Wilembewa na Mateyo 23:1-39
23 Pavuli pake Yesu euja gulu ya ŵanthu na ophunzila ŵake kuti:
2 “Alembi na Afalisi alinkhazika pampando wa Mose.
3 Tetyo mukochita nokonkheja vinthu vonse vangakuujeni, koma osati mukochita vakuchita ove, chifukwa ove ongolaŵila koma ochitalini vamene ivo.
4 Ove omanga vimitolo volema notwika ŵanthu papewa, koma ove anecho ofunalini kufutusha ntolo wamene uyo na chikumo chawo.
5 Vonse vakuchita, ovichita kuti ŵanthu aŵawone. Ove okulisha tuvyola tunkhala na malemba twakuvwala monga tolitetezela, ndipo otalimphishasoti usalu wopyata wa m’mbali mwa vovwala vawo.
6 Okonda malo olemekezeka ngako pachakulya cha nchingulo na mipando ya kusogolo* m’malo opemphelela.
7 Okondasoti kupasiwa moni m’mamaketi komasoti kuti ŵanthu akoŵaita kuti Labi.*
8 Koma mwewo osati mukoitiwa kuti Labi, chifukwa Mphunzisi wanu ni m’mozi tyala, ndipo monse nimwe abale.
9 Komasoti osati mukoita aliyense kuti atata ŵanu pano pa chalo, chifukwa Atata ŵanu namozi Tyala, amene onkhala kululu.
10 Osati mukoitiwasoti kuti asogoleli, chifukwa Nsogoleli wanu ni m’mozi, Khilisitu.
11 Koma nkulu ngako pakati panu ankhale ntumiki wanu.
12 Aliyense wamene olikweja azaselushiwe, koma aliyense wamene olichefya azakwejewe.
13 Soka kuli mwewo alembi na Afalisi, mwewo ŵanthu achinyengo! Chifukwa muvala Ufumu wakululu kuti ŵanthu osati aloŵemo. Pakuti mwewo muloŵamolini, mulesha ŵala ofuna kuloŵamo kuti osati aloŵemo.
14 ——
15 Soka kuli mwewo alembi na Afalisi, mwewo ŵanthu achinyengo! chifukwa mutauka nyanja komasoti kuyenda misenga itali-itali kuti mukachinje munthu m’mozi. Koma akachinja mumuchitisha kuti ankhale woyenelela kuponyewa mu Gehena* kupambana mwewo.
16 Soka kuli mwewo asogoleli musalola, amene munena kuti keno munthu watomola kachisi polambila, paliye vuto, koma keno munthu watomola golide wamukachisi, ofunikila kukwanilisha lumbilo yake.
17 Ŵanthu opusa komasoti musalola mwewo! Chofunika ngako ni chinji, golide olo kachisi wamene watuŵisha golide wamene uyo?
18 Komasoti munena kuti, ‘Keno munthu watomola guwa ya nsembe polapa, paliye vuto, koma keno munthu watomola mphaso ili pa guwa pamene apo polapa, akwanilishe lumbilo yake.’
19 Mwewo ŵanthu musalola! Chofunika ngako ni chinji, mphaso olo guwa ya nsembe yamene yutuŵisha mphaso yamene iyo?
20 Tetyo wamene watomola guwa ya nsembe polapa, walapila guwa yamene iyo na vinthu vonse vili pamene apo,
21 ndipo watomola kachisi polapa, walapila kachisi wamene uyo komasoti Mulungu wamene onkhala mwamene umo.
22 Ndipo aliyense watomola kululu polapa, walapila mpando wachifumu wa Mulungu komasoti Mulungu onkhala pa mpando wamene uyo.
23 Soka kuli mwewo alembi na Afalisi, mwewo ŵanthu achinyengo! Chifukwa mupeleka cha gawo 10 cha tumbewu twa minti, dilili* na chitoŵe, koma munyalanyaza vinthu vofunika va m’Chilamulo, vamene ni chilungamo, chifundo, na kukhulupilika. N’chendi kuti kupeleka vinthu vamene ivi n’kofunika, koma osanyalanyaza vinthu viyakine vamene ivo.
