Ntchito za atumwi 16:1-40
16 Pavuli pake Paulo efwika ku Debe komasoti ku Lusitala. Kwamene uko kwenze wophunzila muyakine zina yake Timoteyo, mwana wa mwanakazi wa Chiyuda wokhulupilila, koma atata ŵake enze Mugiliki.
2 Akwasu aku Lusitala naku Ikoniyo epeleka umboni uweme wonena vokhuza yove.
3 Paulo ewonesha kuti ofuna alute naye pa ulwendo wake. Tetyo emutola nomuchita mdulidwe chifukwa cha Ayuda amene enze kwamene uko, pakuti onse enzeziŵa kuti atata ŵake ni Mugiliki.
4 Mmatauni onse ŵenzepita, enzepeleka malamulo ofunikila kuŵakonkheja kuli okhulupilila akwamene uko, mokatijana na vechilamula atumwi komasoti akulu aku Yelusalemu.
5 Tetyo ŵanthu a mmipingo epitilija kunkhala na chikhulupililo chotang’a ndipo chiŵelengelo chenzeyangijilika nsiku iliyonse.
6 Pavuli pake ove eluta ku Fulugiya komasoti mu chalo cha Galantiya chifukwa mzimu utuŵa wiŵalesha kulaŵila mawu a Mulungu mu chigawo cha Asia.
7 Pechifwika ku Musiya eyeja-yeja kuti alute ku Bituniya, koma mzimu wa Yesu uliyeŵalole.
8 Tetyo echingopitilila ku Musiya na kuyafwika ku Tolowa.
9 Lomba usiku Paulo ewona mensomphenya. Ewona munthu muyakine waku Makedoniya alipaname nomuuja kuti: “Taukilani kuno ku Makedoniya muzatiyavye.”
10 Pechingowona mensomphenya amene awo, tiganiza zoluta ku Makedoniya. Tisimikijila kuti Mulungu watiita kuti tikalalikile uthenga uweme kuli ŵanthu akwamene uko.
11 Tetyo tinyamuka ulwendo wapa nyanja kufumila ku Tolowa kuluta ku Samatilake. Koma nsiku yokonkhapo tifwika ku Neapoli.
12 Petifuma kwamene uko tifwika ku Filipi, tauni yutongewa na Aloma, yamenesoti ni likulu ya chigawo cha Makedoniya. Tinkhala mu tauni yamene iyi kwa masiku atontho.
13 Nsiku ya sondo tifuma pagedi noluta mmbali mwa mmana kwamene tenzeganiza kuti kuli malo opemphelela. Pavuli pake tinkhala pansi noyamba kulaŵila na anakazi amene enze eungana kwamene uko.
14 Pa gulu yamene iyo penze mwanakazi muyakine zina yake Lidiya ndipo enzelambila Mulungu. Yove enzefumila mu tauni ya Tiyatila ndipo enzegulisa nyula na vovwala visweta-visweta. Penzemvwishila, Yehova esegula ngako ntima wake kuti amvwishe venzelaŵila Paulo.
15 Yove na ŵanthu a m’banja mwake pechibatiziwa etisenga kuti: “Akwasu keno mwawona kuti nine wokhulupilika kwa Yehova, tiyeni mukankhale kwasu.” Mwakuti etitola kuti tilute kwawo.
16 Lomba petenzepita ku malo opemphelela, tikumana na msimbi muyakine wantchito ali na mzimu, chiŵanda chulosela vakusogolo. Yove enzechitisha kuti mabwana ŵake akopindula ngako chifukwa cha volosela vamene ivo.
17 Msimbi wamene uyo enzengokonkhelela Paulo na sewo noŵilikija kuti: “Ŵanthu aŵa ni akapolo a Mulungu Wakululu Ngako ndipo olalikila njila yachipulumuso kuli mwewo.”
18 Yove echita vamene ivi kwa masiku anyinji. Pavuli pake Paulo eŵeŵa navo ndipo echunguluka nouja mzimu wamene uyo kuti: “Nukulamula mu zina ya Yesu Khilisitu kuti ufume muli msimbi wamene uyu.” Nthawe yamene iyo mzimu wamene uyo wifuma.
