Ntchito za atumwi 20:1-38
20 Nsokonezo wala pewisila, Paulo eita ophunzila kuti awele. Pechiŵatang’isha nolailana nawo, enyamuka ulwendo woluta ku Makedoniya.
2 Yove eyenda-yenda mmadela a kwamene uko notang’isha ophunzila na mawu anyinji, pavuli pake efwika ku Gilisi.
3 Pechinkhala kwamene uko kwa miyezi itatu eganiza kuti ajokele ku Makedoniya, chifukwa chakuti Ayuda emupangila chiwembu. Epangana vamene ivi Paulo pechisala patontho kuyamba ulwendo wa pamanzi woluta ku Siliya.
4 Pa ulwendo wamene uyu enze pamozi na Sopatulo mwana wa Pulo waku Beleya, Alisitako na Sekundo aku Tesalonika, Gayo waku Debe na Timoteyo, koma ofumila mu chigawo cha Asia enze Tukiko na Telofimo.
5 Ŵanthu amene aŵa etangula ndipo enzetiyembekezela ku Tolowa.
6 Koma tiyamba ulwendo wa panyanja ku Filipi masiku a Nkate Uliye Vofufumisha pechisila. Ndipo tiŵafwana ku Tolowa papita masiku 5. Kwamene uko tinkhalako kwa masiku 7.
7 Pa nsiku yoyamba ya sondo, petiungana pamozi kuti tilye chakulya, Paulo eyamba kuŵalaŵilila nkhani, chifukwa enzefuna nyamuka nsiku yokonkhapo. Ndipo elaŵila kwa nthawe itali mpaka pakati pa usiku.
8 Mu chipinda cha mmululu mwamene umo mwetenze tiungana, mwenze malaiti anyinji ngako.
9 Paulo penze nkati molaŵila nkhani, mulumbwana muyakine zina yake Utiko wamene enzenkhale pa windo, eyona tulo twakufwa nato. Penze mutulo tetyo, ekulumuka nopona pansi kufumila pa ng’anda yachitatu ya mmululu, ndipo emufwana kuti wafwa.
10 Koma Paulo eseluka pansi, ndipo efwika penze yove nomukumbatila. Pavuli pake enena kuti: “Nkhalani chelele, chifukwa ali moyo lomba.”
11 Pechichita tetyo Paulo elutasoti mu chipinda chala cha mmululu ndipo etola nkate noyamba kulya.* Ekambilana nawo kwa nthawe itali mpaka mmatemwakucha ndipo pavuli pake enyamuka noluta.
12 Tetyo etola wala mulumbwana ali moyo ndipo etonthojewa ngako.
13 Lomba sewo titangula kuyakwela bote noyamba ulwendo woluta ku Aso. Yove etiuja kuti titangule ndipo tikamutolele ku Aso chifukwa enzefuna kuyenda na mendo.
14 Tetyo pechitifwana ku Aso, timukwejeka m’bote noluta ku Mitilene.
15 Mmawa mwake petifuma kwamene uko, tifwika pafupi na Kiyo. Koma nsiku yokonkhapo tipanama kwa nthawe itontho ku Samo, ndipo mmawa mwake tifwika ku Mileto.
16 Paulo eganiza zolambalala ku Ifenso, kuti osati ataye nthawe mu chigawo cha Asia. Echita vamene ivi chifukwa enzekulumija kuti keno vingakwanishike, pa nsiku ya Chikondwelelo cha Pentekosite akankhale ali ku Yelusalemu.
17 Koma lomba penze ku Mileto etumija uthenga wakuti akulu a mpingo waku Ifenso awele.
18 Akulu amene awo pechifwika, yove eŵauja kuti: “Mwewo muziŵa luweme mwenenzechitila vinthu pa nthawe yenenze namwe pamozi, kufumila pa nsiku yenifwika mu chigawo cha Asia.
19 Nenzetumikila Ambuye monga kapolo molichefya ngako na misozi komasoti na mayeselo ŵenenzekumana nawo chifukwa cha venzefuna kunichita Ayuda.
