Wilembewa na Mateyo 26:1-75
-
Ansembe opangana kuti apaye Yesu (1-5)
-
Yesu otiliwa mafuta onukhila (6-13)
-
Pasika wosilijila na kupelekewa kwake (14-25)
-
Kuyambishiwa kwa mwambo wa chakulya cha nchingulo cha Ambuye (26-30)
-
Kukana Yesu kwa Petulo kwenenelewatu (31-35)
-
Yesu opemphela ku Gesemani (36-46)
-
Kumangiwa kwa Yesu (47-56)
-
Kutongewa mulandu pa menso pa Khoti Ikulu ya Ayuda (57-68)
-
Petulo okana Yesu (69-75)
26 Yesu pechisilija kulaŵila vinthu vonse vamene ivi, euja ophunzila ŵake kuti:
2 “Mwewo muziŵa kuti Pasika ichitike pakangopita tyala masiku aŵili ndipo Mwana wa munthu apelekewe kuti akapanyikiwe.”
3 Pa nthawe yamene iyi, ansembe akulu-akulu komasoti akulu eungana m’bwalo ya pang’anda ya nkulu wa ansembe zina yake Kayafa.
4 Ove epangana zakuti akate* Yesu mochenjela nomupaya.
5 Koma enzenena kuti: “Osati tizamukate pa chikondwelelo kuyopela kuti ŵanthu angazachita nsokonezo.”
6 Pa nthawe yenze ku Betaniya Yesu m’ng’anda mwa Simoni wamankhutu,
7 kwiwela mwanakazi muyakine enzenyamule botolo yopangiwa na mwala wa alabasitala, muli mafuta onunkhila odula ndipo eyamba kutila mafuta amene awo m’mutu mwa Yesu penzekulya pathebo.
8 Ophunzila ŵake pechiwona vamene ivi ekalipa nonena kuti: “Owonongelanji mafuta amene aŵa?
9 Mafuta amene aŵa sembe agulisiwa ndalama zinyinji ndipo ndalama zamene izo sembe zapelekewa kuli ŵanthu osauka.”
10 Yesu eziŵa vamene ivi ndipo eŵauja kuti: Ndaŵa yanji mumuvutisha mwanakazi wamene uyu? Yove wanichitila vinthu viweme.
11 Osauka amene awo muli nawo nthawe zonse, koma newo muŵelini nane nthawe zonse.
12 Vawachita mwanakazi wamene uyu potila mafuta onunkhila amene aŵa pamuŵili wangu, wavichita pokonzekela kuikiwa kwangu m’manda.
13 Kulikonse kwaukuti ukalalikiliwe uthenga uweme, pa chalo chonse ŵanthu akonena vawachita mwanakazi wamene uyu kuti akomukumbukila.”
14 Pavuli pake m’mozi wa ophunzila 12 ŵala, wamene enzeziŵika kuti Yudasi Sikaliyoti, eluta kuli ansembe akulu-akulu
15 noŵakonsha kuti: Kansi muzanipase chinji nikamupeleka kuli mwewo? Ove emulonjeza ndalama 30 za nsimbi.
16 Tetyo kufumila nthawe yamene iyo eyeja-yeja kusakila mpata uweme kuti amupeleke.
17 Pa nsiku yoyamba ya chikondwelelo cha Mikate iliye Vofufumisha, ophunzila ewela kuli Yesu nomukonsha kuti: “Kansi mufuna tikakukonzeleni kuni malo olyelako pasika?”
18 Yove enena kuti: “Nkhoyani mu tauni kwa munthu wakuti-wakuti ndipo mukamuuje kuti, ‘Mphunzisi wanena kuti: “Nthawe yangu yoikiliwatu yavwendela. Nizachite phwando ya Pasika pamozi na ophunzila ŵangu ku ng’anda kwako.”’”
19 Tetyo ophunzila amene awo echita chendi mokatijana na mwechiŵaujila Yesu ndipo ekonza vinthu vonse vofunikila pa Pasika.
20 Nthawe ya nchingulo, yove na ophunzila ŵake 12 ŵala enkhala pa thebo noyamba kulya.
21 Akulya chakulya chamene icho yove enena kuti: Shuwa nukuujani, m’mozi wa mwewo anipeleke.”
22 Chifukwa cha kumvwa chisoni ngako na vamene ivi, aliyense eyamba kumukonsha kuti: “Ambuye, kansi ni newo payakine?”
23 Yove eyankha kuti: “Wanutoŵela naye pamozi m’mbale umu niye akuti anipeleke.
24 N’chendi Mwana wa munthu afumepo, mokatijana na vakunena Malemba ponena za yove. Koma soka kuli munthu opeleka Mwana wa munthu! Sembe vili luweme kuti munthu wamene uyu aliye vyalike.”
25 Yudasi wamene enze esala patontho kumupeleka eyankha kuti: “Kuti ningankhale newo Labi?” Yesu emuyankha kuti walaŵila weka.”
