Wilembewa na Mateyo 28:1-20
28 Nsiku ya Sondo peisila, m’matemwakucha mwa nsiku yoyamba ya sondo yamene iyo, Maliya wa ku Magadala na wala Maliya muyakine ewela kuzawona manda.
2 Pechifwika pafupi, eziŵa kuti pachitika chivomezi champhamvu, chifukwa mngelo wa Yehova eseluka kululu ndipo efwika nogugulusha chala chimwala, nonkhala pa chimwala pamene apo.
3 Mngelo wamene uyo enzewoneka monga ni kaleza ndipo vovwala vake venze vituŵa ngako.
4 Akamalonda ŵala echita wowa na mngelo wamene uyo ndipo enjenjemela noyuma gwaa monga afwa.
5 Koma mngelo wamene uyo euja anakazi amene awo kuti: “Mwewo osachita wowa, chifukwa nuziŵa kuti mufuna Yesu wamene epaiwa mwa kupanyikiwa pa chimuti.
6 Muno muliye chifukwa waushiwa mokatijana na vechilaŵila. Welani muwone penzeyone.
7 Ndipo nkhoyani kamangu-kamangu mukauje ophunzila ŵake kuti waushiwa kwa akufwa, mwakuti pano patunena watangula kale kuluta ku Galileya. Kwamene uko mukamuwone. Wamene uyu ni uthenga wangu kuli mwewo.”
8 Tetyo ove efumapo kamangu-kamangu pa manda pamene apo ali na wowa komasoti chisangalalo chikulu ndipo eutuka kuyauja ophunzila ŵake.
9 Mwazizizi Yesu ekumana nawo nonena kuti: “Muli tyani azimayi!” Pavuli pake ove efwika pafupi nokata vipazi vake ndipo emuŵelamila mpaka vinso vawo pansi.
10 Pavuli pake Yesu eŵauja kuti: “Osayopa! Nkhoyani mukauje abale ŵangu kuti alute ku Galileya ndipo akaniwone kwamene uko.”
11 Ove penzekuya, ayakine mwa akamalonda eluta mu tauni ndipo echiyauja ansembe akulu-akulu vonse vamene ivo vichitika.
12 Ansembe akulu-akulu amene awo pechikumana na akulu nokambilana, ekatijana vochita ndipo etwala ndalama zinyinji zansimbi kuli masodja amene awo
13 noŵauja kuti: “Mukonena kuti, ‘Ophunzila ŵake ewela usiku kuzamuiŵa sewo petenze yone.’
14 Keno Gavana angamvwe vamene ivi, timufotokozele nkhani yonse* ndipo mwewo mufunikilalini kudela nkhaŵa.”
15 Tetyo etola ndalama zansimbi zamene izo nochita mokatijana na vechiŵauja ndipo nkhani yamene iyi ni yomvwikila ngako pakati pa Ayuda mpaka lelo.
16 Koma ophunzila ŵala 11 eluta ku Galileya, kulupili kwechiŵauja Yesu kuti akakumane nawo.
17 Pechimuwona emugwadila, koma ayakine ekaikila keno enze chendi yove.
18 Lomba Yesu evwendela kuli ove noŵauja kuti: “Ulamulilo wonse wapelekewa kuli newo kululu na pa chalo.
19 Tetyo nkhoyani mukaphunzise ŵanthu a mitundu yonse kuti ankhale ophunzila ŵangu. Mukoŵabatiza mu zina ya Atata, ya Mwana na ya mzimu utuŵa,
20 ndipo mukoŵaphunzisa kuti akosunga vinthu vonse venikulamulani. Ndipo ziŵani kuti newo nili pamozi na mwewo masiku onse mpaka mu nyengo ya mapeto a nthawe* ino.”