Ntchito za atumwi 14:1-28
14 Paulo na Balanaba penze ku Ikoniyo, eloŵa mmalo opemphelela ŵa Ayuda ndipo elaŵila luweme ngako mwakuti Ayuda anyinji pamozi na Agiliki enkhala okhulupilila.
2 Koma Ayuda amene aliye khulupilile euja viipa ŵanthu amitundu iyakine noŵasokoneza maganizo kuti ashushane na akwasu amene awo.
3 Tetyo kwa nthawe itali enzelaŵila motang’a ntima chifukwa cha mphamvu ya Yehova. Yove esimikijila mawu akuwama ntima kwake kukulu polola kuti ophunzila amene awo akochita vizindikilo na vodabwisa.
4 Koma gulu ya ŵanthu a mu tauni yamene iyo iyaŵanika. Ayakine enze kumbali ya Ayuda, ayakine kumbali ya atumwi.
5 Tetyo ŵanthu amitundu iyakine komasoti Ayuda pamozi na olamulila ŵawo, epangana kuti achitile viipa atumwi amene awo noŵatema na myala.
6 Koma ove pechiziŵishiwa vamene ivi ethaŵila ku matauni a Lukaoniya, Lusitala, Debe, na mmadela apafupi.
7 Kwamene uko epitilija kulalikila uthenga uweme.
8 Ku Lusitala kwenze munthu muyakine wolemala mendo ndipo enzenkhale pansi. Yove evyalika wolemala ndipo enze akaliye yendapo.
9 Munthu wamene uyu enzemvwishila Paulo penzelaŵila. Lomba Paulo pechimuloleshesha ewona kuti ali na chikhulupililo chakuti angapojekewe.
10 Tetyo Paulo elaŵila moŵilikija mawu kuti: “Panama!” Pechichita tetyo, wolemala wamene uyo elumpha noyamba kuyenda.
11 Gulu ya ŵanthu peiwona vamene ivo vechichita Paulo, iŵilikija muchilaŵilo cha Chilukaoniya kuti: “Milungu yankhala monga ni ŵanthu ndipo yaselukila kuli sewo!”
12 Tetyo Balanaba eyamba kumuita kuti Zeu, koma Paulo enzemuita kuti Heme, chifukwa niye enzesogolela polaŵila.
13 Lomba wansembe wa Zeu, wamene kachisi wake enzepafupi na poloŵela mu tauni yamene iyo, eleta ng’ombe zinalume na nkhata za maluŵa pamagedi. Ove enzefuna kupeleka nsembe pamozi na gulu yamene iyo ya ŵanthu.
14 Atumwi amene awo Balanaba na Paulo pechimvwa vamene ivi, eng’amba malaya ŵawo akunja noutuka kuyaloŵa mu gulu ya ŵanthu amene ŵala ndipo enzeŵilikija kuti:
15 “Mwewo mwaŵanthu, muchitilanji vamene ivi? Sewosoti nise ŵanthu onkhala na vofoka mongasoti ni mwewo. Tulalikila uthenga uweme kuli mwewo kuti muleke vinthu vatyala-tyala vamene ivi noyamba kulambila Mulungu wamoyo, wamene epanga kululu, chino chalo, nyanja na vonse vunkhala mwamene umo.
16 M’mibadwo yakuvuli uku yove elola kuti ŵanthu amitundu yonse akoyenda mu njila zawo.
17 Koma olo n’tetyo, sikuti yove echingonkhala aliye umboni wakuti echita viweme. Ekupasani mvula kufumila kululu komasoti nthawe yamene voweja vanu vikuŵa vinyinji. Ezuja mitima yanu na chakulya komasoti chisangalalo.”
18 Olo kuti atumwi amene aŵa enena vamene ivi, evutika mphela kulesha gulu yamene iyo ya ŵanthu kupeleka nsembe kuli ove.
19 Lomba Ayuda amene ewela kufumila ku Antiokeya na ku Ikoniyo enyengelela ŵanthu amene awo. Tetyo etema Paulo na myala nomukwekweshela kunja kwa tauni yamene iyo poganiza kuti wafwa.
20 Koma ophunzila pechimuzenguluka, eluta kuyaloŵa mu tauni. Nsiku yokonkhapo yove pamozi na Balanaba efumako noluta ku Debe.
21 Pechilalikila uthenga uweme mu tauni yamene iyi nophunzisa ŵanthu anyinji kuti ankhale ophunzila, ejokela ku Lusitala, ku Ikoniyo na ku Antiokeya.
22 Mmalo onse amene aŵa enzetang’isha ophunzila komasoti kuŵayavya kuti apitilije kunkhala na chikhulupililo. Enzeŵauja kuti: “Tufunikila kukumana na mavuto anyinji kuti tikaloŵe mu Ufumu wa Mulungu.”
23 Esankhasoti akulu mu mpingo uliwonse, ndipo pechipemphela komasoti kulekeja kulya, eŵapeleka kwa Yehova wamene emukhulupilila.
24 Pavuli pake epita na ku Pisidiya noluta ku Pamfuliya.
25 Pechisilija kulalikila mawu a Mulungu ku Pega, eluta ku Ataliya.
26 Pofuma kwamene uko, eyenda ulwendo wa pamanzi kujokela ku Antiokeya. Kwamene uku niye kwechisankhiwa akwasu kuvuli uku, kuti Mulungu aŵawoneshe kuwama ntima kukulu na cholinga chakuti akate ntchito, yamene pa nthawe yamene iyi lomba enze eisilija.
27 Pechifwika kwamene uko eunganija ŵanthu a mumpingo ndipo eŵauja vinthu vinyinji vechichita Mulungu kupitila muli ove. Eŵaujasoti kuti Mulungu epelekasoti mwayi kuti ŵanthu amitundu iyakine ankhale okhulupilila.
28 Tetyo enkhala na ophunzila amene awo kwa nthawe ikuluko patontho.