Wilembewa na Mateyo 9:1-38
9 Tetyo Yesu ekwela sitima notaukila silya iyakine, ndipo eluta ku tauni yenzenkhala.
2 Kwamene uko ŵanthu emuletela munthu wozizila vizo, aliyone pamachila, Yesu pechiwona chikhulupililo chawo, euja wala munthu wozizila vizo kuti: “Tang’a ntima mwanawe! Machimo ŵako akhululukiliwa.”
3 Pechichita tetyo alembi ayakine enzelaŵila mu ntima mwawo kuti: “Munthu wamene uyu onyoza Mulungu.”
4 Koma Yesu eziŵa venzeganiza ove ndipo eŵakonsha kuti: “Ndaŵa yanji muganiza vinthu viipa m’mitima mwanu?
5 Mwachisanzo, ni chinji chosavuta kunena kuti, ‘Machimo ŵako akhululukiliwa.’ olo kunena kuti, ‘Panama uyende’?
6 Yembekezani nikuwonesheni kuti Mwana wa munthu ali na mphamvu pano pa chalo zokhululukila machimo.” Pavuli pake yove euja wala munthu wozizila vizo kuti: “Panama, tola machila ŵako amene aŵa ndipo ulute kwanu.”
7 Ndipo enyamuka noluta kwawo.
8 Gulu ya ŵanthu amene awo peiwona vamene ivi, ichita wowa ndipo itamanda Mulungu, wamene epeleka mphamvu zamene izo kuli ŵanthu.
9 Pechifuma pamene apo, Yesu ewona munthu muyakine zina yake Mateyo alinkhale mu ofesi yosonkheshelamo nsonkho, ndipo emuuja kuti: “Unkhale wophunzila wangu,” Nthawe yamene iyo enyamuka nomukonkhelela.
10 Nthawe iyakine, penze kulya chakulya* m’ng’anda iyakine, kwiwela ŵanthu anyinji osonkhesha nsonkho komasoti ochimwa ndipo eyamba kulya* pamozi na Yesu na ophunzila ŵake.
11 Koma Afalisi pechiwona vamene ivi ekonsha ophunzila ŵake kuti: “Ndaŵa yanji mphunzisi wanu akulya pamozi na ŵanthu osonkhesha nsonkho komasoti ochimwa?”
12 Yove pechimvwa vamene ivo, eyankha kuti: “Ŵanthu ali bwino ofunikilalini dokota, koma olwala niye omufuna.
13 Tetyo nkhoyani mukaphunzile tanthauzo ya mawu akuti: ‘Nufuna chifundo, osati nsembe.’ Chifukwa newo niliyewele kuzaita ŵanthu olungama, koma ochimwa.”
14 Pavuli pake ophunzila a Yohani ewela kuli yove nomukonsha kuti: “Ndaŵa yanji sewo na Afalisi tulekeja kulya koma ophunzila ŵanu olekejalini kulya?”
15 Yesu eŵayankha kuti: “Ayake a mkwati akumvwa lini chisoni keno mkwati wamene uyo ali nawo pamozi, kansi n’tetyo lini? Koma masiku akuza pamene mkwati wamene uyo azafumyiwe pakati pawo, ndipo pa nthawe yamene iyo azalekeje kulya.
16 Paliye osonelela chigamba chanyowani pamalaya akunja akale. Chifukwa chigamba chamene icho chingakweŵe nokezula malaya amene awo ndipo kukezuka kwamene uko kungayangijilike ngako.
17 Komasoti ŵanthu otila lini vinyu wanyowani mu vyola vachikumba vakale. Akachita tetyo, vyola vachikumba vung’ambika ndipo vinyu utaika mwakuti vyola vamene ivo vuwonongeka. Koma ŵanthu otila vinyu wanyowani mu vyola vachikumba vanyowani, ndipo vonse viŵili vusungika luweme.”
