Wilembewa na Mateyo 27:1-66
27 Kwacha m’mawa, ansembe akulu-akulu onse pamozi na akulu a ŵanthu ekambilana nokatijana kuti apaye Yesu.
2 Ndipo pechimumanga, eluta naye kuyamupeleka kuli Gavana Pilato.
3 Pavuli pake Yudasi wala emupeleka, pechiwona kuti Yesu waweluziwa kuti apaiwe, evutika ngako mu ntima mwakuti eluta kuyajosha zala ndalama 30 za nsimbi kuli ansembe akulu-akulu komasoti akulu.
4 Yove enena kuti: “Nachimwa popeleka munthu wosaphoniya.”* Ove emuyankha kuti: “Sewo vutikhuzalini vamene ivo. Uziŵe weka chochita.”
5 Tetyo yove eponya ndalama zala zansimbi mu kachisi nofumapo. Pavuli pake eluta kuyalimangilila.
6 Koma ansembe akulu-akulu etola zala ndalama zansimbi nonena kuti: “N’vosaloleka kuti ndalama zamene izi ziikiwe m’malo opatulika osungilamo chuma, chifukwa ni malipilo a milopa.”
7 Pechikambilana, ekatishila ntchito ndalama zamene izo pogulila munda wa woumba nongo kuti unkhale manda ŵa alwendo.
8 Tetyo munda wamene uyu uitiwa kuti munda wa milopa mpaka lelo.
9 Vamene ivi vikwanilisha mawu ŵechinena Mulungu kupitila muli mneneli Yelemiya* kuti: “Ndipo etola ndalama 30 zansimbi, ntengo wogulila munthu, ntengo wechimuikila ayakine mwa ŵana ŵa Isilaeli,
10 ndipo egula munda wa woumba nongo, mokatijana na vechinilamula Yehova.”
11 Lomba Yesu epanama pamenso pa Gavana ndipo Gavana wamene uyo emukonsha kuti: “Kansi niwe Mfumu ya Ayuda?” Yesu eyankha kuti: “Vili tetyo monga ni mwamwanenela.”
12 Koma ansembe akulu-akulu komasoti akulu penzemunena, yove aliye yankhe chilichonse.
13 Lomba Pilato emukonsha kuti: “Kansi ukumvwalini vinthu vinyinji vamene ivi vakukunena?”
14 Koma yove echingonkhala zii, osamuyankha chilichonse, mwakuti Gavana wamene uyo edabwa ngako.
15 Pa chikondwelelo chilichonse, Gavana wamene uyo enzemasulila ŵanthu wadjeli m’mozi wakufuna ŵanthu amene awo.
16 Lomba pa nthawe yamene iyi penze wadjeli muyakine woyofya ngako, zina yake Balaba.
17 Tetyo ŵanthu pechiungana pamozi Pilato enena kuti: “Kansi mufuna kuti nikumasulileni ŵani, Balaba olo Yesu wamunena kuti ni Khilisitu?”
18 Chifukwa Pilato enzeziŵa kuti emupeleka chifukwa cha njilu.
19 Komasoti pechinkhala pa mpando wotongela milandu, mwanakazi wake emutumijila uthenga wakuti: “Nkhani ya munthu wolungama wamene uyu osati ikukhuzeni chifukwa newo navutika ngako lelo na maloto okhuza munthu wamene uyu.”
20 Koma lomba ansembe akulu-akulu pamozi na akulu elimbikisa ŵanthu kusenga kuti aŵamasulile Balaba, koma kuti Yesu apaiwe.
21 Lomba Gavana wamene uyo eŵakonsha kuti: “Kansi pa ŵanthu aŵili amene aŵa mufuna kuti nikumasulileni ŵani?” Ove enena kuti: “Balaba.”
22 Pilato eŵakonshasoti kuti: “Lomba Yesu, wala wamunena kuti ni Khilisitu, nichite naye chinji?” Onse eyankha kuti: “Apanyikiwe wamene uyo!”*
23 Yove enena kuti: “Ndaŵa yanji? Kansi yove waphoniya chinji?” Koma ŵanthu amene awo epitilija kuŵilikija mwa mphamvu kuti: “Apanyikiwe mphela wamene uyo!”
24 Pechiwona kuti vuyavyalini komasoti kuti poyambika nsokonezo, Pilato echingotola manzi nosamba kumanja pamenso pa gulu ya ŵanthu yamene iyo ndipo enena kuti: “Newo niliye mulandu wa milopa ya munthu wamene uyu. Vonse vili kuli mwewo.”
