Ntchito za atumwi 21:1-40
21 Petilikakamija nosiyana nawo, tiyamba ulwendo wasu wa panyanja. Tiyenda sitiliti mpaka kuyafwika ku Ko. Nsiku yokonkhapo tefwika ku Lode ndipo petifuma kwamene uko tichiyafwika ku Patala.
2 Kwamene uko tifwana bote yamene yenzetauka kuluta ku Foinike ndipo tikwela nonyamuka.
3 Nsuwa yaku Kupulo peiyamba kuwonekela, teisiya kumanjele* nopitilija ulwendo wasu kuluta ku Siliya. Pavuli pake tipanama ku Tulo kuti aselushe katundu m’bote.
4 Tisakila ophunzila ndipo petiŵafwana tinkhala nawo kwa masiku 7. Koma moujiliwa na mzimu, ove euja Paulo moweleja-weleja kuti osati ayeje kuluta ku Yelusalemu.
5 Masiku ŵasu onkhala kwamene uko pechisila, tinyamuka kuti tipitilije ulwendo wasu. Akwasu onse komasoti anakazi na ŵana, etipelekeja mpaka kunja kwa tauni yamene iyo. Kwamene uko tigwada mmbali mwa nyanja nopemphela.
6 Pavuli pake tilailana ndipo sewo tikwela bote, koma ove ejokela ku ng’anda kwawo.
7 Tetyo tinyamuka ku Tulo pa bote ndipo tifwika ku Tolemayi. Kwamene uko tipasa moni akwasu nonkhala nawo kwa nsiku imozi.
8 Nsiku yokonkhapo tinyamuka na kuyafwika ku Kaisaleya ndipo tiluta ku ng’anda kwa mulaliki muyakine zina yake Filipo. Yove enze mmozi wa ŵala analume 7 a mbili iweme, ndipo tinkhala naye.
9 Filipo enze na ŵana anakazi 4 osalunguliwa,* amene enzelaŵila vinthu vakusogolo.
10 Koma petinkhala kwa masiku anyinjiko, mneneli muyakine zina yake Agabo ewela kufumila ku Yudeya.
11 Yove efwika kwenze sewo notola bande wa Paulo. Pavuli pake elimanga mendo na manja nonena kuti: “Mzimu utuŵa wanena kuti, ‘Munecho wa bande wamene uyu, Ayuda akamumange teti ku Yelusalemu nomutwala kuli ŵanthu amitundu iyakine.’”
12 Petichimvwa vamene ivi, sewo pamozi na ŵanthu amene enze kwamene uko, tiyamba kupapatila Paulo kuti osati alute ku Yelusalemu.
13 Koma Paulo eyankha kuti: “Ndaŵa yanji mulila komasoti kufuna kunifokesha? Newo nine wokonzeka osati kumangiwa kweka, koma nine wokonzekasoti kuyakufwa ku Yelusalemu chifukwa cha zina ya Ambuye Yesu.
14 Petikangiwa kumuchinja maganizo, tileka kumulesha* nonena kuti: “Vofuna va Yehova vichitike.”
15 Pavuli pake tikonzeka nonyamuka ulwendo woluta ku Yelusalemu.
16 Koma ophunzila ayakine aku Kaisaleya enyamuka nase pamozi kuti atipelekeje ku ng’anda kwa Mnaso waku Kupulo, kuti tikafwikile kwamene uko. Munthu wamene uyu enze mmozi wa ophunzila oyambilila.
17 Petifwika ku Yelusalemu akwasu etilondela mosangalala.
18 Koma nsiku yokonkhapo Paulo eluta nase kwa Yakobo ndipo akulu onse enze kwamene uko.
19 Paulo eŵapasa moni noyamba kuŵafotokozela momvwika luweme vechichita Mulungu kuli ŵanthu amitundu iyakine kupitila mu utumiki wake.
20 Ove pechimvwa vamene ivi eyamba kutamanda Mulungu, koma olo n’tetyo emuuja kuti: “Nkwasu, pali Ayuda anyinji okhulupilila ndipo onse amene aŵa ni olipeleka pa nkhani yokonkheja Chilamulo.
21 Koma ove echimvwa mphekesela zakuti wewo wankhala uphunzisa Ayuda onse amene ali pakati pa ŵanthu amitundu iyakine kuti aleke kukonkheja Chilamulo cha Mose. Akuti uŵauja kuti osati akochita mdulidwe wa ŵana ŵawo komasoti osati akokonkheja miyambo yamene tankhala tuikonkheja kufumila kale na kale.