26 Penzepitilija kulya, Yesu etola nkate ndipo pechipemphela kwa Mulungu, eusuna-suna noupeleka kuli ophunzila ŵake. Yove enena kuti: “Ani lyani. Nkate uyu upanamila muŵili wangu.”
27 Pavuli pake etola kapu ya vinyu ndipo pechipemphela, eipeleka kuli ove nonena kuti: “Mwani monse.
28 Vinyu wamene uyu opanamila ‘milopa yangu ya pangano,’ yamene ikuti izachekewe chifukwa cha ŵanthu anyinji kuti machimo ŵawo akhululukiliwe.
29 Koma nukuujani kuti: Nizamwelinisoti chakumwa chilichonse chofumila ku mphesa monga ni chamene ichi mpaka nsiku yati nizamwe chanyowani pamozi na mwewo mu Ufumu wa Atata ŵangu.”
30 Posilijila pake asilija kuimba nyimbo zotamanda Mulungu,* efuma noluta kulupili ya Maolivi.
31 Pavuli pake Yesu eŵauja kuti: “Monse muniutuke nonisiya neka usiku uno, chifukwa Malemba onena kuti: ‘Nizapaye chiŵeta ndipo mbelele za m’gulu yamene iyo zizamwajikane.’
32 Koma nikazauka kwa akufwa nizatangule kuyafwika ku Galileya mwewo mukaliye fwikako.”
33 Koma Petulo emuyankha kuti: “Olo kuti onse akuutukeni nokusiyani, newo neka ningakuutukenilini!”
34 Yesu emuuja kuti: “Shuwa nukuuja wewo, usiku wamene uno kombwe akaliyelila unikane katatu.”
35 Petulo eyankha kuti: “Keno n’kufwa, newo nifwe namwe pamozi, ndingakukanenilini.” Ophunzila ayakine onse enenasoti chimozi-mozi.
36 Pavuli pake Yesu efwika nawo pamalo oitiwa kuti Gesemani, ndipo euja ophunzila amene awo kuti: “Nkhalani pansi pamene pano, newo nikuya uko kuyapemphela.”
37 Poluta kwamene uko etola Petulo na ŵana aŵili a Zebedayo. Ndipo eyamba kumvwa chisoni komasoti kuvutika ngako muntima mwake.
38 Pavuli pake eŵauja kuti: “Newo nikumvwa chisoni chakufwa nacho. Nkhalani pamene pano ndipo munkhale mphela tuni pamozi na newo.”
39 Tetyo pechiluta pasogolo patontho, egwada mpaka chinso chake pansi ndipo epemphela kuti: “Atata, keno n’vokwanishika lolani kuti kapu iyi inipitilile. Koma osati mwa kufuna kwangu, koma mwa kufuna kwanu.”
40 Pechichita tetyo ejokela pala penze ophunzila ŵake ndipo eŵafwana oyona. Tetyo ekonsha Petulo kuti: “N’chendi kuti mungakwanishelini kunkhala mphela tuni pamozi na newo kwa wani awa?
41 Nkhalani tuni ndipo mupitilije kupemphela kuti osati muloŵe m’mayeselo. N’chendi, mzimu ni wofunishisha, koma muŵili ni wofoka.”
42 Efumaposoti kachiŵili noluta kuyapemphela kuti: “Atata, keno vingakwanishikelini kuti kapu iyi inipitilile mpaka nimwe mphela, vamufuna mwewo vichitike.”
43 Ewelasoti noŵafwana oyona, chifukwa vikope vawo venze vilemewa na tulo.
44 Tetyo eŵasiya nolutasoti kuyapemphela kachitatu ndipo ewelejela mawu amene ŵala.
45 Pavuli pake ejokela kuli ophunzila ŵake ŵala noŵauja kuti: “N’chendi nthawe monga ni ino muyona nopumula? Onani! Nthawe yakuti Mwana wa munthu apelekewe m’manja mwa ŵanthu ochimwa yavwendela.
46 Panamani, tiyeni takuya. Onani! Wonipeleka wala ali pafupi.”
47 Akalilaŵila tetyo, Yudasi m’mozi wa ophunzila 12 ŵala, efwika pamozi na gulu ikulu ya ŵanthu kufumila kuli ansembe akulu-akulu na kwa akulu, alinyamule vibemba na vinkholi.
48 Apa n’kuti womupeleka wamene uyu enze eŵapasa chizindikilo chakuti: “Wati nikapase kisi ni wamene uyo, mukamukate.”
49 Pechifwika, Yudasi elungama kwa Yesu nonena kuti: “Muli tyani Labi!” Ndipo emupasa kisi.
50 Koma Yesu emukonsha kuti: “Shamwali, wawela kuzachita tyani kuno?” Nthawe yamene iyo ove evwendela ndipo ekata Yesu nomumanga.
51 Koma m’mozi mwa ŵanthu enze na Yesu esolola chibemba chake nochentchena nacho wantchito wa nkulu wa ansembe mpaka notendelatu kwatu yake.
