Ntchito za atumwi 15:1-41
15 Tetyo analume ayakine ofumila ku Yudeya eyamba kuphunzisa akwasu kuti: “Mukaleka kuchitiwa mdulidwe mokatijana na mwambo wa Mose, mungapulumukelini.
2 Koma Paulo na Balanaba aliyekatijane navo ndipo eshushana nawo. Tetyo ove esankha Paulo, Balanaba komasoti ŵanthu ayakine kuti alute kuli atumwi na kuli akulu ku Yelusalemu kuyaŵauja za nkhani yamene iyi.
3 Mpingo pewiŵapelekeja, ŵanthu amene aŵa epitilija ulwendo wawo kupitila ku Foinike na ku Samaliya. Kwamene uko enzefotokoza momvwika luweme vakuti ŵanthu amitundu iyakine ayamba kulambila Mulungu ndipo akwasu onse ekondwela ngako na vamene ivi.
4 Pechifwika ku Yelusalemu elondelewa na manja aŵili na mpingo, atumwi komasoti akulu. Ndipo efotokoza vinthu vinyinji vechichita Mulungu kupitila muli ove.
5 Koma okhulupilila ayakine, amene poyamba enze mu gulu yampatuko ya Afalisi, epanama mmipando yawo nonena kuti: “Ofunika kuchitiwa mdulidwe komasoti kuŵalamula kuti akosunga Chilamulo cha Mose.”
6 Tetyo atumwi na akulu eungana kuti akambilane za nkhani yamene iyi.
7 Pechishushana ngako za nkhani yamene iyi, Petulo epanama noŵauja kuti: “Enekwangu, mwewo muziŵa luweme kuti mmasiku oyambilila Mulungu enisankha pakati panu, kuti kupitila pakamwa pangu ŵanthu amitundu iyakine amvwe mawu a uthenga uweme nokhulupilila.
8 Ndipo Mulungu wamene oziŵa va mu ntima echitila umboni poŵapasa mzimu utuŵa monga ni mwechichitilasoti kuli sewo.
9 Yove aliye siyanishe olo patontho pakati pa sewo na ove. Koma etuŵisha mitima yawo chifukwa cha chikhulupililo chawo.
10 Lomba ndaŵa yanji mwewo muyesa Mulungu potakulisha ophunzila djoko yamene makolo ŵasu olosoti sewo tingakwanishelini kuitakula?
11 Koma lomba tukhulupilila kuti sewo tizapulumuke chifukwa cha kuwama ntima kukulu kwa Ambuye Yesu, molinganasoti na ŵanthu amene aŵa.”
12 Pevichitika tetyo gulu yonse yamene iyo inkhala chelele, ndipo iyamba kumvwishila Balanaba na Paulo penzefotokoza vizindikilo na vodabwisa vinyinji vechichita Mulungu pakati pa ŵanthu amitundu iyakine kupitila muli ove.
13 Pechisilija kulaŵila, Yakobo eyankha kuti: “Akwasu, nimvwishileni.
14 Sumiyoni wafotokoza luweme mwechichitila Mulungu pocheukila ŵanthu amitundu iyakine pa nthawe yoyamba, kuti pakati pawo atolepo ŵanthu oziŵika na zina yake.
15 Ndipo vamene ivi vukatijana na vechilemba aneneli kuti:
16 ‘Vamene ivi vikazasila nizajokele nomangasoti tenti* ya Davite yamene ipona. Nizamangesoti malo ogumuka a ng’anda yamene iyo noiwamyasoti.
17 Nizachite vamene ivi kuti ŵanthu amene awo asala, asakile-sakile Yehova na ntima wonse amusakile-sakile pamozi na mitundu yonse ya ŵanthu, ŵanthu oitiwa na zina yangu, wanena tetyo Yehova wamene ochita vinthu vamene ivi,
18 vechisimikija kale-kale kuti azavichite.’
19 Tetyo maganizo ŵangu ni akuti, ŵanthu amitundu iyakine amene ayamba kulambila Mulungu, osati tiŵatamanishe.
20 Koma tiyeni tiŵalembele kuti apewe vinthu voipishiwa na mafano, chiwelewele,* vosakhesa* komasoti milopa.
21 Chifukwa kufumila kale ŵanthu ankhala olalikila mu tauni na tauni mawu ofumila mmabuku a Mose, pakuti mabuku amene aŵa oŵelengewa moŵilikija mmalo opemphelela sondo iliyonse.”
