Ntchito za atumwi 17:1-34
17 Pavuli pake, ove eyenda kupitila ku Amfipoli na ku Apoloniya ndipo efwika ku Tesalonika, kwamene kwenze malo opemphelela ŵa Ayuda.
2 Tetyo mwachiyoloŵezi chake, Paulo eloŵa mmalo opemphelela mwamene umo ndipo kwa masondo atatu ekambilana nawo mfundo za m’Malemba.
3 Yove enzefotokoza komasoti kuwonesha umboni wolembewa poŵasimikijila kuti venze vofunikila kuti Khilisitu atamane, pavuli pake auke. Enzenena kuti: “Yesu wanulalikila kuli mwewo niye Khilisitu.”
4 Posilijila pake ayakine mwa ove enkhala okhulupilila ndipo ekatijana na Paulo na Sila. Agiliki anyinji olambila Mulungu komasoti anakazi anyinji olemekezeka echitasoti chimozi-mozi.
5 Koma Ayuda echita nsanje ndipo eunganija ŵanthu ayakine aipa amene enzengonkhala mmaketi. Ove epanga gulu ya chiwawa noyambisha nsokonezo mutauni yamene iyo. Pavuli pake eluta kung’anda ya Yasoni, kuyasakila Paulo na Sila kuti aŵafumye noŵatwala mugulu ya ŵanthu amene awo amene enzechita nsokonezo.
6 Pechikangiwa kuŵafwana, ekata Yasoni na akwasu ayakine noluta nawo kuli olamulila a tauni yamene iyo, oŵilikija kuti: “Aŵa ŵanthu amene ayambisha mavuto kuyakine konse, lomba opezekasoti kuno.
7 Ndipo Yasoni waŵalondela monga alwendo ŵake. Ŵanthu onse amene aŵa ochita vinthu voshushana na malamulo a Kaisala. Amwewo, onena kuti kulisoti mfumu iyakine zina yake Yesu.
8 Pechilaŵila mawu amene aŵa, gulu yala ya ŵanthu komasoti olamulila a mutauni yamene iyo ekalipa ngako.
9 Olamulila a tauni yamene iyo elipilisha Yasoni na ayake ndalama, pavuli pake eŵamasula.
10 Pekwifipa, akwasu efumya Paulo na Sila noŵatumija ku Beleya. Ove pechifwika kwamene uko, eloŵa mmalo opemphelela ŵa Ayuda.
11 Koma ŵanthu aku Beleya enze na ntima wofuna kuphunzila kupambana ŵala aku Tesalonika. Ove elondela mawu a Mulungu mwa chidwi ngako, ndipo nsiku iliyonse enzesakila Malemba mosamala kuti asimikijile keno vamene ivo vechimvwa venze vachendi.
12 Anyinji a ŵanthu amene aŵa enkhala okhulupilila, chimozi-mozisoti anakazi komasoti analume otchuka a Chigiliki.
13 Koma Ayuda ofumila ku Tesalonika pechimvwa kuti Paulo olalikilasoti mawu a Mulungu ku Beleya, elutasoti kwamene uko kuyachitisha ŵanthu kuti akalipile atumwi amene awo noyambisha nsokonezo.
14 Nthawe yamene iyo akwasu etumija Paulo kuti alute ku nyanja. Koma Timoteyo na Sila esala kwamene uko.
15 Ndipo ŵanthu amene epelekeja Paulo emufwisha ku Atene. Koma ejokela pechitumiwa kuti akauje Timoteyo na Sila kuti akonkhe Paulo wamene uyo mokulumija.
16 Paulo penzeŵayembekezela ku Atene, ntima wemuŵaŵa ngako powona kuti mutauni yamene iyo mulizule mafano.
17 Pechiloŵa mmalo opemphelela eyamba kukambilana na Ayuda komasoti ŵanthu ayakine olambila Mulungu. Ndipo nsiku iliyonse enzekambilanasoti na ŵanthu amene enzeŵafwana pa maketi.