20 Koma niliye kufisileni chilichonse choyavya ndipo niliyeleke kukuphunzisani pa gulu komasoti ku ng’anda na ng’anda.
21 Koma nachitila umboni mokwanila kuli Ayuda na Agiliki kumo kuti alape nojokela kwa Mulungu komasoti kuti ayambe kukhulupilila Ambuye wasu Yesu.
22 Ndipo lomba, mosogolelewa na mzimu, nikuya ku Yelusalemu olo kuti nuziŵalini vikuti vikanichitikile kwamene uko.
23 Koma chinthu chimozi tyala chanuziŵa ni chakuti, mu tauni na tauni, mzimu utuŵa wanichitila umboni moweleja-weleja kuti nuyembekezela kumangiwa komasoti kutamanishiwa.
24 Koma lomba, moyo wangu nuuwonalini kuti ni wofunika* kuli newo. Chanufuna tyala ni chakuti nisilije kuutuka mpikishano wamene uyu, komasoti kusilija utumiki wenilondela kwa Ambuye Yesu. Nufuna tyala kuchitila umboni mokwanila za uthenga uweme wa kuwama ntima kukulu kwa Mulungu.
25 Ndipo mvwani lomba. Nuziŵa kuti mwewo monse amene nikulalikilani vokhuza Ufumu, muzawonelinisoti chinso changu.
26 Tetyo munkhale mboni lelo, kuti newo niliye mulandu wa milopa ya ŵanthu onse
27 chifukwa nikuujani malangizo onse a Mulungu.*
28 Mukolilolela mweka komasoti kusamalila gulu yonse ya mbelele, yamene mzimu utuŵa wakuikani kuti mukozilolela, kuti muŵetele mpingo wa Mulungu, wamene eugula na milopa ya Mwana wake ngaye-ngaye.
29 Nuziŵa kuti newo nikafumapo, mphumphi zukandilila zizafwike pakati panu ndipo zizasamalilelini gulu ya mbelele mwachikondi.
30 Ndipo pakati panu ŵanthu ayakine azayambe kulaŵila vinthu vobenda kuti apatushe ophunzila noŵakonkhelela.
31 Tetyo munkhale tuni ndipo mukokumbukila kuti kwa vyaka vitatu usiku na nzuŵa, niliyeleke kuchenjeja aliyense wa mwewo uku nufumya misozi.
32 Koma lomba nukusiyani kuti mutetezewe na Mulungu komasoti mawu a kuwama ntima kwake kukulu. Mawu amene awo angakutang’isheni nokupasani chuma pakati pa atuŵa onse.
33 Niliye kumbwile nsimbi, golide olo chovwala cha munthu.
34 Mwewosoti muziŵa luweme kuti manja aŵa ekata ntchito kuti nifwane vofunikila pa moyo wangu komasoti va ŵanthu ŵenenze nawo.
35 Pa vinthu vonse nakuwoneshani kuti pokata ntchito mwakhama teti, mukoyavya ofoka ndipo mukokumbukila mawu ŵa Ambuye Yesu. Pala yove enena kuti, ‘Kupasa kutichitisha kunkhala okondwela ngako kupambana kulondela.”
36 Pechilaŵila vamene ivi, yove na akulu onse egwada nopemphela.
37 Pevichitika tetyo onse elila ngako. Pavuli pake emuhaga* Paulo nomupasa kisi mwachikondi.
38 Ove echimvwa chisoni ngako maka-maka chifukwa cha mawu ŵechilaŵila yove akuti azawonelinisoti chinso chake. Pavuli pake emupelekeja kuyakwela bote.
Malizu a m'nyansi
^ Mu chigiliki, “esuna-suna nkate ndipo eyamba kulya.”
^ Olo kuti, “wantengo wapatali.”
^ Olo kuti, “vonse vakufuna kuchita Mulungu.”
^ Olo kuti, “emukumbatila.”