Ntchito za atumwi 23:1-35
23 Paulo eloleshesha Khoti ikulu yamene iyo ya Ayuda nonena kuti: “Mwewo mwaŵanthu, enekwangu, nachita vinthu paliye kushushiwa na chikumbuntima changu olo patontho pamenso pa Mulungu mpaka lelo.”
2 Hananiya nkulu wa ansembe pechimvwa vamene ivi elamula ŵanthu amene enze paname naye pafupi kuti amuniyate pakamwa.
3 Pechichita tetyo Paulo emuuja kuti: “Uwone, Mulungu akulange, chipupa chotila penti wewo. Wankhala pamene apo kuti uniweluze mokonkheja Chilamulo, lomba ufwayasoti Chilamulo chamene icho polamula kuti aniniyate?”
4 Ŵanthu amene enzepaname naye pafupi enena kuti: “Kansi unyoza nkulu wa ansembe wa Mulungu?”
5 Paulo enena kuti: “Akwasu niliyeziŵe kuti ni nkulu wa ansembe. Chifukwa Malemba onena kuti, ‘Wolamulila wa ŵanthu a ntundu wako osati ukomulaŵilila vinthu viipa.’”
6 Paulo pechiwona kuti ayakine a ove enze Asaduki ndipo ayakine enze Afalisi, eŵilikija mu khoti mwamene umo kuti: “Mwewo mwaŵanthu, enekwangu, newo nine Mfalisi, mwana wa Afalisi. Pano nuweluziwa chifukwa cha chiyembekezo chakuti akufwa azauke.”
7 Pechilaŵila vamene ivi, Afalisi na Asaduki eyamba kukangana ngako, ndipo gulu yamene iyo iyaŵanika.
8 Chifukwa Asaduki onena kuti munthu wakufwa angaukelini komasoti kuliye angelo olo cholengewa chauzimu. Pamene Afalisi ovomekeja patuŵa kuti vonse vamene ivi vilipo.
9 Tetyo penze chongo, ndipo alembi ayakine a mu gulu ya Afalisi epanama noyamba kushusha mwaukali kuti: “Tufwanalini chawaifya munthu wamene uyu. Koma keno mzimu olo mngelo walaŵila naye . . .”
10 Nkangano wamene uyo pewikula ngako, nkulu wa masodja echita wowa kuti ŵanthu amene awo amupaye Paulo. Tetyo elamula masodja kuti alute akamufumye pa gulu yamene iyo nowela naye ku mpanda wa masodja.
11 Koma usiku wa nsiku yamene iyo, Ambuye epanama pafupi na Paulo nomuuja kuti: “Tang’a ntima chifukwa wanichitila umboni mokwanila ku Yelusalemu, ndipo ukanichitilesoti umboni ku Loma.”
12 Kwacha mmawa, Ayuda epangana nolapa pochita kulitembelela kuti alyelini olo kumwa chilichonse mpaka apaye Paulo.
13 Penze analume opitilila 40 amene ekonza chiwembu chamene ichi chochita lapila.
14 Ŵanthu amene aŵa eluta kuli ansembe akulu-akulu na akulu kuyanena kuti: “Sewo talapila pochita kulitembelela kuti tilyelini chilichonse mpaka tipaye Paulo.
15 Lomba mwewo na Khoti Ikulu ya Ayuda, muuje nkulu wa masodja kuti alete Paulo kuli mwewo monga kuti mufuna kumvwisha luweme nkhani yake. Koma akaliye fwika, sewo tizamupaye.”
16 Koma mwana mwanalume wa mulongosi wake wa Paulo echimvwa kuti ŵanthu amene awo akonza za kuyamufisamila pa njila, ndipo eluta ku mpanda wa masodja nakuyauja Paulo vamene ivi.
