Ntchito za atumwi 18:1-28
18 Pavuli pake Paulo efumako ku Atene noluta ku Kolinto.
2 Kwamene uko efwana Muyuda muyakine zina yake Akula, waku Ponto. Yove pamozi na mwanakazi wake Pulisila, enze echingofwika kwalombapano kufumila ku Italiya, chifukwa Kalaudiyo enze elamula Ayuda onse kuti afumeko ku Loma. Tetyo Paulo eluta ku ng’anda kwawo.
3 Pakuti ntchito yawo yenze imozi na imozi, enkhala ku ng’anda kwawo kwamene uko. Ove enzekatila ntchito pamozi, chifukwa onse enzepanga matenti.
4 Paulo enzelaŵila nkhani mmalo opemphelela nsiku iliyonse ya sondo ndipo enzekopa Ayuda na Agiliki.
5 Timoteyo na Sila pechifwika kufumila ku Makedoniya, Paulo enze bize ngako na ntchito yolalikila mawu a Mulungu. Yove enzechitila umboni kuli Ayuda komasoti kuŵasimikijila kuti Yesu niye chendi Khilisitu.
6 Koma ove epitilija kumushusha komasoti kumunyoza, yove ekunkhumula vovwala vake noŵauja kuti: “Milopa yanu inkhale pamutu panu. Newo niliye mulandu. Kufumila lomba nikoluta kuli ŵanthu amitundu iyakine.”
7 Pevichitika tetyo, yove efumako kwamene uko* noluta ku ng’anda kwa munthu muyakine zina yake Titiyo Yusito. Munthu wamene uyu enzelambila Mulungu ndipo ng’anda yake yenze pafupi na malo opemphelela.
8 Kilisipo nsogoleli wa malo opemphelela, ekhulupilila Ambuye pamozi na ŵanthu onse a m’banja mwake. Ndipo ŵanthu anyinji a ku Kolinto, amene echimvwa uthenga uweme eyamba kukhulupilila nobatiziwa.
9 Komasoti usiku, Ambuye euja Paulo mmensomphenya kuti: “Osayopa, pitilija kulaŵila. Osati unkhale chelele,
10 chifukwa newo nili nawe. Paliye munthu akuti azakukumye nokuwononga, pakuti nili na ŵanthu anyinji mu tauni yamene iyi.”
11 Tetyo enkhala kwamene uko kwa chaka chimozi na myezi 6, oŵaphunzisa mawu a Mulungu.
12 Galiyo penze gavana* wa Akaya, Ayuda enyamuka mokatijana noukila Paulo ndipo eluta naye ku mpando wotongela milandu.
13 Kwamene uko ove enena kuti: “Munthu wamene uyu okopa ŵanthu kuti akolambila Mulungu munjila yosiyana na chilamulo.”
14 Koma Paulo penzefuna kuyamba kulaŵila, Galiyo euja Ayuda amene awo kuti: “Mwewo Ayuda, sembe kuti ni chophoniya chiyakine olo mulandu ukulu, shuwa sembe naleza ntima nokumvwishilani.
15 Koma keno nkhani yake niyokhuza kukangana pa mawu, mazina na chilamulo chanu, vamene ivo musilijane navo mweka. Newo nufunalini kuti ninkhale wotonga nkhani zoteti.”
16 Pevichitika tetyo, eŵauja kuti afumeko ku mpando wamene uyo wotongela milandu.
17 Pavuli pake, onse ekata Sositene, nsogoleli wa malo opemphelela noyamba kumuniyata pafupi na mpando wamene uyo wotongela milandu. Koma vamene ivi viliye mukhuze Galiyo olo patontho.
18 Paulo pechinkhala kwamene uko kwa masiku anyinji, elailana na akwasu amene awo ndipo epitilija ulwendo wake wa pamanzi kuluta ku Siliya. Pa ulwendo wamene uyu eluta pamozi na Pulisila na Akula. Paulo egela sisi yake ku Kenkeleya chifukwa cha lonjezo yechichita.
19 Tetyo onse efwika ku Ifenso ndipo ayake amene awo, eŵasiya kwamene uko. Koma yove yeka eloŵa mmalo opemphelela noyamba kukambilana na Ayuda.
20 Olo kuti emusenga moweleja-weleja kuti ankhale nawo, kwa masiku anyinji, yove aliyelole.
21 Mmalo mwake, elailana nawo noŵauja kuti: “Yehova akalola nizawelesoti kuzakuwonani.” Tetyo enyamuka ku Ifenso ulwendo wa panyanja
22 ndipo efwika ku Kaisaleya. Tetyo eluta* kuyapeleka moni ku mpingo ndipo pavuli pake eluta ku Antiyokeya.
23 Pechinkhala kwamene uko kwa nthawe itontho, enyamuka noyamba kuyenda malo osiyana-siyana mu dela ya Galantiya na Fulugiya ndipo enzetang’isha ophunzila onse.
24 Lomba Muyuda muyakine zina yake Apolo, waku Alekizandiliya wamene enzelaŵila mwaluso efwika ku Ifenso. Yove wamene uyu enzeŵaziŵa luweme Malemba.
25 Mwanalume wamene uyu ephunzisiwa* njila ya Yehova. Yove enze wolipeleka ngako chifukwa chakuti enze na mzimu utuŵa, ndipo enzelaŵila komasoti kuphunzisa momvwika luweme vokhuza Yesu. Koma enzeziŵa tyala za ubatizo wa Yohani weka.
26 Munthu wamene uyu eyamba kulaŵila motang’a ntima mmalo opemphelela. Lomba Pulisila na Akula pechimumvwishila, emutola nomufotokozela njila ya Mulungu momvwika luweme.
27 Komasoti, pakuti enzefunishisha kuluta ku Akaya, akwasu amene awo elembela kalata ophunzila akwamene uko. Eŵalimbikisa kuti amulondele na manja aŵili. Tetyo yove pechifwika kwamene uko, eyavya ngako ŵanthu amene enze ekhulupilila chifukwa cha kuwama ntima kukulu kwa Mulungu.
28 Chifukwa yove eŵasimikijila Ayuda patuŵa komasoti mwamphamvu kuti ove enze ophoniya, ndipo ekatishila ntchito Malemba powonesha kuti Yesu niye chendi Khilisitu.
Malizu a m'nyansi
^ Kutanthauza malo opemphelela.
^ Gavana wachigawo cha Loma. Onani matanthauzo a mawu ayakine.
^ Vuwoneka kuti eluta ku Yelusalemu.
^ Olo kuti, “elangiziwa na mawu apakamwa.”
