Wilembewa na Mateyo 8:1-34
8 Pechiseluka mulupili mwamene umo, chigulu cha ŵanthu chimukonkhelela.
2 Pavuli pake pefwika munthu wamankhutu. Munthu wamene uyo emugwadila nolaŵila kuti: “Ambuye, nuziŵa kuti keno mufuna, mungakwanishe kunipojeka.”
3 Tetyo Yesu etambulula kwanja yake nomukumya ndipo enena kuti: “Eye nufuna. Pola.” Nthawe yamene iyo mankhutu ŵake esila.
4 Tetyo Yesu emuuja kuti: “Samala osauja aliyense vamene ivi, koma ulute ukawonekele kuli wansembe ndipo ukapeleke mphaso yechilamula Mose, kuti inkhale umboni kuli ove.”
5 Pechiloŵa mu tauni ya Kapelenawo, nsogoleli wa masodja ewela kuli yove nomusenga
6 kuti: “Ambuye, wantchito wangu wazizila vizo mwakuti aliyone m’ng’anda ndipo ovutika ngako.”
7 Yove emuuja kuti: “Nikafwika kwamene uko nimupojeke.”
8 Nsogoleli wala wa masodja eyankha kuti: “Ambuye, nine lini munthu woyenelela kuti mwewo mukaloŵe m’ng’anda mwangu, koma mungolaŵila tyala mawu ndipo wantchito wangu wamene uyo apole.
9 Chifukwa nanesoti nili na akulu-akulu onilolela komasoti nili na masodja ŵanulolela. Nikauja mmozi kuti, ‘Nkhoya!’ oluta, muyakine nikamuuja kuti, ‘Wela!’ owela. Wantchito wangu nikamuuja kuti, ‘Chita chakuti!’ ochita.”
10 Yesu pechimvwa vamene ivo, edabwa ndipo euja ŵala enzemukonkhelela kuti: “Kulaŵila chendi, mu Isilaeli niliye fwanemo aliyense wachikhulupililo chikulu monga ni chamene ichi.
11 Koma nukuujani kuti ŵanthu anyinji ofumila ku m’mawa na ku nchingulo azawele nonkhala pa thebo pamozi na Abulahamu, Isaki na Yakobo mu Ufumu wakululu,
12 pamene ŵana a Ufumu wamene uyo azaponyewe kunja ku mfinzi. Kwamene uko azalile nokukuta menu.”
13 Pavuli pake Yesu euja nsogoleli wala wa masodja kuti: “Nkhoya. Chifukwa chakuti wawonesha chikhulupililo, vamene ivo vawasenga vichitike. Pa nthawe yamene iyoletu wantchito wala epola.
14 Lomba Yesu pechiloŵa m’ng’anda mwa Petulo, ewona apongozi a Petulo aliyone, olwala maleliya.*
15 Tetyo ekata kwanja ya amayi amene awo ndipo maleliya amene awo esililatu, mwakuti euka noyamba kumutumikila.
16 Koma chakunchingulo, ŵanthu emuletela ŵanthu anyinji enze na viŵanda. Yove efumya mizimu yamene iyo na mawu tyala ndipo epojeka ŵanthu onse amene enze lwala.
17 Echita vamene ivi kuti vechinena Mulungu kupitila muli mneneli Yesaya vikwanilishiwe. Yove enena kuti: “Yove etola matenda ŵasu nonyamula voŵaŵa vasu.”
18 Yesu pechiwona kuti gulu ya ŵanthu yamuzenguluka, elamula kuti afumeko noluta ku silya iyakine.
19 Tetyo kwiwela mulembi nomuuja kuti: “Mphunzisi nikukonkheleleni kulikonse kwamungalute.”
20 Koma Yesu emuuja kuti: “Ankhandwe ali na misima ndipo tunyoni twa mmululu tuli na vivumbo, koma Mwana wa munthu aliyeletu pangasamilishe mutu wake.”
21 Pavuli pake m’mozi mwa ophunzila ŵake emuuja kuti: “Ambuye, niloleni nilute nikayambe naika malilo ŵa atata.”
22 Koma Yesu emuyankha kuti: “Wewo upitilije mphela kunikonkhelela, ndipo asiye akufwa aike akufwa ŵawo.”
23 Tetyo pechikwela sitima, ophunzila ŵake emukonkhelela.
24 Pavuli pake pa nyanja pamene apo peyambika mphepo yamphamvu mwakuti mafunde enzeloŵesha manzi mu sitima mwamene umo, koma yove enze yone.
25 Ndipo ove eluta kuyamuusha nomuuja kuti: “Ambuye, tipulumusheni titifwe!”
26 Koma yove eŵakonsha kuti: “Ndaŵa yanji muchita wowa teti, mwewo ŵanthu achikhulupililo chitontho? Pavuli pake euka nozuzula mphepo na nyanja, pamene apo chimphepo chileka ndipo penkhala chelele.
27 Tetyo analume amene awo edabwa nonena kuti: “Kansi munthu wamene uyu ni wantundu wanji? Olo mphepo na nyanja vumumvwila.
28 Pechifwika silya iyakine, mu dela ya Agadala, ekumana na analume aŵili enze na viŵanda ofumila ku manda.* Analume amene aŵa enzechitisha wowa ngako mwakuti paliye aliyense enzetang’a ntima kupita mu nsewu wamene uyo.
29 Nthawe yamene iyo ove eŵilikija kuti: “Kansi mufuna chinji kuli sewo, Mwana wa Mulungu? Kansi mwawela kuzatipasa chilango nthawe yoikiliwatu ikaliye kwana?”
30 Koma patali na pamene apo, penze gulu ikulu ya nkhumba zenze kulya.
31 Tetyo viŵanda vamene ivo viyamba kumupapatila kuti: “Keno mufuna kutifumya, mutitumije mu nkhumba izozala.”
32 Yove eviuja kuti: “Nkhoyani!” Tetyo vifuma nakuyaloŵa mu nkhumba zamene izo. Nthawe yamene iyo nkhumba zonse zamene izo ziutukila kumpolipoli nodjumphila mu nyanja, ndipo zifwila m’manzi mwamene umo.
33 Koma achiŵeta a nkhumba zamene izo ethaŵa ndipo pechiloŵa m’tauni efotokoza vonse, kupamikijapo vichitikila analume ŵala enze na viŵanda.
34 Pevichitika tetyo, ŵanthu onse a mu tauni yamene iyo eluta kuyakumana na Yesu. Pechimuwona emusenga kuti afumemo mu dela yawo yamene iyo.
