Ntchito za atumwi 11:1-30
11 Lomba atumwi na akwasu amene enze ku Yudeya echimvwa kuti ŵanthu amitundu iyakine nawosoti alondela mawu a Mulungu.
2 Koma Petulo pechiluta ku Yelusalemu ŵanthu olimbikisa mdulidwe eyamba kumupasa mulandu.
3 Ove enzemunena kuti: “Wewo wiloŵa m’ng’anda ya ŵanthu osachita mdulidwe ndipo wichilya nawo.”
4 Tetyo Petulo eyamba kuŵafotokozela luweme vichitika kuti:
5 “Newo penenzepemphela mu tauni ya Yopa, niwona mensomphenya. Niwona chinthu chuwoneka monga ni chinyula chikulu chuseluka kufumila kululu. Chinthu chamene icho echikata mmakona onse 4 nochiselushila penenze newo.
6 Penichiloleshesha, niwonapo vinyama vamendo 4 vapano pa chalo, vinyama vakusanga, vinyama vukalaŵa komasoti tunyoni twa mmululu.
7 Nichimvwasoti mawu akuti: ‘Petulo, nyamuka ndipo upaye vinthu vamene ivi nakulya.’
8 Koma newo ninena kuti, ‘Yayi Ambuye nkamwa mwangu mukaliye loŵako chinthu chilichonse choipishiwa komasoti chiipa.’
9 Koma nichimvwasoti ŵala mawu kachiŵili kuti: ‘Vinthu vawatuŵisha Mulungu, ulekeletu kunena kuti n’voipishiwa.’
10 Mawu amene awo emvwikasoti kachitatu, ndipo pavuli pake vonse vala vitolewa noluta kululu.
11 Nthawe yamene iyo ŵanthu atatu amene etumiwa kuli newo kufumila ku Kaisaleya epanama pa ng’anda yetenzenkhala.
12 Pavuli pake mzimu winiuja kuti nilute nawo, osati nikaikile olo patontho. Akwasu aŵa 6 eluta nane pamozi ndipo tichiyaloŵa m’ng’anda ya munthu wamene uyo.
13 Yove eniuja kuti penze m’ng’anda mwake ewona mngelo ali paname ndipo emuuja kuti, ‘Tuma ŵanthu kuti alute ku Yopa akaite Simoni oitiwasoti kuti Petulo.
14 Yove azakuuje vinthu vamene vizayavye wewo na ŵanthu onse a m’banja mwako kupulumuka.’
15 Koma penichingoyamba kulaŵila, ove elondela mzimu utuŵa monga ni mwevenzelesoti na sewo pala poyamba.
16 Pevichitika tetyo nikumbukila ŵala mawu ŵenzekonda kulaŵila Ambuye akuti, ‘Yohani enzebatiza na manzi, koma mwewo muzabatiziwe na mzimu utuŵa.’
17 Tetyo keno Mulungu eŵapasa mphaso yamahala yechitipasasoti sewo amene tekhulupilila mwa Ambuye Yesu Khilisitu, kansi newo nine ŵani kuti nileshe Mulungu?”
18 Pechimvwa vamene ivi, eleka kumushusha,* ndipo etamanda Mulungu kuti: “Niyekuti Mulungu wapelekasoti mwayi kuli ŵanthu amitundu iyakine kuti nawosoti alape nakuzafwana moyo.”
19 Ŵanthu amene emwajikana chifukwa cha mavuto amene eyamba chifukwa cha vechitikila Sitefano, echiyafwika mpaka ku Foinike, ku Kupulo na ku Antiokeya. Ndipo enzelalikila Ayuda ŵeka.
20 Koma ayakine mwa ŵanthu amene aŵa enze aku Kupulo naku Kulene. Ove pechifwika ku Antiokeya eyamba kulalikila uthenga uweme wa Ambuye Yesu kuli ŵanthu olaŵila Chigiliki.
21 Kwanja ya Yehova yenzeŵayavya ndipo ŵanthu anyinji ekhulupilila noyamba kukonkheja Ambuye.
22 Mpingo waku Yelusalemu wichimvwa za ŵanthu amene aŵa ndipo witumija Balanaba kuti alute ku Antiokeya.
23 Pechifwika kwamene uko, nowona kuwama ntima kukulu kwa Mulungu, ekondwela ndipo eyamba kulimbikisa onse kuti apitilije na ntima wonse kunkhala okhulupilika kwa Ambuye.
24 Balanaba enze munthu muweme komasoti wachikhulupililo chotang’a. Yove enzesogolelewa ngako na mzimu utuŵa ndipo ŵanthu ayakinesoti anyinji ekhulupilila Ambuye.
25 Pavuli pake Balanaba eluta ku Taliso kuyasakila Saulo.
26 Pechimufwana ewela naye ku Antiokeya. Ove enzesonkhana na mpingo kwamene uko kwa chaka chonse ndipo ephunzisa ŵanthu anyinji. Ku Antiokeya niye kwechiyamba kuitiwa ophunzila amene awo kuti Akhilisitu, mosogolelewa na Mulungu.
27 Pa nthawe yamene iyi aneneli ofumila ku Yelusalemu eluta ku Antiokeya.
28 Moyavyiwa na mzimu wa Mulungu, mmozi wa ove zina yake Agabo, elosela kuti pa chalo chonse pazaŵe njala ikulu. Vamene ivi vechitika chendi mu nthawe ya Kalaudiyo.
29 Tetyo ophunzila amene awo esimikija ntima kutumija thandizo kuli akwasu aku Yudeya, aliyense mokatijana na mwangakwanishile.
30 Ndipo echita chendi vamene ivo, mwakuti thandizo yamene iyo epasila Balanaba na Saulo kuti akapeleke kuli akulu.
Malizu a m'nyansi
^ Olo kuti, “echingoti kukamwa yashaa.”
