Ntchito za atumwi 13:1-52
13 Mumpingo waku Antiokeya mwenze aneneli na aphunzisi. Ove enze Balanaba, Sumiyoni oitiwasoti kuti Nigeli. Lukiyo waku Kulene, Saulo komasoti Manayeni wamene ephunzila pamozi na Helode wotonga chigawo.
2 Lomba ove penzetumikila Yehova komasoti kulekeja kulya, mzimu utuŵa wiŵauja kuti: “Munipatulile Balanaba na Saulo kuti akate ntchito yeniŵaitila.”
3 Pechisilija kulekeja kulya komasoti kupemphela, eŵakata pamutu noŵalola kuti alute.
4 Tetyo ŵanthu amene aŵa amene etumijiwa na mzimu utuŵa, eluta ku Selukeya ndipo kufumila kwamene uko eyenda ulwendo wa pamanzi kuluta ku Kupulo.
5 Pechifwika mu tauni ya Salami eyamba kulalikila mawu a Mulungu mmalo opemphelela ŵa Ayuda. Ove enzesoti na Yohani wamene enzeŵayavya.*
6 Ove eyenda pansuwa yonse ya Kupulo mpaka kuyafwika ku Pafo. Kwamene uko ekumana na Muyuda muyakine wamasenga zina yake Bala-Yesu, wamene enzesoti mneneli wawenye.
7 Wamene uyo enze pamozi na gavana Seligio Paulo, wamene enze munthu wanzelu. Gavana wamene uyu eita Balanaba na Saulo, chifukwa enzefunishisha kumvwa mawu a Mulungu.
8 Koma Elima wamasenga, (niye mwakuimasulilila zina yake yamene iyi) eyamba kushushana nawo. Yove enzeyeja-yeja kuti gavana wamene uyo osati akhulupilile Ambuye.
9 Koma Saulo, oitiwasoti kuti Paulo, pechizujiwa na mzimu utuŵa emuloleshesha
10 nonena kuti: “Wewo wa munthu wozula na chinyengo chantundu uliwonse komasoti vinthu viipa, mwana wa Mdyelekezi komasoti mdani wachinthu chilichonse chachilungamo, kansi uzaleke nthawe yanji kubendesha njila zoyondoloka za Yehova?
11 Lomba mvwaya! Kwanja ya Yehova ili pali wewo ndipo ukwanishelini kulola. Kwa kanthawe katontho, ukwanishelinisoti kuwona kungweleŵela kwa zuŵa.” Nthawe yamene iyo eyamba kuwona fulele wamphamvu mmenso mwake komasoti mfinzi ikulu, ndipo eyamba kusakila ŵanthu akuti amukatilile kwanja nomusogolela.
12 Wala gavana pechiwona vamene ivi, enkhala wokhulupilila, chifukwa edabwa ngako na vechiphunzila vokhuza Yehova.
13 Pavuli pake Paulo na ayake amene awo, eyamba ulwendo wa panyanja kufuma ku Pafo, ndipo echiyafwika ku Pega, ku Pamfuliya. Koma Yohani eŵasiya nojokela ku Yelusalemu.
14 Pechifuma ku Pega echiyafwika ku Antiokeya waku Pisidiya. Kwamene uko echiyaloŵa mmalo opemphelela pa nsiku ya Sondo nonkhala pansi.
15 Chilamulo na vechilemba aneneli peviŵelengewa pamenso pa ŵanthu, asogoleli a mmalo opemphelela etuma munthu kuyaŵauja kuti: “Mwewo akwasu, keno muli na mawu aliwonse amene angalimbikise aŵa ŵanthu, laŵilani.”
16 Tetyo Paulo epanama ndipo eimya kwanja yake nonena kuti:
“Mwewo mwaŵanthu, Aisilaeli, komasoti ayakine monse amene muyopa Mulungu, tetekelani.
17 Mulungu wa aŵa ŵanthu Aisilaeli, esankha makolo ŵasu akale. Ove penzenkhala mu chalo chachilwendo cha Aiguputo, yove eŵachitisha kunkhala ntundu wamphamvu, ndipo eŵafumya mu chalo chamene icho na kwanja yake yamphamvu.
18 Kwa vyaka pafupi-fupi 40, yove epilila nkhalidwe yawo m’chipululu.
19 Ndipo pechiwononga mitundu 7 ya ŵanthu a m’chalo cha Kanani, epeleka chalo chamene icho kuli Aisilaeli kuti chinkhale chuma chawo.
20 Vonse vamene ivi vichitika pafupi-fupi vyaka 450.
Vamene ivi pevisila eŵapasa oweluza mpaka kuzafwika mu nthawe ya mneneli Samueli.
21 Koma pavuli pake ŵanthu amene awo enena kuti tufuna mfumu. Tetyo Mulungu eŵapasa Sauli mwana wa Kisi, munthu wa m’banja ya Benjamini, ndipo enkhala mfumu yawo kwa vyaka 40.
22 Pechimuchosa paufumu wamene uyu, eŵapasa Davite kuti ankhale mfumu yawo. Wamene uyu Mulungu emuchitila umboni kuti, ‘Nafwana Davite mwana wa Jese, munthu wapa ntima pangu. Wamene uyu azachite vonse vanufuna.’
23 Mokatijana na lonjezo yake, kufumila pa mbadwa* za munthu wamene uyu, Mulungu waleta mpulumusi mu Isilaeli, wamene ni Yesu.
24 Mpulumusi wamene uyu akaliyefwika, Yohani elalikila kuli ŵanthu onse aku Isilaeli za ubatizo, monga chizindikilo cha kulapa.
