Ntchito za atumwi 10:1-48
10 Ku Kaisaleya kwenze munthu muyakine zina yake Kolineliyo, nsogoleli wa masodja* a mu gulu ya masodja a ku Italiya.*
2 Yove enzekonda kupemphela ndipo enzeyopa Mulungu pamozi na banja yake yonse. Komasoti enzepasa ŵanthu mphaso za chifundo zinyinji ndipo enzepemphela mopapatila kwa Mulungu nthawe zonse.
3 Nsiku iyakine cha mma 3 koloko nzuŵa,* ewona mensomphenya. Mngelo wa Mulungu ewela kuli yove nonena kuti: “Kolineliyo!”
4 Pevichitika tetyo, Kolineliyo eloleshesha mngelo wamene uyo mwawowa nonena kuti: “Laŵilani Mbuye wangu.” Mngelo wamene uyo emuuja kuti: “Mulungu wamvwa mapemphelo ŵako komasoti wawona mphaso zako zachifundo.
5 Tetyo tuma ŵanthu ku Yopa kuti akaite munthu muyakine zina yake Simoni, oitiwasoti kuti Petulo.
6 Munthu wamene uyu ni mulwendo ku ng’anda kwa Simoni muyakine wopuka vikumba, wamene ng’anda yake ili mmbali mwa nyanja.”
7 Mngelo wamene uyo wenzelaŵila naye pechifumapo, Kolineliyo eita atumiki ŵake aŵili komasoti nsodja wake muyakine wamene enzekonda kupemphela.
8 Yove eŵafotokozela vonse noŵatuma ku Yopa.
9 Nsiku yokonkhapo akaliyenda ulwendo wawo komasoti asala patontho kufwika mu tauni yamene iyo, Petulo eluta mu chipinda cha mmululu kuyapemphela cha mma 12 koloko nzuŵa.*
10 Koma echimvwa njala ngako ndipo enzefuna kulya. Chakulya pechenzepikiwa, eyamba kuwona mensomphenya.
11 M’mensomphenya amene awo ewona kululu kuli seguke, chinthu chiyakine chuwoneka monga ni chinyula chikulu chuseluka. Chinthu chamene icho echikata makona onse 4 nochiselushila pano pa chalo.
12 Pa chinthu chamene icho penze mitundu yonse ya vinyama va mendo 4, vinyama vukalaŵa va pano pa chalo komasoti tunyoni twa mmululu.
13 Pavuli pake echimvwa mawu akuti: “Petulo, nyamuka ndipo upaye vinthu vamene ivi ulye.”
14 Koma Petulo enena kuti: “Yayi Ambuye, newo nikaliye lyapo chinthu choipishiwa komasoti chiipa chilichonse.”
15 Koma echimvwasoti ŵala mawu kachiŵili kuti: “Vinthu vawatuŵisha Mulungu, ulekeletu kunena kuti ni voipishiwa.”
16 Echimvwasoti mawu amene aŵa kachitatu, ndipo nthawe yamene iyo chinthu chala chuwoneka monga ni chinyula chitolewa kuluta kululu.
17 Petulo pechisiliwa nzelu chifukwa chakuti aliye mvwishe tanthauzo ya mensomphenya amene awo, ŵanthu ŵala amene etumiwa na Kolineliyo ekonsha kuti ng’anda ya Simoni ili kuni ndipo enzepaname pa gedi.
18 Ove ekonsha moŵilikija kuti keno kwamene uko enze na mulwendo zina yake Simoni oitiwasoti kuti Petulo.
19 Petulo akaliganizila mphela za mensomphenya amene awo, mzimu wa Mulungu wemuuja kuti: “Petulo! Pali ŵanthu atatu amene okufuna.
20 Lomba konzeka, seluka ulute nawo pamozi. Osati ukaikile, chifukwa naŵatuma ni newo.”
21 Tetyo Petulo eseluka nokumana na ŵanthu amene awo ndipo enena kuti: “Munthu wamusakila ni newo. Nikuyavyeni tyani?”
22 Ove enena kuti: “Tafumila kwa Kolineliyo, nsogoleli wa masodja. Yove ni munthu wolungama komasoti oyopa Mulungu ndipo ntundu wonse wa Ayuda umutembeja. Mngelo ntuŵa emupasa malangizo ofumila kwa Mulungu kuti atume ŵanthu kuzakutolani kuti mulute ku ng’anda kwake, kuti akamvwe vati mukalaŵile mwewo.”
23 Tetyo eŵaloŵesha m’ng’anda noŵasamalila monga alwendo ŵake.
Kwacha mmawa, enyamuka noluta nawo ndipo akwasu ayakine aku Yopa eluta naye pamozi.
24 Nsiku yokonkhapo efwika ku Kaisaleya ndipo Kolineliyo enzeŵayembekezela chendi. Yove enze eunganija enekwake na azishamwali ŵake apa ntima.
