Wilembewa na Mateyo 3:1-17
3 M’masiku amene awo, Yohani M’batizi eluta m’chipululu* cha Yudeya noyamba kulalikila.
2 Yove enzelalikila kuti: “Lapani chifukwa Ufumu wakululu wavwendela.”
3 Mneneli Yesaya enenelatu za yove m’mawu aŵa: “Munthu muyakine oŵilikija m’chipululu kuti: ‘Konzani njila ya Yehova! Muwamye misewu yake.’”
4 Yohani enzevwala chovwala cha usako wa ngamila na bande wa chikumba muluunda mwake. Chakulya chake chenze mphanzi na uchi.
5 Tetyo ŵanthu enzefumila ku Yelusalemu na mu dela yonse ya Yudeya komasoti enzefumila m’minzi yonse yapafupi na Yolodano enzeluta kuli yove.
6 Enzeŵabatiza* mu m’mana wa Yolodano ndipo ŵanthu amene awo enzeulula machimo ŵawo patuŵa.
7 Yohani pechiwona kuti Afalisi na Asaduki anyinji owela ku ubatizo wamene uyo eŵauja kuti: “Mwewo ŵana anjoka, niŵani wakuchenjejani kuti muthaŵe ukali wamene ukuza?
8 Tetyo muwoneshe vitwazi vuwonesha kulapa.
9 Tetyo osati mukolisempha kuti, ‘Tili na atata ŵasu Abulahamu.’ Chifukwa nukuujani kuti kufumila ku myala iyi Mulungu angakwanishe kupangila ŵana Abulahamu.
10 Katemo kaikiwa kale pa miju yavimiti. Tetyo chimuti chilichonse chisatwala vitwazi viweme chiwishiwe noponyewa pa mulilo.
11 Newo nukubatizani m’manzi chifukwa chakuti mwalapa, koma akuza kuvuli kwangu ali na mphamvu kupambana newo. Ndipo ninelini woyenelela kumuvula nsapato zake.* Wamene uyo azakubatizeni na mzimu utuŵa komasoti mulilo.
12 Chinthu chowuluzila mungu chili m’manja mwake ndipo malo ŵake obulilapo mbewu azaŵatuŵishiletu kuti mbee! Tiligu azauike m’chimphaka, koma mungu azaushoke na mulilo wamene ungazimwikelini.”
13 Pavuli pake Yesu ewela kwa Yohani ku Yolodano kufumila ku Galileya kuti yove amubatize.
14 Koma Yohani eyeja kumulesha polaŵila kuti: “Newo niye nufunikila kubatiziwa na mwewo, lomba ndaŵa yanji muwela kuli newo?”
15 Yesu emuyankha kuti: “Pa nthawe ino yeka vomela kuti vinkhale teti, chifukwa tufunikila kuchita vamene ivi kuti tikwanilishe chilungamo chonse.” Pechinena tetyo, eleka kumulesha.
16 Pechibatiziwa, nthawe yamene iyo Yesu evuuka m’manzi. Pamene apo kululu kwiseguka ndipo Yohani ewona mzimu wa Mulungu useluka monga ni nkhunda na kuzamunkhala.
17 Pemvwikasoti mawu ofumila kululu onena kuti: “Uyu ni Mwana wangu wanukonda ndipo onikondwelesha ngako.”
Malizu a m'nyansi
^ Mawu amene aŵa onena za dela yamene kuli ŵanthu atontho. Onanisoti matanthauzo a mawu ayakine.
^ Olo kuti, “enzeŵavwivwika; enzeŵambija.”
^ Mu Chigiliki, “nshango; masilipa ŵake.”