18 Koma ŵanthu ayakine anzelu za Epikuleya na Sitoiki eyamba kushushana naye. Ayakine enzenena kuti: “Kansi nayesoti uyu obwetuka ofuna kulaŵila chinji?” Koma ayakine enzenena kuti: “Owoneka kuti olalikila za milungu ya chilwendo.” Enzenena vamene ivi chifukwa chakuti Paulo enzelalikila uthenga uweme wa Yesu na wokhuza kuuka kwa akufwa.
19 Tetyo emukata noluta naye ku malo ŵa Aleopagi nomukonsha kuti: “Kansi tingaziŵeko za chiphunziso chanyowani chamene ichi chauphunzisa?
20 Chifukwa vinthu vaulaŵila vamene ivi ni vachilwendo mmatu mwasu. Lomba tufuna tiziŵe tanthauzo yake.”
21 Ndipo ŵanthu onse aku Atene komasoti alwendo amene enzenkhala kwamene uko, enzesila nthawe yawo yonse yopumula polaŵila komasoti kumvwishila nkhani zanyowani.
22 Lomba Paulo epanama pakati pa malo ŵa Aleopagi nonena kuti:
“Mwewo ŵanthu aku Atene, nawona kuti pa vinthu vonse muyopa ngako milungu* kupambana mwakuchitila ayakine.
23 Mwachisanzo, penenzepita nololeshesha vinthu vamulambila, nafwanasoti guwa ya nsembe yolembewa kuti, ‘Kwa Mulungu wosaziŵika.’ Tetyo newo nulalikila kuli mwewo vokhuza Mulungu wamene uyo wosaziŵika wamulambila.
24 Mulungu wamene epanga ichi chalo na vinthu vonse vilimo, onkhalalini mu akachisi opangiwa na manja. Yove niye Ambuye akululu na chino chalo.
25 Komasoti otumikiliwalini na manja a ŵanthu monga kuti osoŵa kanthu, chifukwa yove niye opasa ŵanthu onse moyo, umphuye na vinthu vonse.
26 Ndipo kufumila muli munthu mmozi epanga mitundu yonse ya ŵanthu, kuti ankhale pa chalo chonse. Yove eika nthawe kuti vinthu viyakine vikochitika komasoti eika malile a malo ŵakuti akonkhala ŵanthu.
27 Echita vamene ivi kuti ŵanthu amene awo asakile Mulungu, amusakile-sakile nomufwana chendi, olo kuti ngako-ngako, yove alilini kutali na aliyense wa sewo.
28 Pala chifukwa cha yove tili na moyo, tuyenda ndipo tilipo, monga ni mwechilaŵilila andakatulo ŵanu ayakine kuti, ‘Pala nise ŵana ŵake.’*
29 Tetyo, pakuti nise ŵana a Mulungu, osati tiganize kuti Mulungu wamene uyo ali monga ni golide, nsimbi, mwala olo chinthu chilichonse choŵaziwa na ŵanthu aluso.
30 N’chendi kuti Mulungu elekelela pa nthawe yamene ŵanthu enzeziŵalini vinthu, koma lomba ouja ŵanthu ku malo aliwonse kuti onse alape.
31 Chifukwa walinganija nsiku yakufuna kuzaweluza chalo chonse mwachilungamo, kupitila muli munthu wechisankha. Ndipo wasimikijila ŵanthu onse vamene ivi pomuusha.”
32 Lomba ŵanthu amene awo pechimvwa vokhuza kuuka kwa akufwa, ayakine eyamba kuseka monyoza, pamene ayakine enena kuti: “Chabwino, uzatiujesoti vamene ivi nthawe iyakine.”
33 Tetyo Paulo eŵasiya.
34 Koma ŵanthu ayakine enkhala kumbali yake ndipo enkhala ophunzila a Yesu. Ayakine a ove enze Diyoniziyo, woweluza mmalo ŵa Aleopagi, mwanakazi muyakine zina yake Damalisi komasoti ŵanthu ayakine.