22 Pavuli pake atumwi na akulu pamozi na mpingo wonse, ekatijana kuti asankhe analume pakati pawo, kuti aŵatumije ku Antiyokeya pamozi na Paulo na Balanaba. Tetyo esankha Yudasi oitiwa kuti Balasaba na Sila, amene enzesogolela akwasu.
23 Tetyo elemba kalata noŵapasila yonena kuti:
“Sewo enekwanu atumwi pamozi na akulu, tulembela mwewo akwasu ofumila mmitundu iyakine, amene muli ku Antiyokeya, ku Siliya na ku Kilikiya: Londelani moni!
24 Tamvwa kuti ayakine ofumila pakati pasu ankhala okutamanishani polaŵila vinthu vokusokonezani olo kuti sewo tiliye ŵapase malangizo aliwonse.
25 Tetyo tonse takatijana kuti tisankhe analume noŵatumija pamozi na akwasu apantima, Balanaba na Paulo.
26 Ŵanthu amene aŵa apeleka miyoyo yawo chifukwa cha zina ya Ambuye wasu Yesu Khilisitu.
27 Tutumija Yudasi na Sila, kuti ovesoti azakufotokozeleni vinthu vamene ivi na mawu a pakamwa.
28 Chifukwa mzimu utuŵa komasoti sewo tawona kuti vingankhale luweme kuti osati tikutwikeni ntolo wolema kupatulapo tyala vinthu vofunika veka vamene ni
29 kupitilija kupewa vinthu vupelekewa nsembe ku mafano, milopa, vinthu vosakhesa* na chiwelewele*. Keno mupewa vinthu vamene ivi mosamala ngako, vinthu vizakuyendeleni luweme. Tukufunilani viweme vonse!”
30 Analume amene aŵa pechinyamuka eluta ku Antiyokeya. Kwamene uko eunganija gulu yonse ya ŵanthu noŵapasa kalata yamene iyo.
31 Pechiiŵelenga, ekondwela ngako chifuwa cha mawu amene awo otang’isha.
32 Pakuti Yudasi na Sila enzesoti aneneli, elaŵilila akwasu amene awo nkhani zinyinji ndipo eŵatang’isha.
33 Pechinkhala kwamene uko kwa nthawe itontho, akwasu amene awo eŵapelekeja ndipo ejokela mwa ntendele kuli ŵala amene eŵatuma.
34 ——
35 Koma Paulo na Balanaba esala ku Antiyokeya. Ove pamozi na ŵanthu ayakinesoti anyinji enzephunzisa komasoti kulalikila uthenga uweme wa mawu a Yehova.
36 Papita masiku, Paulo euja Balanaba kuti: “Tiyeni tijokele ku matauni onse kwetilalikila mawu a Yehova kuti tikatandaje akwasu komasoti tikaŵaone kuti ali tyani.”
37 Balanaba enzefunishisha kuti alute na Yohani, oitiwasoti kuti Maliko.
38 Koma Paulo ewona kuti vingankhalelini luweme kuluta naye chifukwa ulwendo uyakine Yohani eŵasiya ku Pamfuliya ndipo aliyelute nawo ku ntchito yamene iyi.
39 Pevichitika tetyo ekangana ngako mpaka epatukana. Balanaba etola Maliko ndipo eyenda ulwendo wa pamanzi kuluta ku Kupulo.
40 Koma Paulo esankha Sila, ndipo akwasu pechimupemphelela Paulo wamene uyo kuti Yehova amuwoneshe kuwama ntima kukulu, enyamuka.
41 Yove epitila na ku Siliya komasoti ku Kilikiya ndipo enzetang’isha mipingo.
Malizu a m'nyansi
^ Olo kuti, “msasa; ng’anda.”
^ Mu Chigiliki por·nei′a. Onani matanthauzo a mawu ayakine.
^ Olo kuti, “nyama yamene yapaiwa osaikhesa kuti milopa ifume.”
^ Olo kuti, “nyama yamene yapaiwa osaikhesa kuti milopa ifume.”
^ Mu Chigiliki por·nei′a. Onani matanthauzo a mawu ayakine.