52 Lomba Yesu emuuja kuti: Joshela chibemba chako pamalo ŵake, chifukwa onse okata chibemba azafwe na chibemba.
53 Olo uganiza kuti ningaleke senga Atata ŵangu kuti anitumijile magulu ankhondo opitilila 12 ŵa angelo lomba teti?
54 Koma nikachita vamene ivo, lomba Malemba amene onena kuti vamene ivi vufunika kuchitika azakwanilishiwe tyani?
55 Pa nthawe yamene iyoletu Yesu ekonsha gulu yamene iyo ya ŵanthu kuti: “Ndaŵa yanji mwawela kuzanikata mulinyamule vibemba na vinkholi monga kuti mukuyalimbana na chigaŵenga? Nsiku na nsiku nenzenkhala pansi m’kachisi nophunzisa koma muliye nikate.
56 Koma vonse vamene ivi vachitika kuti vechilemba aneneli vikwanilishiwe.”* Pavuli pake ophunzila ŵake onse emuutuka nomusiya yeka.
57 Ŵanthu ŵala ekata Yesu eluta naye kwa Kayafa nkulu wa ansembe, kwenze eungana alembi na akulu.
58 Koma Petulo epitilija kumukonkhelela ali patali, mpaka echiyafwika m’bwalo ya pang’anda ya nkulu wa ansembe wamene uyo. Pechiloŵa nkati, enkhala pansi pamozi na antchito a m’ng’anda mwamene umo kuti awone vikuti vichitike.
59 Lomba ansembe akulu-akulu na Khoti yonse Ikulu ya Ayuda* enzesakila-sakila umboni wawenye kuti amuyopejele mulandu Yesu na cholinga chakuti amupaye.
60 Koma aliye ufwane olo kuti kwiwela mboni zinyinji zawenye. Papita nthawe, kwiwela mboni ziyakine ziŵili
61 nonena kuti: “Munthu wamene uyu enena kuti, ‘Ningakwanishe kuwisha kachisi wa Mulungu noumangasoti m’masiku atatu.’”
62 Pechimvwa vamene ivo nkulu wa ansembe epanama nomukonsha kuti: “Kansi uyankhelini? Kansi ukumvwalini vamene ivi vakukunena ŵanthu?”
63 Koma Yesu echingonkhala chelele. Tetyo nkulu wa ansembe emuuja kuti: Nukulapisha pali Mulungu wamoyo, utiuje keno niwe chendi Khilisitu, Mwana wa Mulungu!”
64 Yesu emuyankha kuti: “Mwanena mweka. Koma nukuujani kuti: Kufumila lelo mpaka kusogolo muzawone Mwana wa munthu alinkhale ku kwanja ngayo yamphamvu. Muzamuwonesoti owela kufumila pa mikumbi ya kululu.”
65 Pavuli pake nkulu wa ansembe ekezula malaya ŵake akunja nonena kuti: “Wanyoza Mulungu! Lomba tingafunesoti mboni ziyakine pamene apa? Apa mwalimvwila mweka mwakunyozela Mulungu.
66 Lomba mwewo muwona tyani pamene apa?” Ove eyankha kuti: “Ofunikila kufwa mphela.”
67 Tetyo eyamba kumutila mata kumenso komasoti kumukhoma nkhonyo. Ayakine emuniyata mbama
68 nonena kuti: “Lotela tiwone wewo Khilisitu. Wakuniyata niŵani?”
69 Lomba Petulo enzenkhale pansi m’bwalo yamene iyo ndipo msimbi muyakine wantchito ewela kuli yove nonena kuti: “Mwewo namwe mwenze na Yesu wamene uyu wa ku Galileya!”
70 Koma yove ekana pamenso pa onse kuti: “Nuviziŵalini vaulaŵila.”
71 Pechifuma noluta pa kang’anda kapagedi, msimbi muyakinesoti emuziŵa nouja ayakine enze pafupi kuti: “Aŵa amundala enzesoti pamozi na Yesu wamene uyu Mnazaleti.”
72 Apasoti Petulo ekana mochita lapa ndipo enena kuti: “Shuwa munthu wamene uyu newo numuziŵalini yayi!”
73 Papita kanthawe patontho, amene enze paname pafupi ewela nouja Petulo kuti: “Shuwa wewosoti uli m’gulu ya ophunzila ŵake ndipo kalaŵilidwe kako kakukatisha.”
74 Pamene apo yove eyamba kutembelela nolumbila kuti: “Munthu wamene uyu newo numuziŵalini yayi!” Nthawe yamene iyo kombwe elila.
75 Tetyo Petulo ekumbukila ŵala mawu a Yesu akuti: “Kombwe akaliyelila, uzanikane katatu.” Ndipo efuma panja noyamba kulila moŵaŵiwa ntima ngako.
Malizu a m'nyansi
^ Olo kuti, “amange.”
^ Olo kuti, “masalimo.”
^ Olo kuti, “malemba akwanilishiwe.”
^ Mu Chigiliki, “Sanihedilini.”