25 Koma Yohani penzesilija utumiki wake, enzenena kuti, ‘kansi muganiza kuti nine ŵani? Wamene uyo wamuganizila ninewolini yayi. Koma pavuli pangu pakuza muyakine, wamene newo nuyenelelalini kumasula nsapato zake.’
26 Mwewo mwaŵanthu, enekwangu, mwewo mbadwa za Abulahamu na ŵanthu onse oyopa Mulungu amene aŵa ŵamulinawo pamozi, mawu achipulumuso chamene ichi atumijiwa kuli sewo.
27 Chifukwa ŵanthu aku Yelusalemu na olamulila ŵawo aliyemuziŵe. Koma penzemuweluza ekwanilisha venzenena aneneli vamene vuŵelengewa mokweja sondo iliyonse.
28 Olo kuti aliyemufwane na chifukwa chomupaila, eyumilila Pilato kuti wamene uyu apaiwe.
29 Lomba pechikwanilisha vinthu vonse vilembewa vokhuza yove, emuselusha pachimuti nomuika mmanda.*
30 Koma Mulungu emuusha.
31 Ndipo kwa masiku anyinji ewonekela kuli ŵanthu amene eyenda naye kufumila ku Galileya kuluta ku Yelusalemu. Palipano amene aŵa ni mboni zake kuli ŵanthu.
32 Tetyo sewo tulalikila uthenga uweme kuli mwewo, unena za vinthu vechilonjezewa makolo ŵasu.
33 Uthenga wamene uyo niwakuti Mulungu wakwanilisha vonse vamene ivo vechiŵalonjeza kuli sewo ŵana ŵawo pousha Yesu, mokatijana na vilembewa mu salimo yachiŵili kuti: ‘Wewo niwe mwana wangu. Lelo newo nankhala atata ŵako.’
34 Ndipo mfundo yakuti yove emuusha ndipo angajokelelinisoti ku muŵili wamene uwola eifotokoza teti: ‘Newo nizakuwonesheni chikondi chokhulupilika mwewo mwaŵanthu chenilonjeza Davite. Lonjezo yamene iyi niyodalilika.’
35 Ndipo salimo iyakine yunenasoti kuti, ‘Muzalolelini kuti muŵili wa wokhulupilika wanu uwole.’
36 Davite echita vakufuna Mulungu pa nthawe ya m’badwo wake, emwalila noikiwa mmanda a makolo ŵake ndipo muŵili wake wiwola.
37 Koma wala wechiusha Mulungu muŵili wake uliyewole.
38 Lomba ziŵani enekwangu kuti, sewo tulalikila kuli mwewo za kukhululukiliwa kwa machimo kupitila muli wamene uyu.
39 Ziŵanisoti kuti pa vinthu vonse vamene venze vosakwanishika kuti muwonewe kunkhala muliye mulandu kupitila mu Chilamulo cha Mose, aliyense wokhulupilila owonewa kuti aliye mulandu kupitila muli yove.
40 Tetyo samalani kuti vechilemba aneneli osati vikuchitikileni vamene vunena kuti:
41 ‘Mwewo onyoza onani vanuchita newo nodabwa navo. Pavuli pake muzasile, chifukwa muzakhulupililelini olo patontho vati nizachite mmasiku ŵanu, olo muyakine azakuujeni momvwika luweme.’”
42 Lomba penzefuma, ŵanthu eŵapapatila kuti azaŵaujesoti nkhani zamene izi Sondo yokonkhapo.
43 Tetyo nsonkhano wa mmalo opemphelela pewisila, Ayuda na ŵanthu anyinji amene eloŵa Chiyuda amene enzelambila Mulungu ekonkhelela Paulo na Balanaba. Ndipo ove euja ŵanthu amene awo kuti apitilije kunkhala oyenelela kulondela kuwama ntima kukulu kwa Mulungu.
44 Sondo yokonkhapo pafupi-fupi tauni yonse iwungana kuti azamvwishile mawu a Yehova.
45 Ayuda pechiwona gulu ya ŵanthu echita nsanje ndipo eyamba kushusha monyoza venzelaŵila Paulo.
46 Tetyo Paulo na Balanaba elaŵila motang’a ntima kuti: “Mwewo mwenzewamila kuyambilila kuujiwa mawu a Mulungu. Koma pakuti muŵakana ndipo muliweluza mweka kuti muwamilalini kulondela moyo wosasila, sewo tikuya kuli ŵanthu amitundu iyakine.
47 Ndipo Yehova watilamula kuti, ‘Nakupasani udindo kuti munkhale kungweleŵela kuli ŵanthu amitundu iyakine, kuti munkhale chipulumuso mpaka kwachulekejela chalo.”
48 Ŵanthu amitundu iyakine amene awo pechimvwa vamene ivi ekondwela ndipo etamanda mawu a Yehova. Ŵanthu onse amene enze na maganizo aweme amene sembe eŵayavya kuyafwana moyo wosasila enkhala okhulupilila.
49 Komasoti, mawu a Yehova epitilija kufalisiwa mu chalo chonse chamene icho.
50 Koma Ayuda euja viipa anakazi otchuka oyopa Mulungu komasoti analume olemekezeka a mu tauni yamene iyo. Tetyo ove echitisha kuti Paulo na Balanaba ayambe kutamanishiwa ndipo eŵaponya kunja kwa tauni yawo.
51 Koma Paulo na Balanaba ekunkhumula lukungu kumendo kwawo kuti unkhale umboni woŵashusha noluta ku Ikoniyo.
52 Ndipo ophunzila amene awo epitilija kunkhala okondwela komasoti mzimu utuŵa wenzeŵayavya ngako.
Malizu a m'nyansi
^ Olo kuti, “enzeŵatumikila.”
^ Mu Chigiliki, “mbewu.”
^ Olo kuti, “mmanda achikumbukilo.”