18 Penzeŵauja vamene ivi wolamulila muyakine emuvwendelela. Pavuli pake emugwadila nonena kuti: “Pano panunena mwana wangu mwanakazi payakine wamwalila kale. Koma tiyeni mukamukumye na kwanja yanu ndipo ankhale na moyo.”
19 Pavuli pake Yesu enyamuka na ophunzila ŵake nomukonkhelela.
20 Tetyo mwanakazi muyakine wamene enzelwala matenda otaya milopa kwa vyaka 12 efwika kuvuli kwake nokata usalu wopyata wa m’mbali mwa malaya ŵake akunja,
21 Chifukwa mu ntima mwake enzenena kuti: “Nikangokata tyala malaya ŵake akunja, shuwa nipole.”
22 Yesu echunguluka ndipo ewona mwanakazi wamene uyo nonena kuti: “Mwanawe, tang’a ntima, chikhulupililo chako chakupojeka. Kufumila pa nthawe yamene iyo mwanakazi wamene uyo epola.
23 Lomba pechiloŵa m’ng’anda ya wala wolamulila, ewona ŵanthu olija vitolilo komasoti gulu ya ŵanthu olila moŵilikija.
24 Yesu eŵauja kuti: “Fumani muno, chifukwa msimbi uyu aliye mwalile, koma aliyone. Pechilaŵila vamene ivi, ŵanthu amene awo eyamba kumuseka monyoza.
25 Ŵanthu ŵala pechiŵafumya panja, Yesu eloŵa nokata kwanja ya msimbi wamene uyo, ndipo yove euka.
26 Nkhani yamene iyi imvwika mu dela yonse yamene iyo.
27 Yesu penzefuma kwamene uko, analume aŵili amene enze na vuto yosalola emukonkhelela uku oŵilikija kuti: “Mutichitile chifundo, Mwana wa Davite.”
28 Yesu pechiloŵa m’ng’anda, analume ŵala enze na vuto yosalola ewela kuli yove, ndipo yove eŵakonsha kuti: “Kansi mukhulupilila kuti newo ningachite vamene ivi?” Ove emuyankha kuti: “Eye, Ambuye.”
29 Pavuli pake eŵakata m’menso nonena kuti: “Mokatijana na chikhulupililo chanu vamufuna vichitike kuli mwewo.”
30 Menso ŵawo eseguka ndipo Yesu eŵachenjeja mwamphamvu kuti: “Samalani, osati aliyense aziŵe vamene ivi.”
31 Koma ove pechifuma kunja, efalisa paliponse vokhuza yove mu dela yonse yamene iyo.
32 Analume aŵili amene awo penzenyamuka, ŵanthu emuletela munthu asalaŵila wamene enze na chiŵanda.
33 Pechifumya chiŵanda chamene icho, munthu wosalaŵila wamene uyo elaŵila, mwakuti gulu yamene iyo ya ŵanthu idabwa ndipo inena kuti: “Voteti vikaliye onekapo kufumila kale yonse mu Isilaeli.”
34 Koma Afalisi enzenena kuti: “Wamene uyu ofumya viŵanda na mphamvu ya wolamulila viŵanda.”
35 Tetyo Yesu eyamba ulwendo woyendela matauni na minzi yonse. Yove enzephunzisa m’malo ŵawo opemphelela komasoti kulalikila uthenga uweme wa Ufumu ndipo enzepojeka matenda a ntundu uliwonse ŵenzelwala ŵanthu.
36 Pechiwona chigulu cha ŵanthu, yove eŵamvwila chisoni, chifukwa enze ozungaila-zungaila komasoti aliye oŵasamalila monga ni mbelele ziliye chiŵeta.
37 Pavuli pake euja ophunzila ŵake kuti: “Ni chendi, pali vinthu vinyinji vufunika kuweja, koma antchito natontho.
38 Tetyo sengani Munecho wa munda kuti atumije antchito kuyaweja.”
