Ntchito za atumwi 2:1-47
2 Lomba onse enze esonkhana pamozi pa nsiku ya Chikondwelelo cha Pentekosite.
2 Mwazizizi kululu kwimvwika kuunga monga ni mphepo yamphamvu, ndipo chongo chake chizula m’ng’anda yonse yamene iyo mwenze ove.
3 Pavuli pake ewona malilimi owoneka monga ni mulilo uyaka, ndipo eyaŵanika nonkhala pa aliyense wa ove imozi-imozi.
4 Lomba onse amene awo ezujiwa na mzimu utuŵa ndipo eyamba kulaŵila vilaŵilo vosiyana-siyana, mokatijana na mweuŵachitishila mzimu wamene uyo kulaŵila.
5 Pa nthawe yamene iyo, Ayuda oyopa Mulungu ofumila mmitundu yonse ya pa chalo enzenkhala ku Yelusalemu.
6 Tetyo pekwimvwika kuunga kwamene uko, pesonkhana gulu ikulu ya ŵanthu. Ove edabwa ngako, chifukwa aliyense enzeŵamvwa olaŵila mu chilaŵilo chake.
7 Vamene ivi viŵadabwisa ngako mwakuti eyamba kukonshana kuti: “Mwewo mwaŵanthu, kansi ŵanthu onse amene aŵa olaŵila ni aku Galileyalini?
8 Lomba vakwanishika tyani kuti aliyense mu gulu yasu yamene iyi amvwe chilaŵilo chake?
9 Pano pali Apati, Amedi, na Aelamu palisoti ŵanthu ofumila ku Mesopotamiya, ku Yudeya, ku Kapadokiya, ku Ponto na kuchigawo cha Azia.
10 Pali ŵanthu ofumila ku Fulugiya, ku Pamfuliya, ku Iguputo na kumadela a Libiya amene ali pafupi na Kulene. Palisoti alwendo ofumila ku Loma, amene ni Ayuda komasoti ŵanthu amene eloŵa Chiyuda.
11 Komasoti pali Akelete na Aluya. Tonse sewo tukwanisha kuŵamvwa pakulaŵila vinthu vikulu va Mulungu mu vilaŵilo vasu.”
12 Onse edabwa ngako ndipo esiliwa nzelu mwakuti enzekonshana kuti: “Kansi vamene ivi vutanthauza chinji?”
13 Koma ayakine enzeŵaseka noyamba kunena kuti: “Akolwa na vinyu wanyowani amene aŵa.”
14 Koma Petulo epanama pamozi na ŵala atumwi 11. Yove elaŵila nawo mokweja mawu kuti: “Mwewo ŵanthu aku Yudeya na mwewo monse amu Yelusalemu, ziŵani ivi ndipo mvwishilani mosamala vanufuna kuti nikuujeni.
15 Aŵa ŵanthu aliyekolwe yayi monga ni mwamuganizila mwewo, chifukwa nthawe apa lomba ili 9 koloko mmawa.*
16 Koma ivi vuchitika niye vinenewa kupitila muli mneneli Yoweli kuti:
17 ‘“Ndipo mmasiku osilijila,” wanena tetyo Mulungu, “nizapeleke mzimu wangu kuli chamoyo chilichonse, ndipo ŵana ŵanu analume na anakazi azalosele. Alumbwana azawone mensomphenya ndipo analume achikulile azalote maloto.
18 Olo akapolo ŵangu analume na anakazi, nizaŵapase mzimu wangu mmasiku amene awo ndipo ove azankhale aneneli.
19 Nizachite vodabwisa kululu komasoti vizindikilo pachalo. Pazankhale milopa, mulilo na usi ukwela mmululu.
20 Zuŵa izachite mfinzi ndipo mwezi uzayaluke milopa. Vamene ivi vizachitike ikaliye fwika nsiku ikulu komasoti ya ulemelelo ya Yehova.
21 Ndipo aliyense woita pa zina ya Yehova azapulumuke.”’
22 Mwewo analume amu Isilaeli, mvwani aŵa mawu: Yesu waku Nazaleti ni munthu wamene Mulungu ekuwoneshani patuŵa. Echita vamene ivi kupitila mu ntchito za mphamvu, vodabwisa komasoti vizindikilo, vechichita Mulungu pakati panu kupitila muli yove, monga ni mwamuziŵilasoti mwewo.
23 Munthu wamene uyu wamene epelekewa mwa kufuna kwa Mulungu noziŵilatu vakusogolo kwake, mwemuchitisha kuti apaiwe pokhomelelewa pachimuti na ŵanthu asamvwila malamulo.
24 Koma Mulungu emuusha pomumasula ku voŵaŵa* va imfwa, chifukwa venze vosakwanishika kuti imfwa imukate mwamphamvu.
25 Pala Davite enena za yove kuti, ‘Nuika Yehova pasogolo pangu nthawe zonse. Chifukwa yove ali ku kwanja yangu ngayo, ninyang’anyikelini.