25 Petulo penzeloŵa, Kolineliyo ekumana naye ndipo egwada powonesha kumulambila.
26 Koma Petulo emupanamika nonena kuti: “Panama, nanesoti nine munthu monga ni wewo.”
27 Pavuli pake eloŵa nkati uku okambilana ndipo efwana ŵanthu anyinji ali ungane.
28 Lomba Petulo eŵaujasoti kuti: “Mwewosoti muziŵa luweme kuti nivosaloleka kuti Muyuda akotandala na munthu wa ntundu uyakine olo kuvwendelana naye pafupi. Koma Mulungu waniwonesha kuti osati nitomole munthu aliyense kuti ni woipishiwa olo wonyansa.
29 N’chifukwa chake nawela mosakakamijika pamwatuma ŵanthu kuti azaniite. Tetyo niujeni chamwaniitila.”
30 Lomba Kolineliyo enena kuti: “Masiku 4 apita, newo penenzepemphela m’ng’anda mwangu muno cha mma 3 koloko nzuŵa,* nichingowona munthu alivwale vituŵa enze paname kusogolo kwangu.
31 Munthu wamene uyo eniuja kuti, ‘Kolineliyo, Mulungu wamvwa pemphelo yako komasoti wawona mphaso zako zachifundo.
32 Tetyo tuma ŵanthu ku Yopa kuti akaite Simoni oitiwasoti kuti Petulo. Munthu wamene uyo ni mulwendo m’ng’anda ya Simoni wopuka vikumba, wamene onkhala mmbali mwa nyanja.’
33 Nthawe yamene iyo nituma ŵanthu kuti akakuiteni ndipo mwatiwamila ntima nowela. Tetyo tonse tili pano pamenso pa Mulungu, kuti timvwe vonse vawakulamulani Yehova kuti mutiuje.”
34 Petulo pechimvwa vamene ivi, eyamba kulaŵila kuti: “Shuwa naziŵa kuti Mulungu aliye sankho.
35 Yove olondela munthu wofumila mu ntundu uliwonse, wamene omuyopa nochita chilungamo.
36 Mulungu etumija mawu kuli Aisilaeli nolalikila uthenga uweme kuli ove wa ntendele kupitila mwa Yesu Khilisitu. Wamene uyu ni Ambuye wa onse.
37 Mwewo muziŵa nkhani yamene yenze ifalikila kufumila ku Galileya mpaka ku Yudeya konse, pavuli pa ubatizo wenzelalikila Yohani.
38 Nkhani yake yenze yonena za Yesu waku Nazaleti, wamene Mulungu emuzoza na mzimu utuŵa na mphamvu. Pakuti Mulungu enze naye, eyenda mu chalo chonse nochita viweme komasoti kupojeka ŵanthu onse amene enzetamanishiwa na Mdyelekezi.
39 Ndipo sewo nise mboni za vinthu vonse vechichita mu chalo cha Ayuda na ku Yelusalemu kumo. Koma Aisilaeli amene awo emupaya pomupanyika pachimuti.
40 Wamene uyu eushiwa na Mulungu pa nsiku yachitatu nolola kuti ŵanthu amuwone,
41 osati ŵanthu onse, koma mboni zechisankhilatu Mulungu, zamene ni sewo, amene tichilya komasoti kumwa naye pamozi pechiushiwa.
42 Komasoti, etilamula kuti tilalikile kuli ŵanthu nopeleka umboni wokwanila wakuti yove wamene uyu niye epasiwa udindo na Mulungu woweluza ŵanthu amoyo na akufwa.
43 Aneneli onse ochitila umboni za yove, kuti aliyense wamene omukhulupilila, machimo ŵake okhululukiliwa mu zina yake.”
44 Petulo penzelaŵila vamene ivi, ŵanthu onse amene enzemvwishila mawu amene awo elondela mzimu utuŵa.
45 Ndipo okhulupilila ŵala amene ewela na Petulo, amenesoti enze ochitiwa mdulidwe, edabwa ngako. Ove edabwa chifukwa mphaso ya mahala ya mzimu utuŵa ipelekewasoti kuli ŵanthu amitundu iyakine.
46 Chifukwa eŵamvwasoti olaŵila vilaŵilo viyakine komasoti kulemekeza Mulungu. Lomba Petulo enena kuti:
47 “Ŵanthu aŵa alondela mzimu utuŵa monga ni mwetilondelelasoti sewo. Lomba kansi niŵani angaleshe kuti osati abatiziwe mmanzi?”
48 Pechichita tetyo eŵalamula kuti abatiziwe mu zina ya Yesu Khilisitu. Tetyo ove emusenga kuti ankhale nawo mphela kwa masiku atontho.
Malizu a m'nyansi
^ Enzelolela masodja 100.
^ Gulu ya masodja a Chiloma amene enzenkhalapo 600.
^ Mu Chigiliki, “awazi ya 9,” kuŵelenga kufumila mma 6 koloko mmawa.
^ Mu Chigiliki, “awazi ya 6,” kuŵelenga kufumila mma 6 koloko mmawa.
^ Mu Chigiliki, “awazi ya 9,” kuŵelenga kufumila mma 6 koloko mmawa.