25 Pechilaŵila vamene ivi ŵanthu onse eyankha kuti: “Milopa yake inkhale pali sewo na pa ŵana ŵasu.”
26 Tetyo eŵamasulila Balaba, koma elamula kuti Yesu akwapuliwe pavuli pake emupeleka kuti akamupaye pomupanyika pa chimuti.
27 Lomba masodja a Gavana etola Yesu noloŵa naye m’ng’anda ya Gavana wamene uyo ndipo eunganija gulu yonse ya masodja kuli yove.
28 Kwamene uko emuvula vovwala vake nomuvwalika chinyula chisweta ngako.
29 Komasoti eŵila chisote chachifumu cha minga nomuvwalika kumutu ndipo emupasa tete ku kwanja yake ngayo. Pavuli pake emugwadila noyamba kumunyoza kuti: “Muli tyani, mwewo Mfumu ya Ayuda!”
30 Pechichita tetyo emutila mata ndipo etola yala tete noyamba muniyata nayo m’mutu.
31 Pechisilija kumunyoza kwamene uko, emuvula chinyula chala nomuvwalika malaya ŵake akunja ndipo eluta naye kuti akamukhomelele pa chimuti.
32 Penze munjila, ekumana na munthu muyakine wa ku Kulene, zina yake Simoni. Ove ekakamija munthu wamene uyu kuti atwike chimuti chotamanilapo* cha Yesu.
33 Pechifwika pa malo oitiwa kuti Gologota, kutanthauza kuti, Malo a Chibade,
34 epasa Yesu vinyu woyavija na vinthu vuŵaŵa va manzi-manzi kuti amwe, koma yove pechilaula, ekana kumwa.
35 Pechimukhomelela pa chimuti, eyaŵana malaya ŵake akunja pochita madjiki
36 ndipo enkhala pansi nomulolela.
37 Komasoti palulu pa mutu wake ekhomapo chikwangwani chowonesha mulandu wechimupaila kuti: “Uyu ni Yesu, Mfumu ya Ayuda.”
38 Lomba vigaŵenga viŵili evipanyika pamozi na yove. Chimozi echipanyika ku kwanja yake ngayo ndipo chiyakine kumanjele.
39 Ŵanthu enzepita pafupi enzenena mawu onyoza Yesu ndipo enzezunguja mitu yawo
40 nonena kuti: “Wewo wamene wenzenena kuti ungakwanishe kuwisha kachisi nomumanga m’masiku atatu, lipulumushe! Keno niwe chendi Mwana wa Mulungu, seluka pa chimuti chotamanilapo* chamene icho!”
41 Chimozi-mozisoti ansembe akulu-akulu pamozi na alembi komasoti akulu. Nawosoti eyamba kumunyoza nonena kuti:
42 “Ayakine ekwanisha kuŵapulumusha, koma kuti alipulumushe yeka okangiwa! Keno ni Mfumu chendi ya Isilaeli, tiyeni tiwone keno aseluke pa chimuti chotamanilapo* chamene icho ndipo sewo timukhulupilile.
43 Pala yove okhulupilila Mulungu, lomba Mulungu wamene uyo amupulumushe keno omufuna chendi chifukwa yove enzenena kuti, ‘Newo nine Mwana wa Mulungu.’”
44 Vigaŵenga vechipanyikiwa navo soti pamozi venzemunyoza.
45 Kufumila cha m’ma 12 koloko nzuŵa* kwichita mfinzi chalo chonse, mpaka 3 koloko ya nzuŵa.*
46 Cha m’ma 3 koloko mwamene umo, Yesu eŵilikija mwamphamvu kuti: “Eʹli, Eʹli, laʹma sa·bach·thaʹni?” kutanthauza kuti, ‘Mulungu wangu, Mulungu wangu, mwanisiilanji newo?”
47 Ayakine mwa ŵanthu amene enze paname pamene apo pechimvwa vamene ivi eyamba kunena kuti: “Munthu wamene uyu oita Eliya.”
48 Nthawe yamene iyo m’mozi wa ove eutuka kuyatola chinkhupule nochivwivwika mu vinyu wowawasha ndipo eika ku tete nomupasa kuti amwe.