17 Tetyo Paulo eita mmozi wa asogoleli a masodja nomuuja kuti: “Umutole mulumbwana wamene uyu ulute naye kuli nkulu wa masodja chifukwa ali na mawu ŵakufuna kuyamuuja.”
18 Tetyo emutola chendi noluta naye kwa nkulu wa masodja, ndipo enena kuti: “Paulo wala ali mu djeli wenze waniita noniuja kuti nilete mulumbwana uyu. Akuti ali na mawu ŵakufuna kukuujani.”
19 Nkulu wa masodja ekata kwanja mulumbwana wamene uyo noluta naye pambali ndipo emukonsha kuti: “Ufuna uniuje chinji?”
20 Yove enena kuti: “Ayuda apangana vakuti akusengeni kuti mailo mutwale Paulo ku malo a Khoti Ikulu ya Ayuda, monga kuti ofuna kumvwisha luweme mulandu wake.
21 Koma osati mulole kuti akunyengeleleni chifukwa analume opitilila 40 ofuna azamufisamile pa njila. Ŵanthu amene aŵa alapila mochita kulitembelela kuti alyelini olo kumwa chilichonse mpaka amupaye. Mwakuti palipano akonzeka, oyembekezela tyala chilolezo chanu.”
22 Nkulu wa masodja euja mulumbwana wamene uyo kuti alute pechimuuja kuti: “Osauja aliyense kuti wanifotokozela vamene ivi.”
23 Tetyo eita asogoleli aŵili a masodja kuti awele noŵauja kuti: “Ujani masodja 200 kuti akonzekele kuyenda ulwendo woluta ku Kaisaleya cha mma 9 koloko* usiku uno. Pankhalesoti analume 70 okwela pa mahosi komasoti masodja 200 a mikondo.
24 Muŵapasesoti mahosi ŵakuti akwejekepo Paulo kuti akafwike kwa gavana Felike ali wotetezeka.”
25 Lomba yove elemba kalata yonena kuti:
26 “Newo Kalaudiyo Lusiya, nulembela mwewo Wolemekezeka Gavana Felike: Londelani moni!
27 Munthu wamene uyo enze ekatiwa na Ayuda ndipo enze esala patontho kumupaya. Koma nthawe yamene iyo nifwika na gulu yangu ya masodja nomupulumusha, chifukwa nichimvwa kuti yove ni nzika ya Loma.
28 Lomba pofuna kuziŵa chechiphoniya, niluta naye ku Khoti Ikulu ya Ayuda.
29 Kwamene uko nifwana kuti omupasa mulandu pa nkhani zokhuza Chilamulo chawo. Koma aliyepezeke na mulandu uliwonse wangamupaile olo kuikiwa mu djeli.
30 Koma olo n’tetyo pakuti naziŵa vapangana kuti achitile munthu wamene uyu, namutumija kuli mwewo, ndipo nalamula omupasa mulandu amene awo kuti azanene mulandu wamene uyo pamenso panu.”
31 Tetyo masodja amene awo etola Paulo usiku noluta naye ku Antipatili mokatijana na vechiŵalamula.
32 Nsiku yokonkhapo esiya ŵala analume okwela pa mahosi kuti apitilile naye, koma ove ejokela ku mpanda wa masodja.
33 Analume okwela pa mahosi amene awo efwika ku Kaisaleya nopeleka yala kalata kwa gavana ndipo epelekasoti Paulo.
34 Tetyo gavana wamene uyo eŵelenga kalata yamene iyo ndipo ekonsha chigawo chechifumila Paulo. Echimvwa kuti efumila ku Kilikiya.
35 Tetyo enena kuti: “Nimvwishile mulandu wako wonse, ŵanthu okupasa mulandu amene awo akafwika.” Ndipo elamula kuti amusunge m’ng’anda mwa Mfumu Helode nomulolela.
Malizu a m'nyansi
^ Mu Chigiliki, “awazi yachitatu,” kuŵelenga kufumila mma 6 koloko nchingulo.
