mipando yachifumu 12, nakuza weluza mafuko 12 ŵa Isilaeli.
29 Aliyense wamene wasiya ng’anda, enekwake, azilongosi, atata, amama, ŵana olo minda chifukwa cha zina yangu, azalondele vinyinji kuwelejela maulwendo 100 kupambana vamene ivi komasoti azafwane moyo wosasila.
30 Koma anyinji amene ni oyambilila azankhale osilijila ndipo osilijila azankhale oyambilila.”
Malizu a m'nyansi
^ Mu Chigiliki, “chawamanga mu djoko imozi.”
^ Mu Chigiliki por·nei′a. Onani matanthauzo a mawu ayakine.
^ Kupaya kwamene uku nikupaya munthu mochita konzekela osati mwalamulo.
^ Olo kuti, “kunkhala wokwanila pamenso pa Mulungu.”