Wilembewa na Mateyo 4:1-25
4 Pavuli pake mzimu wisogolela Yesu kuchipululu ndipo kwamene uko eyesewa na Mdyelekezi.
2 Pechilekeja kulya kwa masiku 40 usiku na nzuŵa, echimvwa njala.
3 Lomba Mdyelekezi ewela nomuuja kuti: “Keno nimwe mwana wa Mulungu, ujani iyi myala kuti iyaluke mitanda ya nkate.”
4 Koma Yesu eyankha kuti, “Malemba onena kuti ‘munthu angankhale lini na moyo na chakulya cheka koma na mawu aliwonse ofumila nkamwa mwa Yehova.’”
5 Pavuli pake Mdyelekezi emutola noluta naye mu tauni ituŵa, ndipo emukwejeka palulu pa chipupa cha mpanda wa kachisi*
6 nomuuja kuti: “Keno nimwe mwana wa Mulungu, muliponye pansi, pala Malemba onena kuti: ‘Yove azalamule angelo ŵake vokhuza mwewo,’ komasoti onena kuti, ‘Azakunyamuleni m’manja mwawo kuti kwendo yanu osati iniyate ku mwala.’”
7 Koma Yesu emuyankha kuti: “Malemba onenasoti kuti: ‘Yehova Mulungu wanu osamuyesa.’”
8 Pavuli pake Mdyelekezi emutolasoti noluta naye palupili itali ngako ndipo emuwonesha mafumu onse apano pa chalo na ulemelelo wawo.
9 Tetyo emuuja kuti: “Nikupaseni vinthu vonse vamene ivi keno mungagwade pansi kamozi tyala nonilambila.”
10 Koma Yesu emuyankha kuti: “Choka Satana! Chifukwa Malemba onena kuti, ‘Yehova Mulungu wako niye waufunikila kulambila ndipo ufunikila kutumikila yove yeka mphela.’”
11 Pavuli pake Mdyelekezi emusiya ndipo kwiwela angelo noyamba kumutumikila.
12 Lomba Yesu pechimvwa kuti Yohani amuzalilila mu djeli, efumako kwamene uko noluta ku Galileya.
13 Tetyo pavuli pakuti wafuma ku Nazaleti, eluta ku Kapelenawo nofwana malo onkhala m’mbali mwa nyanja m’madela a Zebuloni na Nafitali,
14 kuti mawu ŵechilaŵila Mulungu kupitila muli mneneli Yesaya akwanilishiwe. Yove enena kuti:
15 “Ŵanthu onkhala mu chalo cha Zebuloni na chalo cha Nafitali m’mbali mwa nsewu wakunyanja silya iyakine ya Yolodano, ku Galileya kwamene kwenzenkhala ŵanthu a mitundu iyakine,
16 ŵanthu amene enzenkhala mu mfinzi ewona kungweleŵela kukulu, ndipo ŵanthu amene enzenkhala mu dela ya chimvwilimvwili cha imfwa kungweleŵela kwiŵasanikila.”
17 Kufumila nthawe yamene iyo, Yesu eyamba kulalikila kuti: “Lapani, chifukwa Ufumu wakululu wavwendela.”
18 Penzeyenda m’mbali mwa nyanja ya Galileya,* Yesu ewona analume aŵili pa ukwawo oteya kombe wopayila nsomba mu nyanja. Ove enze ŵanthu okasha nsomba ndipo mazina ŵawo enze Simoni woitiwa kuti Petulo na Andeleya.
19 Yove eŵauja kuti: “Nikonkheni ndipo nikuchitisheni kunkhala okasha ŵanthu.”
20 Nthawe yamene iyo ove esiya akombe ŵawo nomukonkhelela.
21 Pechipitilila pamene apo, ewonasoti analume aŵili pa ukwawo, Yakobo mwana wa Zebedayo na nkwake Yohani ove enze m’bote pamozi na atata ŵawo, a Zebedayo, penzesona akombe ŵawo, ndipo eŵaita.
22 Nthawe yamene iyo esiya yala bote na atata ŵawo nomukonkhelela.
23 Pechichita tetyo, eyenda-yenda mu Galileya monse ndipo enzephunzisa m’malo ŵawo opemphelela, enzelalikila uthenga uweme wa Ufumu komasoti enzepojeka matenda a ntundu uliwonse ŵenzelwala ŵanthu.
24 Tetyo mbili yake ifalikila mu Siliya monse. Ŵanthu emuletela onse ŵala enzelwala matenda osiyana-siyana komasoti ŵala enzekumvwa kuŵaŵiwa mmuŵili, enze na viŵanda, onyukuma, komasoti ŵanthu ozizila vizo ndipo yove eŵapojeka.
25 Tetyo ŵanthu anyinji ofumila ku Galileya, ku Dekapoli,* ku Yelusalemu, ku Yudeya komasoti kusilya iyakine ya Yolodano, emukonkhelela.
Malizu a m'nyansi
^ Olo kuti, “emukwejeka pa malo apalulu ngako a kachisi.”
^ M’Baibolo, “nyanja ya Galileya” yutomolewa na mazina akuti, nyanja ya Kineleti, nyanja ya Genesalete komasoti nyanja ya Tibeliyo.
^ Olo kuti, “Dela ya Matauni 10.”
