Wilembewa na Mateyo 21:1-46
21 Pechifwika kufupi na Yelusalemu na kuyafwika ku Betefagi palupili ya Maolivi, Yesu etuma ophunzila ŵake aŵili.
2 Yove eŵauja kuti: “Lutani m’munzi uyo wamuwona. Kwamene uko mukafwane bulu ali mumangilile pamozi na mwana wake mwanalume. Mukaŵamasule nowela nawo kuli newo.
3 Keno munthu muyakine akakukonsheni chilichonse, mukanene kuti, ‘Ambuye oŵafuna.’ Ndipo nthawe yamene iyo akaŵatumije kuno.”
4 Vamene ivi vichitika chendi kuti vechinena Mulungu kupitila muli mneneli vikwanilishiwe, vakuti:
5 “Ujani mwana mwanakazi wa Ziyoni* kuti: ‘Ona! Mfumu yako ikuza kuli wewo. Ni yofasa ndipo yakwela bulu, yakwela mwana mwanalume wa bulu, mwana wa nyama yonyamula katundu.’”
6 Tetyo ophunzila amene awo enyamuka nakuyachita vechiŵauja Yesu.
7 Ove eleta wala bulu pamozi na mwana wake mwanalume. Pavuli pake eyanjika malaya ŵawo akunja pa nsana pa abulu amene awo ndipo yove ekwela pa nsana pa mwana wa bulu wamene uyo.
8 Ŵanthu anyinji amene enze pamene apo eyanjika malaya ŵawo akunja mu nsewu ndipo ayakine enzetenda misambo yavimiti noyanjika mu nsewu.
9 Komasoti gulu ya ŵanthu yenze pasogolo pake na m’vuli mwake yenze ŵilikilja kuti: M’pulumusheni Mwana wa Davite! Wodalisiwa ni wamene akuza mu zina ya Yehova! M’pulumusheni kululu kwamene uko!”
10 Pechiloŵa mu Yelusalemu tauni yonse inyang’anyika ndipo ayakine enze konsha kuti: “Kansi wamene uyu ni ŵani?”
11 Gulu yamene iyo ya ŵanthu yenze yankha kuti: “Wamene uyu ni mneneli Yesu, wofumila ku Nazaleti, ku Galileya!”
12 Pavuli pake Yesu eloŵa m’kachisi nopitikisha ŵanthu onse enzegulisa nogula vinthu m’kachisi mwamene umo, ndipo egadabula mathebo a ŵanthu amene enzesintha ndalama komasoti mabenje a ŵanthu amene enzegulisa nkhunda.
13 Yove eŵauja kuti: “Malemba onena kuti, ‘Ng’anda yangu izaitiwe kuti ng’anda yopemphelelamo,’ koma mwewo muiyalusha nkhwema ya akawalala.”
14 Pavuli pake ŵanthu amene enze na vuto yosalola komasoti olemala ewela kuli yove m’kachisi mwamene umo ndipo eŵapojeka.
15 Ansembe akulu-akulu na alembi pechiwona vodabwisa vamene ivo vechichita komasoti alumbwana amene enze ŵilikija m’kachisi mwamene umo kuti, “M’pulumusheni Mwana wa Davite!” ekalipa ngako
16 ndipo emukonsha kuti: “Kansi ukumvwa vamene ivi vakunena ŵanthu?” Yesu eyankha kuti: “Eye. Kansi muliye ŵelenge vamene ivi kuti, ‘Mwachitisha kuti nkamwa mwa ŵana na mwa malucheche mufume mawu otamanda’?”
17 Pavuli pake yove eŵasiya nofumamo m’tauni yamene iyo noluta ku Betaniya ndipo eyona kwamene uko.
18 Penze jokela mu tauni yala m’mawa ngako, echimvwa njala.
19 Tetyo ewona chimuti cha nkhuyu m’mbali mwa nsewu ndipo pechiluta pamene apo, aliye fwanemo chilichonse koma matepo ŵeka. Tetyo euja chimuti chamene icho kuti: “Kufumila lelo uzatwalelini soti chitwazi chilichonse.” Ndipo chimuti chamene icho chifota nthawe yamene iyo.
20 Ophunzila ŵala pechiwona vamene ivi, edabwa nonena kuti: “Vakwanishika tyani kuti chimuti cha nkhuyu chamene ichi chifote nthawe yamene iyi?”
21 Poyankha Yesu eŵauja kuti: “Shuwa nukuujani, keno mungankhale na chikhulupililo ndipo mukaikilalini, muzakwanishe kuchita vanachitila chimuti ichi cha nkhuyu. Komasoti kupambana pamene apa, muzakwanishe kuuja lupili iyi kuti, ‘Nyamuka pano ukaliponye m’nyanja,’ ndipo vizachitike chendi.
22 Vinthu vonse vamukuti muzasenge m’mapemphelo ŵanu, muzalondele keno muli na chikhulupililo.”
23 Yesu pechiloŵa m’kachisi nophunzisa, ansembe akulu-akulu na akulu ewela kuli yove nomukonsha kuti: “Kansi muli na ulamulilo wochitila vinthu vamene ivi? Ndipo ni ŵani ekupasani ulamulilo wamene uyu?”