24 Mwewo asogoleli musalola, amene musefa vakumwa vanu kuti muchosemo kanyelele koma mumelela ngamila.
25 Soka kuli mwewo alembi na Afalisi, mwewo ŵanthu achinyengo! Chifukwa muli monga ni kapu na mbale zasukiwa kunja kweka koma nkati mwake ni mufipa. Nkati mwa mitima yanu mwazula dyela* na kusalilesha.
26 Wewo Mfalisi usalola, tuŵisha nkati mwa kapu na mbale poyamba, kuti kunja kwakesoti kunkhale kutuŵa.
27 Soka kuli mwewo alembi na Afalisi, mwewo ŵanthu achinyengo! Chifukwa mulingana na manda openta na penti, amene kunja kwake owoneka aweme, koma nkati mwake muli vifupa va ŵanthu akufwa na vonyansa va mitundu yonse.
28 Molingana na vamene ivi, pamenso pa ŵanthu namwesoti muwoneka monga olungama koma nkati mwanu mwazula chinyengo na kusamvwila malamulo.
29 Soka kuli mwewo alembi na Afalisi, mwewo ŵanthu achinyengo! Chifukwa mumanga manda* ŵa aneneli nowamililisha manda a ŵanthu olungama,
30 ndipo munena kuti, ‘Kuti tinkhalako m’masiku a makolo ŵasu, sewo sembe tiliye khuziwe na mulandu wawo wocheka milopa ya aneneli.’
31 Tetyo mulichitila mweka umboni kuti nimwe ŵana a ŵanthu amene epaya aneneli.
32 Lomba silijani ntchito yechiyamba makolo ŵanu.
33 Mwewo njoka, ŵana achipili, muzathaŵe tyani chiweluzo cha Gehena?*
34 Pa chifukwa chamene ichi, nukutumijilani aneneli, ŵanthu anzelu na aphunzisi. Ayakine mwa ove muzaŵapaye noŵapanyika pachimuti ndipo ayakine muzaŵakwapule m’malo ŵanu opemphelela noŵatamanisha mu tauni na tauni,
35 kuti milopa yonse ya ŵanthu olungama ichekewa pano pa chalo iwele kuli mwewo. Kuyambila milopa ya Abele wolungama mpaka milopa ya Zakaliya mwana wa Balakiya, wemwipaya mwewo pa ng’anda yopatulika na guwa ya nsembe.
36 Shuwa nukuujani kuti, m’badwo uyu uzayankhe mulandu wa vinthu vonse vamene ivi.
37 Yelusalemu, Yelusalemu, wewo wopaya aneneli na wotema na myala ŵanthu otumijiwa kuli wewo. Moweleja-weleja nenzefuna kuunganija ŵana ŵako pamozi, monga ni mwayuchitila nkhuku kuunganija ŵana ŵaine m’mapapiko. Koma mwewo mwa ŵanthu muliye fune vamene ivo.
38 Lomba mvwani! Mulungu wafuma nokusiilani ng’anda yanu yamene iyi.*
39 Shuwa nukuujani, kuyambila pali pano muzaniwonelinisoti mpaka pati muzanene kuti, ‘Wodalisiwa ni wamene owela mu zina ya Yehova!’”
Malizu a m'nyansi
^ Olo kuti, “mipando iweme ngako.”
^ Olo kuti, “Mphunzisi.”
^ Onani matanthauzo a mawu ayakine.
^ Minti na dilili, ni tumbewu tutontho-tutontho tukomolewa mudimba twakukatishila ntchito ŵanthu kuti chakulya chiwame.
^ Olo kuti, “kulonda vinthu va anecho.”
^ Olo kuti, “manda achikumbukilo.”
^ Onani matanthauzo a mawu ayakine.
^ Mabaibolo ayakine onena kuti, “nokusiilani ng’anda yanu yamene iyi ili matongwe.”