49 Koma ayakine enena kuti: “Mulekeni! Tiwone keno Eliya angawele kuzamupulumusha.”
50 Tetyo Yesu eŵilikijasoti mokweja mawu, pavuli pake esilijika.
51 Nthawe yamene iyo nyula yochingilija ya m’ng’anda yopatulika ikezuka pakati kufumila palulu mpaka pansi. Chalo chinyang’anyika ndipo myala ifwaika.
52 Manda* evunukuka ndipo vitanda vinyinji va ŵanthu atuŵa amene eikiwa mwanene umo viponyewa kunja,
53 ndipo ŵanthu anyinji ekwanisha kuviwona. (Pavuli pa kuushiwa kwa Yesu, ŵanthu amene enzefumila kumanda kwamene uko eloŵa mu tauni ituŵa.)
54 Koma nkulu wa masodja na ayakine ŵenze nawo polindilila Yesu pechiwona chivomezi chamene icho na vamene ivo vichitika, echita wowa ngako ndipo enena kuti: “Shuwa uyu enze chendi Mwana wa Mulungu.”
55 Komasoti anakazi anyinji ofumila ku Galileya amene enzekonkhelela Yesu kuti akomutumikila, enze kwamene uko ndipo enzelolela ali patali.
56 Ayakine a ove enze Maliya wa ku Magadala, Maliya amayi ŵake a Yakobo na Yose, komasoti penze amayi ŵake a Yakobo na Yohani.*
57 Lomba ku nchingulo ngako, kwiwela munthu muyakine wolemela wa ku Alimateya, zina yake Yosefe wamene soti enkhala wophunzila wa Yesu.
58 Yove eluta kwa Pilato kuyasenga muŵili wa Yesu ndipo Pilato elamula kuti amupase muŵili wamene uyo.
59 Yosefe etola muŵili wamene uyo nouvunga panyula ituŵa iweme ngako,
60 ndipo echiyauika m’manda* ŵake anyowani ŵechichompha pa mwala. Pavuli pake egugulusha chimwala chikulu novala pa muliyango wa manda* amene awo, nofumapo.
61 Koma Maliya wa ku Magadala na Maliya muyakine esalilila kwamene uko, ndipo enkhala pansi pafupi na manda amene awo.
62 Nsiku yokonkhapo, pavuli pa Nsiku Yokonzekela,* ansembe akulu-akulu na Afalisi eungana pamenso pa Pilato,
63 nonena kuti: “Bwana, sewo takumbukila kuti munthu wala wachinyengo akali moyo enena kuti, ‘Pakazapita masiku atatu nizaushiwe.’
64 Tetyo lamulani kuti aike chitetezo champhamvu pa manda amene awo mpaka nsiku yachitatu, kuti ophunzila ŵake osati awele nomuiŵa nouja ŵanthu kuti, ‘Eushiwa kwa akufwa!’ Chifukwa chinyengo chamene ichi chosilijila chizankhale chiipa ngako kupambana chala choyamba.”
65 Pilato eŵayankha kuti: “Tolani aŵa masodja olindilila. Nkhoyani mukaike chitetezo champhamvu monga ni mwamuziŵila.”
66 Tetyo eluta kuyaika chitetezo champhamvu pa manda amene awo novala ngako manda amene awo na chimwala noikapo masodja olindilila.
Malizu a m'nyansi
^ Mu Chigiliki, “milopa yosaphoniya.”
^ Mawu amene aŵa ngako-ngako ni apa Zekaliya 11:12, 13. Mu nthawe ya Mateyo, buku ya Yelemiya yenze yoyambilila mumpukutu wa mabuku ŵa aneneli. Tetyo payakine mabuku onse ŵa aneneli, kupamikijapo ya Zekaliya, enzeziŵika kuti Yelemiya. Yelekezani na Luka 24:44.
^ Olo kuti, “Apaiwe pomukhomelela pachimuti.”
^ Onani matanthauzo a mawu ayakine.
^ Onani matanthauzo a mawu ayakine.
^ Onani matanthauzo a mawu ayakine.
^ Mu Chigiliki, “awa ya 6,” kuŵelenga kufumila m’ma 6 koloko m’mawa.
^ Mu Chigiliki, “awa ya 9,” kuŵelenga kufumila m’ma 6 koloko m’mawa.
^ Olo kuti, “Manda achikumbukilo.”
^ Mu Chigiliki, “amayi ŵawo ŵa ŵana a Zebedayo.”
^ Olo kuti, “m’manda achikumbukilo.”
^ Olo kuti, “manda achikumbukilo.”
^ Onani matanthauzo a mawu ayakine.
