Ntchito za atumwi 1:1-26
1 A Teofilo, mu nkhani yala yoyamba, nilemba vinthu vonse vechichita Yesu komasoti kuphunzisa,
2 mpaka pa nsiku yechitolewa kuluta kululu, pechipeleka malangizo kupitila muli mzimu utuŵa kuli atumwi ŵechisankha yove.
3 Pavuli pa mavuto ŵechikumana nawo, yove ewonekela wa moyo kuli atumwi amene awo pokatishila ntchito maumboni anyinji osimikijilika. Ove emuwona masiku onse 40 ndipo enzeŵauja za Ufumu wa Mulungu.
4 Pa nthawe yechisonkhana na ophunzila amene awo, yove eŵapasa malangizo akuti: “Osafuma mu Yelusalemu, koma muyembekezele vechilonjeza Atata, vala venikuujani.
5 Chifukwa Yohani enzebatiza na manzi, koma mwewo muzabatiziwe na mzimu utuŵa pakaliye pita masiku anyinji.”
6 Tetyo pechisonkhana emukonsha kuti: “Ambuye, kansi muwejeleshe ufumu kuli Aisilaeli lomba teti?”
7 Yove eŵayankha kuti: “Mufunikilalini kuziŵa nthawe olo nyengo yasankha Atata mu ulamulilo wawo.
8 Koma mukazalondela mzimu utuŵa, muzankhale na mphamvu. Ndipo muzankhale mboni zangu mu Yelusalemu, ku Yudeya konse na ku Samaliya, mpaka kwachulekejela* chalo.”
9 Pechisilija kulaŵila vamene ivi, yove etolewa kuluta mmululu ove owona, ndipo nkumbi wemuziŵilija mwakuti aliyekwanishesoti kumuwona.
10 Pa nthawe yenzekwela yove kululu, mwazizizi analume alivwale vovwala vituŵa epanama pa mbali pawo.
11 Analume amene awo eŵakonsha kuti: “Mwewo analume aku Galileya, ndaŵa yanji mwangopanama nololeshesha kululu? Wamene uyu Yesu, watolewa pakati panu kuluta kululu, azawele mu njila yolingana na mwamwamuwonela penzekuya kululu.”
12 Pavuli pake ejokela ku Yelusalemu, kufumila kulupili ya Maolivi. Lupili yamene iyi ili pafupi na Yelusalemu, pa nsenga wa ulwendo wa nsiku ya sondo.*
13 Pechifwika mu tauni yamene iyo eluta m’chipinda cha mmululu, mwenzenkhala. Penze Petulo, Yohani, Yakobo, Andileya, Filipo, Thomase, Batulumeu, Mateyo, Yakobo mwana wa Alufeyo, Simoni wala wolipeleka komasoti Yudasi mwana wa Yakobo.
14 Mokatijana onse amene aŵa enzelimbikila kupemphela pamozi na Maliya amayi ŵake a Yesu, anakazi ayakine komasoti enekwake a Yesu.
15 Mmasiku amene awo Petulo epanama pakati pa akwasu amene awo (gulu yonse yamene iyo yenze na ŵanthu pafupifupi 120) nonena kuti:
16 Akwasu venze vofunikila kuti lemba yamene iyi ikwanilishiwe, yeunenelatu mzimu utuŵa kupitila mwa Davite. Lemba yamene iyi ni yokhuza Yudasi, wamene esogolela ŵanthu kuti akakate Yesu.
17 Yove enze mmozi wa sewo, ndipo enzetumikila nase pamozi.
18 (Munthu wamene uyu egula munda na malipilo a ntchito zosalungama. Epona na mutu nophulika luvumo ndipo mala ŵake onse ekhutuka.
19 Ivi viziŵika kuli ŵanthu onse aku Yelusalemu, mwakuti munda wamene uyo eupasa zina ya chilaŵilo chawo yakuti A·kelʹda·ma kutanthauza “Munda wa Milopa.”)
20 M’buku ya Masalimo elembamo kuti, ‘Malo ŵake onkhala ayaluke matongwe, ndipo osati papezeke aliyense wonkhalamo,’ komasoti kuti, ‘Udindo wake wololela utolewe na munthu muyakine.’
21 Tetyo nipofunika kuti aloŵewe mmalo na mmozi mwa ŵanthu enzeyenda nase pa nthawe yonse yamene Ambuye Yesu yenzechita vinthu vosiyana-siyana pakati pasu.
22 Munthu wake ankhale wamene enzeyenda nase kufumila pamene Yesu pechibatiziwa na Yohani, kuzafwika pa nsiku yechitolewa kuluta kululu kufuma pakati pasu. Munthu wamene uyu ankhale mboni ya kuuka kwa Yesu pamozi na sewo.”
23 Tetyo petomolewa ŵanthu aŵili, Yosefe oitiwa kuti Balasaba, wamene enzeziŵikasoti kuti Yusito komasoti Matiya.
24 Pavuli pake epemphela kuti: “Mwewo Yehova, muziŵa mitima ya ŵanthu onse, tiwonesheni wamwasankha pa ŵanthu aŵili amene aŵa
25 kuti atole malo amene Yudasi ŵechisiya noyenda njila zake ndipo atole utumiki wamene uyu komasoti ankhale ntumwi.”
26 Pechichita tetyo echita madjiki ndipo madjiki amene awo eponela Matiya. Tetyo yove emupamikija pali atumwi ŵala 11.*
Malizu a m'nyansi
^ Olo kuti, “ku madela akutali.”
^ Ulwendo wamene uyu kutalimpha kwake wenze kilomita imozi.
^ Olo kuti, “enzewonewa monga ni atumwi ayakine ŵala 11.”
