Ntchito za atumwi 12:1-25
12 Pa nthawe yamene iyi Mfumu Helode* eyamba kutamanisha ŵanthu ayakine mu mpingo.
2 Yove epaya Yakobo nkwake wa Yohani na chibemba.
3 Pechiwona kuti vamene ivi vakondwelesha Ayuda, emangasoti Petulo. (Emumanga mmasiku a Mikate Iliye Vofufumisha.)
4 Emukata nomuika mu djeli ndipo emusiya mmanja mwa magulu 4 ŵa masodja kuti akochinjana pomulolela. Gulu iliyonse yenze na masodja 4. Cholinga cha Helode chenze chakuti azamupase mulandu pamenso pa ŵanthu Pasika akazasila.
5 Tetyo Petulo eikiwa mu djeli mwamene umo, koma mpingo wenzemupemphelela ngako kwa Mulungu.
6 Lomba Helode penzekonza zakuti alete Petulo kuli ŵanthu, usiku wamene uyo Petulo eyona pakati pa masodja aŵili alimange na matcheni aŵili. Pa muliyango penzesoti akamalonda amene enzelolela djeli yamene iyo.
7 Koma mwazizizi, mngelo wa Yehova ewela, ndipo m’chipinda mwa djeli yamene iyo mwingweleŵela. Pavuli pake mngelo wamene uyo eusha Petulo pomunyang’anyisha mmaŵambo nonena kuti: “Uka kamangu!” Pevichitika tetyo, matcheni ŵenze emumanga nawo mmanja epona pansi.
8 Mngelo wamene uyo emuuja kuti: “Vwala vovwala vako na nsapato zako.” Yove echita chendi vamene ivo. Pavuli pake emuuja kuti: “Vwala malaya ŵako akunja ndipo ukonikonkhelela.”
9 Yove efuma nomukonkhelela, koma aliyeziŵe kuti venzechitika na mngelo wamene uyo venze chendi ngavo-ngavo. Enzengoganiza kuti owona mensomphenya.
10 Pechipitilila gulu yoyamba ya masodja apagedi na yachiŵili, efwika pagedi ya nsimbi yofumila poluta mu tauni, ndipo iseguka yeka. Pechifuma eyenda pamozi mu nsewu ndipo mwazizizi wala mngelo efumapo.
11 Koma Petulo pechiyamba kuzindikila venzechitika, enena kuti: “Naziŵa lomba kuti Yehova niye watumija mngelo wake kuzanipulumusha mmanja mwa Helode komasoti ku vinthu vonse venzeyembekezela Ayuda kuti vichitike.”
12 Pechiziŵa vamene ivi, yove eluta ku ng’anda kwa Maliya, amayi ŵake a Yohani oitiwasoti kuti Maliko. Kwamene uko ŵanthu anyinji enze eungana noyamba kupemphela.
13 Pechigogoza pachiseko cha pa gedi, msimbi muyakine wantchito zina yake Loda eluta kuti akawone enzegogoza.
14 Koma pechiziŵa mawu a Petulo ekondwela ngako mwakuti mmalo mosegula gedi yamene iyo, eutukila nkati nakuyanena kuti Petulo ali pagedi.
15 Koma ove emuyankha kuti: “Ni usilu wamene uyu!” Yove pechilimbikila kuti olaŵila vachendi ŵanthu amene awo eyamba kunena kuti: “Ni mngelo wake wamene uyo.”
16 Koma Petulo epitilija kugogoza. Ove pechisegula, ewona kuti ni yove chendi ndipo edabwa ngako.
17 Koma yove eŵauja na manja kuti ankhale chelele, ndipo eŵafotokozela momvwika luweme mwechimufumyila Yehova mu djeli. Pavuli pake enena kuti: “Nkhani yamene iyi mukauje Yakobo komasoti akwasu.” Pechichita tetyo efuma noluta kuyakine.
18 Kwacha mmawa, masodja ŵala esokonezeka ngako chifukwa chosaziŵa vachitikila Petulo.
19 Helode esakila-sakila Petulo paliponse ndipo pechikangiwa kumufwana, epanikija ŵala akamalonda na makonsho komasoti elamula kuti aŵatole nakuyaŵapasa chilango. Pavuli pake Helode efuma ku Yudeya noluta ku Kaisaleya, kwamene enkhalako kwa nthawe ikulu.
20 Helode ekalipila ngako* ŵanthu aku Tulo naku Sidoni. Tetyo ŵanthu amene awo ewela kuli yove mokatijana ndipo pechimunyengelela Balasito wamene enzelolela ng’anda ya mfumu,* esenga ntendele. Ove echita vamene ivi chifukwa chalo chawo chenzedalila chakulya chamene chenzefumila mu chalo cha mfumu yamene iyo.
21 Pa nsiku iyakine yechisankha, Helode evwala vovwala vake vachifumu nonkhala pampando wake wotongela milandu ndipo eyamba kulaŵila na ŵanthu.
22 Ŵanthu amene awo pechimvwa mawu ŵake eyamba kuŵilikija kuti: “Amene aŵa ni mawu a mulungu osati a munthu!”
23 Nthawe yamene iyo mngelo wa Yehova emulwalisha chifukwa aliye lemekeze Mulungu. Ndipo elyewa na vikusi nakufwa.
24 Koma mawu a Yehova epitilija kufalikila ndipo ŵanthu anyinji enkhala okhulupilila.
25 Balanaba na Saulo pechisilija ntchito yopeleka thandizo ku Yelusalemu ejokela. Pakuya etola Yohani, oitiwasoti kuti Maliko.
Malizu a m'nyansi
^ Wamene uyu enze Helode Woyamba.
^ Olo kuti, “Helode enzefuna kuniyatana na.”
^ Olo kuti, enzelolela chipinda choyona cha mfumu.”