Wilembewa na Mateyo 22:1-46
22 Yesu eŵaujasoti mafanizo ayakine kuti:
2 “Ufumu wakululu tingaulinganije na mfumu yamene ikonzela mwana wake mwanalume phwando ya ukwati.
3 Ndipo ituma antchito ŵake kuti akaite ŵanthu eitiwa kuphwando ya ukwati, koma ŵanthu amene awo aliyefune kuwela.
4 Pavuli pake etumasoti antchito ayakine kuti, nkhoyani mukauje eitiwa amene awo kuti: “Newo nakonza chakulya cha nzuŵa, ng’ombe zangu zinalume komasoti nyama zangu zoina zapaiwa kale, ndipo vinthu vonse vakonzewa kale. Welani kuphwando ya ukwati.”’
5 Koma ŵanthu amene awo enyalanyaza nofumapo. Muyakine eluta kumunda wake ndipo muyakine eluta kumalonda ŵake.
6 Koma ayakine ekata antchito amene awo ndipo eŵachitila vinthu viipa noŵapaya.
7 Pevichitika tetyo, mfumu yala ikalipa ngako ndipo itumija masodja ŵake kuyapaya ŵanthu amene epaya antchito ŵake amene awo noshoka tauni yawo.
8 Pavuli pake euja antchito ŵake kuti, ‘Phwando ya ukwati yakonzewa lomba, koma ŵala eitiwa enze osayenelela.
9 Tetyo nkhoyani m’misewu yufuma mu tauni ndipo aliyense wamukuti mukafwane mukamuite kuti awele kuphwando ya ukwati yamene iyi.’
10 Tetyo antchito amene awo eluta m’misewu ndipo eunganija onse ŵechifwana aipa naweme kumo. Ndipo chipinda cholyelamo phwando ya ukwati chizula na ŵanthu amene enzekulya chakulya.
11 Mfumu yala peiloŵa kuyayendela alwendo amene awo, iwona munthu muyakine mwamene umo wamene enzeve vwale chovwala cha ukwati.
12 Tetyo imukonsha kuti, ‘Shamwali! Waloŵa tyani muno uliyevwale chovwala cha ukwati?’ Yove esoŵa cholaŵila.
13 Pavuli pake mfumu yamene iyo iuja atumiki ŵake kuti, ‘Mumangeni manja na mendo ndipo mumuponye kunja ku mfinzi. Kwamene uko azalile nokukuta menu.’
14 Chifukwa eitiwa nanyinji, koma osankhiwa ni oŵelengeka.”
15 Pavuli pake Afalisi efuma nakuyapangana kuti amupezele vifukwa pa vinthu vangalaŵile.
16 Tetyo emutumijila ophunzila ŵawo, pamozi na ŵanthu enzekonkhelela Helode, ndipo ove enena kuti: Mphunzisi, tuziŵa kuti mwewo mulaŵila vachendi ndipo muphunzisa njila ya Mulungu mu njila ya chendi, ndipo muchitalini vinthu pongofuna tyala kukondwelesha munthu, chifukwa muloleshalini mawonekedwe a ŵanthu.
17 Lomba tiujeni, muganiza tyani? Kansi n’vololeka kupeleka nsonkho kwa Kaisala olo yayi?”
18 Koma Yesu eziŵa kuipa ntima kwawo ndipo enena kuti: “Mwewo ŵanthu achinyengo! Ndaŵa yanji muniyesa?
19 Niwonesheni ndalama ya nsonkho.” Ove emuletela ndalama imozi ya dinali.
20 Lomba eŵakonsha kuti: “Kansi chinso ichi na mawu ŵake aŵa ni vaŵani?”
21 Ove eyankha kuti: “Ni va Kaisala.” Tetyo yove eŵauja kuti: “Lomba pelekani vinthu va Kaisala kwa Kaisala, koma va Mulungu kwa Mulungu.”
22 Pechimvwa vamene ivi edabwa ndipo efumapo nomusiya.
23 Pa nsiku yamene iyo Asaduki amene onena kuti akufwa azaushiwelini, ewela nomukonsha kuti:
24 “Mphunzisi, Mose enena kuti: ‘Keno mwanalume wamwalila akaliye vyala ŵana, nkwake ofunika kulungula mwanakazi wamasiye wamene uyo nomuvyalila ŵana wala nkwake.’
25 Lomba penze analume 7 pa ukwawo. Woyamba elungula, pavuli pake nomwalila. Koma pakuti enzeve mwana, mwanakazi wamene uyo elunguliwa na nkwake wa wala mulume wake.
26 Vichitika chimozi-mozi kuli wachiŵili na wachitatu, mpaka kuli onse ŵala 7.
27 Posilijila pake mwanakazi wala emwalilasoti.
28 Kansi pamene apa, akufwa akazaushiwa mwanakazi wamene uyu azankhale wa ŵani? Pakuti onse 7 emulungula.”
29 Koma Yesu eŵayankha kuti: “Muphoniyesha chifukwa muziŵalini Malemba olo mphamvu ya Mulungu.
30 Chifukwa akufwa akazaushiwa analume azalungulelini ndipo anakazi azalunguliwelini, koma azankhale monga nangelo akululu.
31 Ponena za kuuka kwa akufwa, kansi muliyeŵelenge vechinena Mulungu kuli mwewo kuti:
32 ‘Newo nine Mulungu wa Abulahamu, Mulungu wa Isaki na Mulungu wa Yakobo’? Yove ni Mulungu wa ŵanthu amoyo, osati akufwa.”
33 Gulu yamene iyo ya ŵanthu peichimvwa vamene ivo, idabwa na venzephunzisa.
34 Afalisi pechimvwa kuti Yesu eŵasoŵesha cholaŵila Asaduki, eungana monga gulu imozi.
35 Ndipo m’mozi wa ove wamene enzeziŵa Chilamulo, emuyesa pomukonsha kuti:
36 “Mphunzisi, kansi lamulo ikulu ngako m’Chilamulo ni yotyani?”
37 Yove emuyankha kuti: “Mukokonda Yehova Mulungu wanu na ntima wanu wonse, moyo wanu wonse na maganizo ŵanu onse.’
38 Yamene iyi ni lamulo ikulu ngako komasoti yoyamba.
39 Yachiŵili yolingana nayo ni iyi: ‘Ukokonda muyako monga ni mwaulikondela weka.’
40 Chilamulo chonse chankhala pa malamulo aŵili amene aŵa, kupamikijaposoti vechilemba aneneli.”
41 Lomba ŵala Afalisi pechiungana pamozi, Yesu eŵakonsha kuti:
42 “Muganiza tyani za Khilisitu? Kansi ni mwana wa ŵani?” Ove eyankha kuti ni mwana wa Davite.”
43 Yove eŵakonsha soti kuti: “Lomba ndaŵa yanji moujiliwa na mzimu, Davite emuita kuti Ambuye, pechinena kuti,
44 Yehova euja Ambuye ŵangu kuti: “Nkhala ku kwanja yangu ngayo mpaka nizaike adani ŵako pansi pa mendo ŵako”’?
45 Lomba keno Davite emuita kuti Ambuye, vukwanishika tyani kuti ankhale mwana wake?”
46 Penzeve olo m’mozi ekwanisha kumuyankha, ndipo kufumila nsiku yamene iyo paliye wamene etang’asoti ntima kumukonsha makonsho.