Ntchito za atumwi 22:1-30
22 “Mwewo mwaŵanthu, enekwangu na atata ŵangu, mvwishilani mawu ŵangu oliteteza.”
2 Pechimvwa kuti olaŵila nawo mu Chihebeli, onse echingonkhala chelele, ndipo yove enena kuti:
3 “Newo nine Muyuda, wovyalikila ku Taliso waku Kilikiya, koma niphunzisiwa na Gamaliyele mu tauni yamene ino. Eniphunzisa ngako kukonkheja Chilamulo cha makolo ŵasu. Ndipo nenze wolipeleka potumikila Mulungu monga ni mwamuchitila mwewo monse lelo.
4 Nenzetamanisha okonkheja Njila yamene iyi mpaka kuŵapaya. Nenzemanga analume na anakazi na kuyaŵatwala ku djeli.
5 Ndipo nkulu wa ansembe na bungwe yonse ya akulu inganichitile umboni. Kuli amene aŵa niye kwenifwanasoti makalata onivomeja kuti nikamange akwasu ku Damasiko. Ninyamuka kuti nikakate ŵanthu amene enze kwamene uko noŵaleta ku Yelusalemu ali mangiwe kuti azapasiwe chilango.
6 Koma penenze mu njila nzuŵa, nasala patontho kufwika ku Damasiko, mwazizizi kwingweleŵela ngako. Kungweleŵela kwamene uko kwenze kofumila kululu ndipo kwezenguluka penenze newo.
7 Tetyo nipona pansi ndipo nichimvwa mawu akuti: ‘Saulo! Saulo! Ndaŵa yanji unitamanisha?’
8 Newo niyankha kuti, ‘Nimwe ŵani Mbuye wangu?’ Ndipo eniuja kuti, ‘Nine Yesu waku Nazaleti, wautamanisha wewo.’
9 Analume ŵenenze nawo ewona kungweleŵela kwamene uko, koma aliye umvwe mawu ŵenzelaŵila na newo.
10 Lomba newo nikonsha kuti, ‘Nichite tyani Ambuye?’ Ambuye amene awo eniyankha kuti, ‘Nyamuka ndipo ulute ku Damasiko. Kwamene uko ukaujiwe vonse vakonzewa kuti uchite.’
11 Koma pakuti nenzekwanishalini kuwona chilichonse chifukwa cha ulemelelo wa kungweleŵela kwamene uko, ŵanthu ŵala ŵenenze nawo enikata kwanja mpaka kuyafwika ku Damasiko.
12 Lomba Hananiya, munthu woyopa Mulungu mokatijana na Chilamulo, wamene enze na mbili iweme pakati pa Ayuda onse a kwamene uko,
13 ewela. Yove epanama pafupi nonena kuti: ‘Nkwangu Saulo yambasoti kulola!’ Nthawe yamene iyo nikweja menso ŵangu nomuwona.
14 Tetyo yove enena kuti: ‘Mulungu wa makolo ŵasu wakusankha kuti uziŵe vofuna vake, uwone wolungama wamene uyo komasoti umvwe mawu a pakamwa pake.
15 Chifukwa uzankhale mboni yake kuli ŵanthu onse pa vinthu vawawona komasoti kumvwa.
16 Lomba uchelwelanji? Nyamuka ubatizike nochosa machimo ŵako poita pa zina yake.’
17 Koma penijokela ku Yelusalemu noyamba kupemphela mu kachisi, niwona mensomphenya.
18 M’mensomphenya amene awo niwona Ambuye oniuja kuti, ‘Fuma mu Yelusalemu mokulumija, chifukwa ove azamvwelini uthenga wako unena za newo.’
19 Ndipo newo ninena kuti, ‘Ambuye, ove oziŵa luweme kuti nenzeluta mmalo opemphelela noika mu djeli ŵanthu amene enzekukhulupililani komasoti kuŵakwapula.
20 Komasoti Sitefano mboni yanu penze paiwa, newo nenzepo ndipo nivomekeja. Ni newosoti nenzelolela malaya akunja a ŵanthu amene awo enzemupaya.’
21 Koma eniuja mphela kuti, ‘Nyamuka, chifukwa nizakutumije kutali kuli ŵanthu amitundu iyakine.’”
22 Ove enzemumvwishila mpaka pa mawu amene aŵa. Koma pavuli pake eŵilikija kuti: “Munthu wamene uyu osati apezekesoti pano pa chalo! Ofunikilalini kunkhala na moyo!”
23 Koma pakuti enzeŵilikija noponya mmululu malaya ŵawo akunja komasoti lukungu,
24 nkulu wa masodja elamula kuti aloŵe naye mu mpanda wamasodja. Yove enena kuti ofunika kumukonsha makonsho uku omuniyata kuti aziŵe chachitisha kuti ŵanthu akomuŵilikija tetyo.
25 Koma pechimuyoneka kuti amuniyate, Paulo ekonsha nsogoleli wa masodja wamene enzepaname pamene apo kuti: “Kansi malamulo okulolani kuniyata nzika ya Loma mulandu wake ukaliye tongewa?”
26 Nsogoleli wamene uyo wa masodja pechimvwa vamene ivi eluta kuli nkulu wa masodja nomukonsha kuti: “Kansi mufuna muchite tyani? Munthu wamene uyu ni nzika ya Loma.”
27 Pevichitika tetyo nkulu wa masodja wamene uyo ewela nomukonsha kuti: “Niuje, kansi n’chendi kuti niwe nzika ya Loma?” Yove eyankha kuti: “Eye.”
28 Nkulu wa masodja wamene uyo enena kuti: “Newo nigula ufulu wonkhala nzika na ndalama zinyinji.” Koma Paulo enena kuti: “Koma newo wangu nichita kuvyalika nawo.”
29 Nthawe yamene iyo analume amene enzefuna kumukonsha makonsho, uku omuniyata efumapo nomusiya. Nayesoti wala nkulu wa masodja echita wowa pechiziŵa kuti munthu wamene uyo wechimanga ni nzika ya Loma.
30 Nsiku yokonkhapo, pofuna kuziŵa chifukwa ngacho-ngacho chenzemupasila mulandu Ayuda amene awo, emufumya. Pechichita tetyo elamula ansembe akulu-akulu na Khoti Ikulu ya Ayuda kuti aungane. Tetyo eleta Paulo nomupanamika pakati pawo.