19 Koma ŵala mabwana ŵake pechiwona kuti apindulelinisoti, ekata Paulo na Sila noluta nawo mmaketi ku malo a wotonga.
20 Pechifwika nawo kuli akulu-akulu a malamulo, enena kuti: “Ŵanthu aŵa osokoneza ngako mu tauni yasu komasoti ove ni Ayuda.
21 Ndipo ofalisa miyambo yamene niyosaloleka kuli sewo kuikonkheja olo kuichita, pakuti nise Aloma.”
22 Pavuli pake gulu yonse yamene iyo inyamuka noukila atumwi amene awo. Ndipo akulu-akulu amene awo a malamulo, evula atumwi amene awo malaya ŵawo mochita kuŵakezulila nolamula kuti aŵaniyate na vikoti.
23 Pechiŵakwapula vikoti vinyinji, eŵaika mu djeli nolamula wololela djeli kuti akoŵalolela na cholinga chakuti osati athaŵe.
24 Pakuti emulamula vamene ivi, yove eŵaika m’chipinda cha nkati cha djeli yamene iyo nomanga mendo ŵawo mu goli.
25 Koma cha pakati pa usiku, Paulo na Sila eyamba kupemphela komasoti kutamanda Mulungu poimba nyimbo mwakuti a djeli ayakine enzeŵamvwa.
26 Mwazizizi pechitika chivomezi champhamvu, mpaka fandeshoni ya djeli yamene iyo inyang’anya. Nthawe yamene iyo viseko vonse viseguka ndipo aliyense matcheni ŵake emasuka.
27 Wololela djeli wala pechiuka nowona viseko va djeli viliseguke, esolola chibemba chake kuti alipaye, poganiza kuti a djeli amene awo athaŵa.
28 Koma Paulo eŵilikija kuti: “Osalipaya tonse tilipo!”
29 Yove esenga kuti amupase laiti ndipo eloŵa nkati mwamene umo mokulumija. Tetyo egwada pasogolo pa Paulo na Sila otutumila na wowa.
30 Tetyo eŵafumya kunja nonena kuti: “Mabwana, kansi ningachite chinji kuti nipulumuke?”
31 Ove enena kuti: “Khulupilila Ambuye Yesu ndipo uzapulumuke pamozi na ŵanthu a m’nga’anda yako.”
32 Pavuli pake elaŵila mawu a Yehova kuli yove pamozi na onse a m’ng’anda yake.
33 Usiku wamene uyo, eŵatola noŵasuka vilonda vawo. Pakaliye pita nthawe ikulu, yove na ŵanthu onse a m’ng’anda yake ebatiziwa.
34 Pavuli pake eluta nawo ku ng’anda kwake noŵaikila chakulya pa thebo. Ndipo yove na a m’banja mwake ekondwela ngako chifukwa ekhulupilila Mulungu.
35 Kwacha mmawa, akulu-akulu a malamulo etumija masodja kuyanena kuti: “Ŵanthu amene awo muŵamasule.”
36 Tetyo wololela djeli wala euja Paulo uthenga wamene uyo kuti: “Akulu-akulu a malamulo atumija ŵanthu kuzanena kuti mwewo mwaŵili mumasuliwe. Tetyo fumani lomba ndipo mulute mwa ntendele.”
37 Koma Paulo eŵauja kuti: “Ove atiniyata pamenso pa ŵanthu notiika mu djeli paliye kutitonga mulandu, koma sewo nise Aloma. Kansi lomba otifumya mwachisinsi? Yayi. Vamene ivo vikwanishikelini! Awele ove anecho azatifumye ŵeka.”
38 Lomba masodja amene awo eluta kuyalaŵila vamene ivi kuli ŵala akulu-akulu a malamulo. Akulu-akulu a malamulo amene awo echita wowa pechimvwa kuti ŵanthu amene awo ni Aloma.
39 Tetyo akulu-akulu amene awo ewela noŵapapatila, ndipo pechiŵafumya eŵasenga kuti afume mu tauni yamene iyo.
40 Koma ove pechifuma mu djeli mwamene umo eluta ku ng’anda kwa Lidiya. Pechiwona akwasu eŵatang’isha, pavuli pake enyamuka noluta.
