Wilembewa na Mateyo 20:1-34
20 Ufumu wakululu uli monga ni munthu wamene enze na munda wa mpesa, wamene echelela m’mawa ngako kuyasakila ŵanthu aganyu kuti akakate ntchito m’munda wake.
2 Pechikatijana na aganyu amene aŵa kuti akoŵapasa ndalama ya dinali imozi pa nsiku, eŵatumija ku munda wake wa mpesa.
3 Cha m’ma 9 koloko m’mawa* elutasoti kuti akasakile ŵanthu ayakine, ndipo ewona ayakine alipaname tyala pa maketi aliye vochita.
4 Amene awosoti eŵauja kuti, ‘Mwewo namwe nkhoyani mukakate ntchito m’munda wa mpesa. Nizakupaseni malipilo aweme.’
5 Tetyo ove eluta. Cha m’ma 12 koloko na 3 koloko nzuŵa,* munecho wa munda wala elutasoti kuyachita chimozi-mozi.
6 Posilijila pake, cha m’ma 5 koloko ku nchingulo* elutasoti ndipo echiyafwana ayakine alipaname tyala. Yove eŵakonsha kuti, ‘Ndaŵa yanji muli tyala paname pamene pano nsiku yonse osakata ntchito?’
7 Ove eyankha kuti, ‘Chifukwa paliye watilemba ganyu.’ Yove eŵauja kuti, ‘Namwesoti nkhoyani mukakate ntchito ku munda wangu wa mpesa.’
8 Nchingulo mwamene umo, munecho wala wa munda wa mpesa euja kapiteni wake kuti, ‘Ita antchito ŵala uŵapase malipilo ŵawo, kuyambila osilijila nosilijila na oyambilila.’
9 Ŵala ŵanthu eyamba ntchito 5 koloko pechifwika, aliyense elondela dinali imozi.
10 Tetyo oyambilila ŵala pechifwika eganiza kuti alondele zinyinji koma nawosoti malipilo ŵechilondela yenze dinali imozi.
11 Pechilondela, eyamba kudandaulila munecho wa munda wa mpesa wala
12 kuti, ‘Aŵa osilijila akata tyala ntchito kwa wani awa, koma mwaŵapasa malipilo olingana na sewo amene takata ntchito yoŵaŵa nsiku yonse pazuŵa!’
13 Koma poyankha kuli m’mozi wa ove, munecho wa munda wamene uyo enena kuti, ‘Shamwali, paliye chanakuphoniyela. Tipangana malipilo a dinali imozi, n’tetyo lini?
14 Londela tyala malipilo ŵako wakuya. Nufuna nipase uyu wosilijila malipilo olingana na ŵanapasa wewo.
15 Kansi niliye ufulu wochita vanufuna na vinthu vangu? Olo kansi linso yako yachita njilu* chifukwa chakuti nine muweme?’*
16 Tetyo osilijila azankhale oyambilila ndipo oyambilila azankhale osilijila.”
17 Ali panjila ikuya ku Yelusalemu, Yesu etola ophunzila ŵake ŵala okwana 12 noluta nawo pambali noŵauja kuti:
18 “Lomba tikuya ku Yelusalemu ndipo Mwana wa munthu akapelekewe kuli ansembe akulu-akulu na alembi. Ove akamuweluze kuti apaiwe,
19 ndipo akamupeleke kuli ŵanthu a mitundu iyakine kuti amuchitile viipa, kumukwapula nomupanyika pachimuti ndipo pa nsiku yachitatu azaushiwe.”
20 Pavuli pake mwanakazi wa Zebedayo efwika kuli Yesu na ŵana ŵake analume ndipo emugwadila nomusenga kanthu kayakine.
21 Yove ekonsha mwanakazi wamene uyo kuti: “Mufuna chinji?” Mwanakazi wamene uyo eyankha kuti: “Lonjezani kuti ŵana ŵangu analume aŵili amene aŵa, m’mozi azankhale kukwanja yanu ngayo muyakine azankhale ku kwanja yanu ya manjele mu Ufumu wanu.”
22 Yesu eyankha kuti: “Muziŵalini vamusenga. Kansi mungamwe vanasala patontho kuti nimwe?” Ove eyankha kuti: “Eye tingamwe.”
23 Yove eŵauja kuti: “Eye muzamwe chendi vanasala patontho kumwa. Koma ninelini woyenelela kusankha akuti azankhale ku kwanja yangu ngayo olo ya manjele. Atata ŵangu azapeleke mwayi wamene uyo kuli ŵala ŵechikonzela.”
24 Ophunzila 10 ŵala pechimvwa vamene ivi, ekalipa ngako na analume aŵili pa ukwawo amene awo.
25 Koma Yesu eŵaita noŵauja kuti: “Mwewo muziŵa kuti olamulila a ŵanthu a mitundu iyakine okandilila ŵanthu ŵawo ndipo akulu-akulu owonesha mphamvu zawo pali ove.
26 Vufunikilalini kunkhala teti pakati panu. Koma aliyense wamene ofuna kuti ankhale nkulu pakati panu ofunikila kunkhala ntumiki wanu
27 ndipo wamene ofuna kuti ankhale woyamba pakati panu ofunikila kunkhala wantchito wanu.
28 Ivi vulingana na vechichita Mwana wa munthu. Yove aliyewele kuzatumikiliwa koma kuzatumikila na kuzapeleka moyo wake dipo* kuti awombole ŵanthu anyinji.”
29 Ove penzefuma mu Yeliko, gulu ikulu ya ŵanthu imukonkhelela.
30 Tetyo analume aŵili amene enze na vuto yosalola enkhala pansi m’mbali mwa nsewu ndipo pechimvwa kuti Yesu opita eŵilikija kuti: “Ambuye, Mwana wa Davite, tichitileni chifundo!”
31 Tetyo gulu ya ŵanthu yamene iyo iŵakalipila noŵauja kuti ankhale chelele. Koma ove niye pechiŵilikija ngako kuti: “Ambuye, Mwana wa Davite, tichitileni chifundo!”
32 Tetyo Yesu epanama, ndipo eŵaita noŵakonsha kuti: “Mufuna kuti nikuchitileni chinji?”
33 Ove emuyankha kuti: “Ambuye, tiyavyeni kuti tiyambe kulola.”
34 Pechichita chifundo, Yesu ekata menso ŵawo. Nthawe yamene iyo ŵanthu amene enze na vuto yosalola amene awo eyamba kulola ndipo emukonkhelela.
Malizu a m'nyansi
^ Mu Chigiliki, “awa yachitatu,” kuŵelenga kufumila m’ma 6 koloko m’mawa.
^ Mu Chigiliki, “awazi ya 6 na awazi ya 9,” kuŵelenga kufumila m’ma 6 koloko m’mawa.
^ Mu Chigiliki, “awa ya 11,” kuŵelenga kufumila m’ma 6 koloko m’mawa.
^ Mu Chigiliki, “ni iipa.”
^ Olo kuti, “wopasa.”
^ Onani matanthauzo a mawu ayakine.