22 Lomba tichite tyani pamene apa? Tukaikilalini kuti ove a amvwe kuti wewo wawela.
23 Tetyo uchite vati tikuuje: “Tili na analume 4 amene echita lumbilo.
24 Utole ŵanthu amene aŵa ndipo uchite nawo mwambo wolituŵisha. Uŵalipilile vonse vofunika, kuti agele sisi yawo. Ukachita tetyo, aliyense aziŵe kuti mphekesela zechimvwa zokhuza wewo ni wenye tyala. Awone kuti uchita vinthu mokonkheja dongosolo komasoti kuti usunga Chilamulo.
25 Koma okhulupilila amene awo ofumila mmitundu iyakine, tiŵatumijila kalata yunena za chigamulo chasu chakuti apewe vupelekewa nsembe ku mafano komasoti milopa, vosakhesa* na chiwelewele.”*
26 Tetyo nsiku yokonkhapo, Paulo etola analume amene awo nakuyachita nawo mwambo wolituŵisha. Pavuli pake, eloŵa m’kachisi kuti akalaŵile pakuti azasile masiku ŵawo a mwambo wolituŵisha komasoti pakuti azapeleke nsembe ya aliyense.
27 Masiku 7 pechisala patontho kusila, Ayuda ofumila ku Asia ewona Paulo ali m’kachisi. Tetyo echitisha kuti pa gulu yonse ya ŵanthu payambike nsokonezo ndipo emukata.
28 Ove enzeŵilikija kuti: “Mwewo Aisilaeli, tiyavyeni! Munthu wamene uyu ophunzisa voshushana na ŵanthu a ntundu wasu kulikonse. Yove ophunzisasoti voshushana na Chilamulo komasoti ŵano malo. Kuyangijila pamene apa, watola Agiliki noŵaloŵesha m’kachisi ndipo waifyasoti aŵa malo atuŵa.”
29 Ove elaŵila vamene ivi chifukwa nsiku iyakine ewona Telofimo waku Ifenso ali naye pamozi mu tauni yamene iyo lomba eganiza kuti Paulo eloŵesha Telofimo m’kachisi.
30 Tetyo mu tauni yonse yamene iyo mwenze nsokonezo ndipo ŵanthu eutukila ku kachisi kwamene uko. Pavuli pake ekata Paulo nomukweŵela kunja kwa kachisi. Nthawe yamene iyo viseko vivaliwa.
31 Penzefuna kumupaya uthenga wefwika kwa nkulu wa gulu ya masodja wakuti mu Yelusalemu monse muli nsokonezo.
32 Nthawe yamene iyo, yove etola masodja na asogoleli ŵawo noutukila kwamene uko. Ŵanthu amene awo pechiwona wala nkulu wa masodja pamozi na masodja ŵake, eleka kumuniyata Paulo.
33 Pevichitika tetyo, nkulu wa masodja wamene uyo efwika pafupi nomukata ndipo elamula kuti amumange na matcheni aŵili. Pavuli pake ekonsha ŵala ŵanthu vokhuza yove komasoti vechichita.
34 Koma ayakine pa gulu yamene iyo eyamba kuŵilikija vinthu viyakine, ayakinesoti viyakine. Tetyo pechikangiwa kufwana mfundo ngayo-ngayo chifukwa cha chongo, elamula kuti alute naye ku mpanda wa masodja.
35 Pechifwika pamasitepe, masodja amene awo echita kumutakula chifukwa chakuti gulu yamene iyo yenzechita vachiwawa.
36 Ŵanthu amene awo enzeŵakonkhelela, uku oŵilikija kuti: “Apaiwe wamene uyo!”
37 Koma pechisala patontho kuloŵa naye mu mpanda wa masodja, Paulo esenga nkulu wa masodja kuti: “Kansi munganilole kuti nilaŵileko namwe patontho?” Yove enena kuti: “Kansi ulaŵila Chigiliki?
38 Niye kuti niwelini munthu waku Iguputo wamene masiku akuvuli wiyambisha nsokonezo woukila boma nosogolela vigaŵenga 4.000 kuluta navo mu chipululu?”
39 Paulo eyankha kuti: “Newo nine Muyuda waku Taliso, ku Kilikiya, nzika ya mu tauni yotchuka. Pulizi nukusengani, niloleni nilaŵile kuli aŵa ŵanthu.”
40 Pechimulola, Paulo epanama pamasitepe noimyila ŵanthu amene awo kwanja. Onse pechinkhala chelele, elaŵila nawo mu Chihebeli kuti:
Malizu a m'nyansi
^ Olo kuti, “mbali yamene kwenze sitesheni.”
^ Mu Chigiliki, olo kuti “amene enze ndola”
^ Mu Chigiliki, “tinkhala chelele.”
^ Olo kuti, “nyama yamene yapaiwa osaikhesa kuti milopa ifume.”
^ Mu Chigiliki por·nei′a. Onani matanthauzo a mawu ayakine.