Ntchito za atumwi 19:1-41
19 Nthawe iyakine Apolo penze ku Kolinto, Paulo epitila kumadela aku ntunthu mpaka efwika ku Ifenso. Kwamene uko efwanako ophunzila ayakine,
2 ndipo eŵakonsha kuti: “Kansi mwilondela mzimu utuŵa pemwinkhala okhulupilila?” Ove emuyankha kuti: “Sewo tikaliye mvwapo kuti kuli mzimu utuŵa.”
3 Yove eŵakonshasoti kuti: “Lomba kansi mwibatiziwa ubatizo wa ntundu wanji?” Ove eyankha kuti: “Tibatiziwa ubatizo wa Yohani.”
4 Pavuli pake Paulo enena kuti: “Ubatizo wenzebatiza ŵanthu Yohani chenze chizindikilo chakuti munthu walapa. Yove enzeuja ŵanthu kuti akhulupilile wamene akuza mvuli mwake, kutanthauza Yesu.”
5 Pechimvwa vamene ivi, ŵanthu amene awo ebatiziwa mu zina ya Ambuye Yesu.
6 Lomba Paulo pechiŵakata pamutu, ove elondela mzimu utuŵa ndipo eyamba kulaŵila vilaŵilo vosiyana-siyana komasoti kulaŵila vinthu vakusogolo.
7 Onse pamozi enze analume pafupi-fupi 12.
8 Kwa miyezi itatu, Paulo enzeluta ku malo opemphelela kwamene enzelaŵila motang’a ntima. Kwamene uko enzelaŵila nkhani komasoti kuŵafotokozela mfundo zokata ntima zokhuza Ufumu wa Mulungu.
9 Koma ayakine epitilija kuchita nthota komasoti enzekhulupililalini ndipo enzenena vonyoza Njila yamene iyo pamenso pa ŵanthu anyinji. Tetyo yove efumapo nofumyaposoti ophunzila amene awo pakati pawo. Ndipo nsiku iliyonse enzelaŵila nkhani m’ng’anda pa sikulu ya Tulano.
10 Vamene ivi vichitika kwa vyaka viŵili, mwakuti ŵanthu onse onkhala mu chigawo cha Asia, Ayuda na Agiliki kumo echimvwa mawu ŵa Ambuye.
11 Mulungu epitilija kuchita vinthu vamphamvu komasoti vodabwisa kupitila muli Paulo.
12 Mwakuti ŵanthu enzetola olo tunyula na vovwala vamene vakumya muŵili wa Paulo noluta navo kuli olwala ndipo matenda ŵawo enzesililatu. Nayosoti mizimu iipa yenzefuma.
13 Koma Ayuda ayakine amene enzeyenda-yenda nofumya viŵanda, eyeja kutomola zina ya Ambuye Yesu pofuna kupojeka ŵanthu amene enze na mizimu iipa. Ove enzenena kuti: “Nukulamula mu zina ya Yesu wakulalikila Paulo.”
14 Penze ŵana analume 7 a Sikeva, wansembe nkulu wa Chiyuda, amene enzechita vamene ivi.
15 Koma mzimu uipa wiŵayankha kuti: “Newo numuziŵa Yesu ndipo Paulo numuziŵasoti luweme. Lomba mwewo nimwe ŵani?”
16 Pavuli pake munthu wala wamene enze na mzimu uipa eŵanyomokela. Elimbana nawo mmozi-mozi mpaka eŵagonjesa onse amene awo mwakuti efuma m’ng’anda mwamene umo nothaŵa ali chinthaku komasoti ali chitiwe-chitiwe.
17 Ŵanthu onse Ayuda na Agiliki amene enzenkhala ku Ifenso eziŵa vamene ivi. Tetyo onse echita wowa ndipo zina ya Ambuye Yesu ipitilija kulemekezewa.
18 Ŵanthu anyinji amene enkhala okhulupilila enzewela kuzaulula machimo ŵawo komasoti kufotokoza patuŵa viipa venzechita.
19 Ŵanthu anyinji amene enzechita vamasenga eunganija mabuku ŵawo noŵashoka pamenso pa ŵanthu onse. Ndipo pechiŵelenga efwana kuti ntengo wake wenzekwana ndalama 50.000 za nsimbi.
20 Tetyo mawu a Yehova epitilija kufalikila ndipo enzegonjesewalini.
21 Pevichitika vamene ivi, Paulo esimikija mu ntima mwake kuluta ku Yelusalemu, kupitila ku Makedoniya naku Akaya. Yove enena kuti: “Nikayafwika kwamene uko nikalutesoti ku Loma.”