26 Pa chifukwa chamene ichi ntima wangu ukondwela ndipo nulaŵila mosangalala ngako. Komasoti newo nizankhale na chiyembekezo,
27 chifukwa muzanisiyelini* m’Manda,* ndipo muzalolelini kuti muŵili wa wokhulupilika wanu uwole.
28 Mwaniziŵisha njila za moyo, ndipo muzanichitishe kuti nikokondwela ngako nikankhala namwe pafupi.’*
29 Enekwangu, shuwa nilaŵile momasuka za kolo yasu Davite. Yove emwalila noikiwa mmanda, ndipo manda ŵake tili nawo mpaka lelo.
30 Yove enze mneneli ndipo enzeziŵa kuti Mulungu emulonjeza pomulapila, kuti pa mpando wake wachifumu azaikepo mmozi wa mbadwa zake.
31 Yove enzeziŵilatu vakusogolo ndipo enenelatu za kuuka kwa Khilisitu kuti aliyesiiwe m’Manda,* komasoti muŵili wake uliyewole.
32 Yesu wamene uyo Mulungu emuusha, ndipo tonse sewo nise mboni za nkhani yamene iyi.
33 Yove ekwejewa nonkhala ku kwanja ngayo ya Mulungu ndipo elondela mzimu utuŵa wolonjezewa wamene uyo kufumila kuli Atata. Tetyo yove watipasa mzimu utuŵa wamuwona na kumvwa.
34 Ndipo olo n’tetyo, Davite aliye lute kululu, koma yove enena kuti, ‘Yehova euja Ambuye wangu kuti: “Nkhala ku kwanja yangu ngayo
35 mpaka nizaike adani ŵako kuti ankhale chokandilapo mendo ŵako.”’
36 Tetyo ng’anda yonse ya Isilaeli iziŵe chendi kuti Yesu wamene uyu, wamene mwewo mwemupaila pachimuti, Mulungu emuika kunkhala Ambuye na Khilisitu.”
37 Ove pechimvwa mawu amene aŵa, evutika ngako mu ntima ndipo ekonsha Petulo na atumwi ayakine amene awo kuti: “Akwasu, tichite tyani pamene apa?”
38 Petulo eŵayankha kuti: “Lapani ndipo aliyense abatiziwe mu zina ya Yesu Khilisitu kuti machimo ŵanu akhululukiliwe. Mukachita tetyo muzalondele mphaso yamahala ya mzimu utuŵa.
39 Chifukwa lonjezo yamene iyi yapelekewa kuli mwewo, kuli ŵana ŵanu, komasoti kuli ŵanthu onse akutali, onse ŵangasankhe Yehova Mulungu wasu.”
40 Ndipo na mawu ayakinesoti anyinji, Petulo echitila umboni mokwanila komasoti aliyeleke kuŵadandaulila kuti: “Lipulumusheni ku m’badwo uyu wamaganizo ophoniyeka.”
41 Tetyo amene elondela mawu ŵake amene awo mosangalala ebatizika, mwakuti nsiku yamene iyo chiŵelengelo cha ophunzila amene awo chiyangijilika na ŵanthu pafupi-fupi 3.000.
42 Tetyo ove epitilija kukonkheja venzephunzisa atumwi amene awo, kutandala,* kulyela pamozi komasoti kupemphela.
43 Ŵanthu onse eyamba kuchita wowa ngako ndipo atumwi amene awo eyamba kuchita vinthu vodabwisa komasoti vizindikilo vinyinji.
44 Onse amene enkhala okhulupilila enzenkhala pamozi ndipo enzeyaŵana vinthu vonse venze navo.
45 Enzegulisa malo ŵawo na vinthu viyakine venze navo noyaŵa kuli onse vala vafwana mokatijana na vakufunikila aliyense.
46 Nsiku iliyonse enzesonkhana m’kachisi mokatijana. Enzeitilana chakulya m’ng’anda zawo komasoti enzeyaŵana vakulya mosangalala komasoti na ntima wonse.
47 Enzetamanda Mulungu komasoti enzekondewa na ŵanthu onse. Komasoti nsiku iliyonse, Yehova epitilija kuyangijila ŵanthu ŵenzepulumusha.
Malizu a m'nyansi
^ Mu Chigiliki, “awazi yachitatu,” kuŵelenga kufumila mma 6 koloko mmawa.
^ Mabaibolo ayakine onena kuti, “nthambo.”
^ Olo kuti, “ muzasiyelini moyo wangu.”
^ Amene aŵa ni manda a ŵanthu onse. Onani matanthauzo a mawu ayakine.
^ Mu Chigiliki, “nikankhala pafupi na chinso chanu.”
^ Amene aŵa ni manda a ŵanthu onse. Onani matanthauzo a mawu ayakine.
^ Olo kuti, “kuyaŵana vinthu.”