24 Yesu eŵayankha kuti: “Nanesoti nikukonsheni chinthu chimozi. Mukaniyankha chinthu chamene icho, nane nikuujeni wamene enipasa ulamulilo wanuchitila vinthu vamene ivi:
25 Kansi ubatizo wenzechita Yohani wifumila kuni? Kululu olo kuŵanthu?” Koma ove eyamba kukambilana kuti: “Tikalaŵila kuti, ‘Wifumila kululu,’ atikonshe kuti, ‘Lomba ndaŵa yanji muliye mukhulupilile?’
26 Komasoti tingalaŵilelini kuti, ‘Wifumila kuŵanthu,’ chifukwa tuyopa gulu iyi ya ŵanthu, pakuti onse amene aŵa okhulupilila kuti Yohani enze mneneli.”
27 Tetyo ove eyankha Yesu kuti: “Tuziŵalini.” Nayesoti eŵauja kuti: “Nanesoti nikuujenilini enipasa ulamulilo wanuchitila vamene ivi.
28 Kansi muganiza tyani? Munthu muyakine enze na ŵana aŵili. Ndipo eluta kuli mwana woyamba nomuuja kuti, ‘Mwana wangu, lelo ulute kuyakata ntchito m’munda wa mpesa.’
29 Yove eyankha kuti, ‘Nilutelini,’ koma pavuli pake echinja nzelu noluta.
30 Tetyo eluta kuli mwana wachiŵili nomuujasoti chimozi-mozi. Yove eyankha kuti, ‘Nilute atata,’ koma aliye lute.
31 Ni ŵani mwa ŵana aŵili amene aŵa echita venzefuna atata ŵake?” Ove eyankha kuti: “Woyamba.” Yesu eŵauja kuti: “Shuwa nukuujani kuti osonkhesha nsonkho komasoti mahule okusiyani m’vuli na kuyaloŵa mu Ufumu wa Mulungu.
32 Chifukwa Yohani ewela kuli mwewo kuzakuphunzisani njila ya chilungamo, koma mwewo muliye mukhulupilile. Koma osonkhesha nsonkho na mahule emukhulupilila. Olo kuti mwewo mwiwona vamene ivi, muliye chinje maganizo ŵanu noyamba kumukhulupilila.
33 Mvwishilani fanizo iyakine: Penze munthu muyakine wamene elima munda wa mpesa nomanga mpanda kuzenguluka munda wamene uyo. Komasoti ekumba chisengu chokandilamo mphesa nomanga nsanja. Pechichita tetyo eusiya m’manja mwa alimi noluta ku chalo chiyakine.
34 Nthawe ya vitwazi peifwika, etumija antchito ŵake kuli alimi amene awo kuti akatole vitwazi vake.
35 Koma alimi amene awo ekata antchito ŵake ŵala ndipo m’mozi emuniyata, muyakine emupaya, muyakine emutema na myala.
36 Etumijasoti antchito ayakine anyinji kupambana ŵala oyamba, koma amene awo eŵachitasoti chimozi-mozi.
37 Posilijila pake eŵatumijila mwana wake, nonena kuti, ‘Mwana wangu uyu yeka akamulemekeze.’
38 Alimi amene awo pechiwona mwana wamene uyo eyamba kukambilana kuti, ‘Yaa! Uyu niye akuti azalondele chuma. Welani, tiyeni timupaye notola chuma chake chamene icho!’
39 Tetyo emukata nomufumya m’munda wa mpesa wamene uyo ndipo emupaya.
40 Lomba kansi munecho wa munda wala wa mpesa akazawela, azachite nawo tyani alimi amene awo?”
41 Ove eyankha kuti: “Chifukwa chakuti naipa, azaŵawononge koyofwa ndipo munda wa mpesa wamene uyo azaupeleke kuli alimi ayakine, amene angamupase vitwazi pa nthawe yake.”
42 Tetyo Yesu eŵauja kuti: “Pala Malemba onena kuti, ‘Mwala wechikana omanga ng’anda wankhala mwala wa pakona wofunika ngako.* Wamene uyu wafumila kwa Yehova ndipo ni wodabwisa m’menso mwasu. Kansi muliye ŵelenge vamene ivi’?
43 Ni chifukwa chake nukuujani kuti, Ufumu wa Mulungu uzachosewe kuli mwewo nopelekewa ku ntundu wotwala vitwazi.
44 Komasoti munthu akuti azaponele pa mwala wamene uyu azafwaike. Ndipo aliyense akuti azaponelewe na mwala wamene uyo, azasasanthike.”
45 Ansembe akulu-akulu na Afalisi pechimvwa mafanizo ŵake amene aŵa, eziŵa kuti onena za ove.
46 Koma olo kuti enzefuna kumukata,* enzeyopa gulu ya ŵanthu chifukwa ŵanthu amene awo enzekhulupilila kuti yove ni mneneli.
Malizu a m'nyansi
^ Mawu akuti “mwana mwanakazi wa Ziyoni” ni mawu a ndakatulo ndipo kanyinji-kanyinji onena za tauni ya Yelusalemu olo ŵanthu amene enzenkhala mu tauni yamene iyo.
^ Mu Chigiliki, “mutu wa kona.”
^ Olo kuti, “kumumanga.”