22 Tetyo ku Makedoniya etumijako aŵili mwa ŵanthu enzemutumikila, amene ni Timoteyo na Elasito. Koma yove enkhala mphela mu chigawo cha Asia kwa nthawe ikuluko.
23 Pa nthawe yamene iyo peyambika nsokonezo ukulu, wokhuza Njila ya Ambuye.
24 Penze munthu muyakine wofula nsimbi zina yake Demetiliyo. Amisili enzepindula ngako chifukwa cha ntchito yake yopanga tu akachisi twa nsimbi twa Atemi.
25 Demetiliyo eunganija amisili amene awo pamozi na ŵanthu okata ntchito yokhuza vinthu vamene ivi. Lomba eŵauja kuti: “Mwewo mwaŵanthu, muziŵa kuti tufwana chuma kufumila mu ntchito yamene iyi.
26 Lomba muwona komasoti kumvwa kuti Paulo wakopa ŵanthu anyinji kuti ayambe kukhulupilila vinthu viyakine. Wachita vamene ivi osati muno mu Ifenso mweka, koma pafupi-fupi mu chigawo chonse cha Asia. Yove onena kuti milungu yopangiwa na manja ni milungulini yayi.
27 Ndipo choyofya ngako ni kunyozekalini tyala kwa ntchito yasu, koma kachisi wa mulungu nkulu mwanakazi Atemi azawonewe monga ni watyala-tyala. Muziŵa kuti aliyense mu chigawo chonse cha Asia komasoti pa chalo chonse olemekeza Atemi, koma chifukwa cha vakunena Paulo ulemelelo wake uzasililetu.”
28 Pechimvwa vamene ivi, ŵanthu amene awo ekalipa ngako noyamba kuŵilikija kuti: “Nkulu ni Atemi mulungu wa Aifenso!”
29 Pevichitika tetyo mu tauni yamene iyo mwizula nsokonezo, ndipo ŵanthu onse eutukila mmalo osoŵelela, alikate Gayo na Alisitako noŵakweŵela mmalo mwamene umo. Gayo na Alisitako enzeyenda na Paulo ndipo kwawo kwenze ku Makedoniya.
30 Paulo enzefuna kuloŵa nkati mwa gulu yamene iyo ya ŵanthu, koma ophunzila aliye mulole.
31 Ŵanthu ayakine ololela vikondwelelo na masoŵela, amene enze ayake nawosoti eyamba kumutumijila uthenga womupapatila kuti osati aike moyo wake pangozi poloŵa mmalo osoŵelela amene awo.
32 Kulaŵila chendi, gulu yonse yamene iyo yenze isokonezeka, ayakine enzeŵilikija viyakine, ayakinesoti viyakine. Mwakuti anyinji enzeziŵilatulini kuti ndaŵa yanji aungana kwamene uko.
33 Tetyo ove efumya Alekizanda mu gulu yamene iyo ndipo Ayuda emukhaŵijila kusogolo. Pavuli pake Alekizanda eimya kwanja kuti alaŵile politeteza kuli ŵanthu amene awo.
34 Koma ove pechiziŵa kuti yove ni Muyuda, onse pamozi eŵilikija kwa ma awazi pafupi-fupi aŵili kuti: “Nkulu ni Atemi mulungu wa Aifenso!”
35 Posilijila pake, wololela tauni pechiuja gulu yamene iyo ya ŵanthu kuti inkhale chelele enena kuti: “Mwewo mwaŵanthu amu Ifenso, kansi alipo munthu wamene oziŵalini kuti tauni ya Aifenso niye yulolela kachisi wa Atemi na chifanizilo chamene chipona kufumila kululu?
36 Pakuti paliye angashushe vamene ivi, mufunikila kudekha osati muchite vinthu moutuka.
37 Mwewo mwaleta aŵa ŵanthu m’kachisi amene ni akawalalalini olo onyoza mulungu wasu wamene uyo mwanakazi.
38 Tetyo keno Demetiliyo na amisili ŵali nawo amene aŵa opasa mulandu munthu ponkhala masiku a mulandu ndipo a gavana* alipo. Akakashalilane kwamene uko.
39 Koma keno mufuna viyakine vupambana pamene apa, chigamulo chake chufunika kuyapelekewa pa malo ovomelejeka.
40 Vamene ivi vachitika lelo ni voyofya chifukwa tingapasiwe navo mulandu woukila boma. Paliyeletu chifukwa chatingalaŵile pa nsokonezo wamene uyu wachitika.”
41 Pechilaŵila vamene ivi, euja ŵanthu amene awo kuti afumepo pa malo amene awo.
Malizu a m'nyansi
^ Gavana wa chigawo cha Loma. Onani matanthauzo a mawu ayakine.
